Read Hatam NINDAT KEP TUHAN NICUKTI NYA 24 Bible Online

NINDAT KEP TUHAN NICUKTI NYA 24 - Hatam bible

NINDAT KEP TUHAN NICUKTI NYA 24

¹ “Gino no di pinai wak sop gwam nitta pilei gom nok nitnem lo, joi sut noni bi ei nidipti bu hanyen lewo ngat nitnem yai mun di bindei dino mmai sut nonti[11] lene nijjep bon srat di bindo tut gi kou sut nitnem ba, yai binoni leu api jji noni bihigom.

²Lene ei nidipti bu hiter wak sop dima.

³Lene noni cem kou sut nitnem dima bibon srat di bindo tut gi kou sut noni biyai bak leu api jji noni bihigom bu e, he ma nijjep gi nican dima mai leu noni e.

⁴Mbro nok gino gom leu mun nyeng can pini pek kep mem noni lene ma nijjep timiei wak noni hanyen au. Suar nijjep timiei ngat noni nok sop di map kui su. Gino noni wak sop dima hanyen lene gini nok mun di mpiei bibor ei TUHAN di nok jide Allah nuhwap nsi. Ma jibon sisar di kinei bibor nok gima ei minu jep di TUHAN miyai bije au.”

⁵“Tirigi tungwagom sindi wak nitnem lene ma nibou tentara kus noni nok siceu mem gima bikon pran au. Lene ma nibou di ninyeng tak kep noni cuk noni bipia yai midyai mikuisi au. Nok bibou nyohou dimig nide ig bei nsi nya bibindei ba, nitnem joi sut noni mem ari bingwam nitindur gom ug e.

⁶Gino tungwagom dahat mingun leu je lene ma jipos nide tig huk mbrei di noni suar mem gima ho nide gandum mem nide bat nya eisi nok bindo mem je au. Leu gi nok lene nide tig huk mbrei mem gima bitin ei njita mem nide bat nya hi jo binoni bu bi.

⁷ Tungwa tou rino pos nisut mben Israel gom ba, ubon noni nok nide awak ba, tri noni nok awak mem hiter lene ma no dima tug ndei hukum nimai drek dip. Leu binhyema jidip tut sisar di kinei dima.

⁸ Tirigi bras mbrei yem je lene ma jiyai bit leu nok imam di intun Lewi him nya icuk jeti nya hagom. Suar jibit Ditde nipingokti di diyai biyok nya hagom.

⁹ Ma jiyok ngon kep notou TUHAN di nok jide Allah bibon Miryam tirigi po jikwei leu minu Mesir pima.

¹⁰ Tirigi jippiet mun nyeng hi bak tungwagom lene ma jicoi ug ei nide ig bei bijipos nide sinsun dut nok mun di jibiti bipia noni mirop ningwam bije hanyen au.

¹¹Ma jibet jingon bijiya ei nide biyati bibou nonti ug bittei kwei biyai bije he.

¹²Ne gino nuhui mbum lene ma jikon nide sinsun dut dima ei jide ig bei kikau au.

¹³Noro ma jingkwei nide sinsun dima hanyen binoni bikwop mmunti nipou tirigi mpia kimbas bigyo leu binhyepo juk ser nidigokti ei nibongti. Apino noni mipai sigyo hanyen bije leu api TUHAN di nok jide Allah mijoi sut je.

¹⁴ Ma jiris mun bak jide awak mben Israel di nuhui mbum ba, ndwau kin ngkiai di ibong ei jide minu ttou nsi gom cem au.

¹⁵Ma jiyai nimuhup binoni nipou tirigi mpia kimbas bigyo bikwop njap ngwa hagom. Lewo noni suar nimuhup dima biningon ya mem. Gino jiyai nimuhup binoni bi lene noni mahara TUHAN tindei je apino sisar dima mibindei ba, jingon mui.

¹⁶ Ma jiyai nimai bak andigpoi nya drek dip imunggwom bat nya ide mun di mbuk nya au. Ma jiyai nimai bak munggwom nya drek dip icig bat-ipmem bat nya ide mun di mbuk nya au. Suar tungwagom tug ndei hukum nimai drek dip nonti njem nide mun di mbuk nya he.

¹⁷ Ma jibon mun di kinei tut ngkiai nya kin moibihi nya bijico kep yok au. Lene ma jipos kibom nya ide sinsun dut nok mun di bindo bipia mirop jide ningwam hanyen au.

¹⁸Ma jiyok ngon kep bipia jeni cem jinok awak ei minu Mesir nipou su ba, TUHAN di nok jide Allah kwek je tu. Leu gima rino diyai nicukti dini bije.

¹⁹ Tirigi jikos jide gandum ei beisi lene ma jiba jiyai ngat hi lo, ma jingkwei hanyen bijimbus gi hi dima au. Ma jisindui sut bijo ei mem ngkiai nya kin moibihi nya kin kibom nya leu binhyepo TUHAN di nok jide Allah miyai gi kei bije bimpu je tut jide midyai nya hagom.

²⁰Tirigi jipuk jide biei zaitun ningat mbigom tu lene ma jingkwei hanyen bijipuk bram gi hi di jiba jiyai ngat ei au. Gi hi dima jo ei mem ngkiai nya kin moibihi nya kin kibom nya.

²¹Tirigi jipuk jide ba anggur ningat mbigom tu lene ma jingkwei hanyen bijipuk bram gi hi di jiba jiyai ngat ei au. Gi hi dima jo ei mem ngkiai nya kin moibihi nya kin kibom nya.

²²Ma jiyok ngon kep bipia jinok awak ei minu Mesir nipou su leu api TUHAN kwek je tu. Gima rino diyai nicukti dini bije.