Read Hatam NINDAT KEP TUHAN NICUKTI NYA 27 Bible Online

NINDAT KEP TUHAN NICUKTI NYA 27 - Hatam bible

NINDAT KEP TUHAN NICUKTI NYA 27

¹Mpe dima ne Musa ya tut nibou mben Israel bisok kep nide limwa nya “Ma jibit TUHAN nicukti nya di ditri tut bije njap di ammani.

² Njap di jisigon Minyei Yordan bijicoi ug ei minu di jide TUHAN Allah miyai bije lene suar jitas tig nindig nindak poi leu api jiba kapur bihwen.

³Ma jipas kep bikwop niggai serti nya gom-gom di ditri tut bije hagom ei tig dima dip. Tirigi jicoi ug ei minu di bon dihyei suti ba, nnum kei cem di jidigup bat-jidigai bat ide TUHAN Allah preu sut ei mem je ba,

⁴jisigon Minyei Yordan tu lene suar juug sut tig dini yok ug ei Nungug Ebal. Lene ma jita tig nya pijum ei sirima leu api jiba kapur bihwen dem igbit dicuk jeti njap di ammani.

⁵ Ma jiba tig di jiba ngkimom nitu biheu bi dima biwin nimbar hum dok gom mem jide TUHAN Allah ei mpia dima.

⁶Lewo suar jiba tig nitindur di jiba ngkimom nitu biheu bi dima biwin bikwop nimbar hum dok hagom mem jide TUHAN Allah. Ma jibon midut gi nindig mindhe titut kep hum ei sirima.

⁷Ma jibon midut nibiyai ningon kwes kin Allah ei sirima cem leu binhyepo jibiyai nillei ei jide TUHAN Allah Noho bei.

⁸Suar jiba hurup di sieng kei bipas kep Allah niggai serti nya hagom ei tig po jiba kapur bihwen pima nidip a.”

⁹Niabiati bu lene Musa ya tut imam Lewi nya leu api pai bak mben Israel yahagom “Disut bat jen, ma jiyok jitingou kep dihyet ba, jiyok ngon kep! Njap di ammani jide TUHAN Allah bindei ba, jinok Nide limwa nya.

¹⁰Gima rino ma jibit jide TUHAN Allah nihyet ba, jiyai mun igbit nicuk jeti nya di ditri tut bije njap di ammani hagom.”

¹¹Mpe dima ne Musa pai bak mben Israel,

¹² “Tirigi jisigon Minyei Yordan ba, juug dihip ei nite hi tu lene ma keret Simeon kin Lewi kin Yehuda kin Isakhar kin Yusuf kin Benyamin ikui ug ei Nungug Gerizim tirigi nihyet tut mun di kei di TUHAN miyai bak mben Israel tibim kwei.

¹³Lene ma keret Ruben kin Gad kin Asyer kin Zebulon kin Dan kin Naftali ikui ug ei Nungug Ebal tirigi nihyet nisigionti tibim kwei.

¹⁴Suar keret Lewi nya iba ighyet sindem bitri tut nisimbot dati nya di bram dini lene suar mben Israel ibuhup ‘Igbit ri.’

¹⁵ Suar keret Lewi nya itri tut ‘Ma TUHAN sigion yo di iba tig kin biei kin ngkimom nitu bibon kwar ba, ikuk yok bak niku lewo TUHAN ningon mpo tut nikuk yo bak kwarti nya!’ Lene ma limwa nya yahagom ibuhup ‘Igbit ri!’

¹⁶ ‘Ma TUHAN sigion No di kon nicig kin nipmem inyeng bi bisindui sut yok ba, iwer nikinei-kinau.’ Lene ma limwa nya yahagom ibuhup ‘Igbit ri!’

¹⁷ ‘Ma TUHAN sigion no di son-son nyen cou di ita ei hanjop niya kwas yamti di yo di ibong nittig-tta ide.’ Lene ma limwa nya yahagom ibuhup ‘Igbit ri!’

¹⁸ ‘Ma TUHAN sigion no di bindei srawir no di niyai tu.’ Lene ma limwa nya yahagom ibuhup ‘Igbit ri!’

¹⁹ ‘Ma TUHAN sigion no di pos ngkiai kin moibihi kin kibom ide mun di inyeng tak kep nya.’ Lene ma limwa nya yahagom ibuhup ‘Igbit ri!’

²⁰ ‘Ma TUHAN sigion no di yem njita tut sop di nok nicig nitnem ndrim lewo ba niyai munti dima binim kep nicigya.’ Lene ma limwa nya yahagom ibuhup ‘Igbit ri!’

²¹ ‘Ma TUHAN sigion no di cut tut mindhe.’ Lene ma limwa nya yahagom ibuhup ‘Igbit ri!’

²² ‘Ma TUHAN sigion no di yem njita tut nikwohop di ipmem gom kin nide adig-ajoi di icig gom kin ipmem gom cem a.’ Lene ma limwa nya yahagom ibuhup ‘Igbit ri!’

²³ ‘Ma TUHAN sigion no di yem njita tut nignyot a.’ Lene ma limwa nya yahagom ibuhup ‘Igbit ri!’

²⁴‘Ma TUHAN sigion no di bisinggre biyai nimai bak hiter niku.’ Lene ma limwa nya yahagom ibuhup ‘Igbit ri!’

²⁵‘Ma TUHAN sigion no di su ninda mem mitiei nibingot kep noti leu binhyepo bisinggre biyai nimai bak no di ningon ngun.’ Lene ma limwa nya yahagom ibuhup ‘Igbit ri!’

²⁶ ‘Ma TUHAN sigion no di bit TUHAN nicukti kin ningginausi nya hagom bi.’ Lene limwa nya ibuhup ‘Igbit ri!’ ”