Read Hatam NINDAT KEP TUHAN NICUKTI NYA 20 Bible Online

NINDAT KEP TUHAN NICUKTI NYA 20 - Hatam bible

NINDAT KEP TUHAN NICUKTI NYA 20

¹“Tirigino jinjei siceu bijihwen jide siceu nya, lene ma jidigit tut ide kroba pran kin ide kuda di mang-mang kin ide tentara di ikon pran kan nya di imangti dor njiriek jimangti au. Lewo jide TUHAN Allah di kwek jeni leu minu Mesir mimpu je.

²Nipou tirigi jikinyon ei nikon pranti bigyo lene suar imam gom kiju bipingok jingonti bipai bije,

³‘Disut bat mben Israel jen, ma jintu kep dihyet dini! Njap di ammani jinjei bijikon pran ug ri. Ma jittin tut jide siceu nya ba, jingon digit cem jingon tai-tai bou cem au.

⁴Lewo jide TUHAN Allah minjei siceu bit je bisindem tut je leu binhyepo jibindei timek yok.’

⁵Leu api ma nibou tentara nya ihig ser jeni ‘No di sindi ngot nide ig biput noro bon midut nipiga ig dima bigyo ningat rin ei jikieti e? Gino ningat rin ei jikieti lene ma no dima ngkwei hanyen hak ug. Leu gino mai nimbiam ei pranti leu lene hiter mibong kep nide ig ri.

⁶No di sindi ta ba anggur ei nide miai ba anggurti di puk ningat nya bigyo ningat rin ei jikieti e? Gino ningat rin lene ma ngkwei hak ug. Leu gino mai nimbiam ei pranti leu lene hiter midut nide ba anggur ngei bingat ningwes eisi.

⁷No di yok wa kep sop hi ba, tin ei mem gima wak sop dima ningat rin ei jikieti e? Gino ningat rin lene ma ngkwei hak ug. Leu gino mai nimbiam ei pranti leu lene hiter miwak nide sop di yok wa kep dima ri.’

⁸Lene ma nibou tentara nya cem itri tut bijeni ‘Gino tungwa di ningon tai-tai bou ba, ttin cem ningat rin ei jikieti lene ma no dima ngkwei hanyen hak ug. Leu binhyepo noni ngkwei pip tentara nindigsi di ibrim ingkek mem pran nya au.’

⁹Tirigi nibou tentara imbrap bit ide tentara nya leu su lene suar indo nibou nya bikwop nimpung tentara nya gom-gom di ibicom yam nok gom.

¹⁰Tirigino jinjei siceu bijihwen minu ndig gom lene ma jibon nituti mem timiei minu ndig dima ikes yonti ei jinda nsi nipou ug e.

¹¹Gino ikau ide dimbou pmem nya ba, ikes yonti ei jindati lene suar juubon yok binok jide awak nya ba, jiba yok biyai midyai nibidip huk yokti mikuisi hak ug.

¹²Noro gino timiei minu ndig dima ikou sut nikes yonti ei jinda nsi ba, ikinyon ei nikon pranti bit je lene ma jiyon siceu ttai minu ndig dima.

¹³Leu api tirigi jide TUHAN Allah sindem tut je ba, jibindei timek minu ndig dima leu bijiyai bijiyati lene suar jiyai nimai bak timiei pinai nya ei minu ndig dima yahagom.

¹⁴Noro jipos sop nya kin munggwom nya kin mindhe-ndhe nya kin mun nyeng hagom ei minu ndig dima. Jima ndigban ngot di jide siceu ide hagom hak ug. Jide TUHAN Allah kes mun nyeng dima yok hagom ei jindati leu binhyepo jinyeng tut.

¹⁵Suar jibon nok gima bak minu ndig di jo ting bibor leu jide minu ndig di jibongti nya.

¹⁶Noro tirigi jibindei timek minu ndig ei minu di jide TUHAN Allah miyai bije lene suar jiyai nimai bak timiei di ibong ei minu ndig dima yahagom bingwig hak ug.

¹⁷Suar jibindei sar mben Het kin mben Amori kin mben Kanaan kin mben Feris kin mben Hewi kin mben Yebus yahagom bit leu nok jide TUHAN Allah nicuk jeti.

¹⁸Suar jiyai nimai biyok ser nhyema ibindei ba, jibon sisar tut jide TUHAN Allah tirigi yoni ingginau je nyahan ba, jibon nibon munti di tungwatu nya igyai kou nya tug hon ide nung di ikuk yok bak nya bi.

¹⁹Tirigi jikon pran bit minu ndig gom ba, mbro nok gino jiyon ttai minu ndig dima wer ninno lo, ma jiwim biei di ngat ningat nya di hei ei minu ndig dima nisai au. Ma jiyem ningat he noro ma jiwim biei dima ninjem au. Lewo biei dima yok ne jide siceu rin bi.

²⁰Ma jiba biei hiter nya binen lin mbrei mem jibikui ngug tig di bikrop ttai minu dima. Tug hon nisinati dima lene mijicut igkep yok ba, jibindei bisar bingwig.”