Read Hatam NINDAT KEP TUHAN NICUKTI NYA 28 Bible Online

NINDAT KEP TUHAN NICUKTI NYA 28 - Hatam bible

NINDAT KEP TUHAN NICUKTI NYA 28

¹ “Gino jibit jide TUHAN Allah nihyet cem jiba jingon di gom bibit nicuk jeti nya di ditri tut bije njap di ammani lene Noni mibindei ba, jinok mben di inyeng jei dor njiriek mben nindigsi nya ei dihyeisi dini.

²Gino jibit jide TUHAN Allah nihyet lene Noni miyai mun di kei dini yok hagom bijeni.

³TUHAN minjei mun di kei bak jide minu ndig nya kin jide miaisi nya.

⁴TUHAN miyai gi kei bije apino mijibon jimunggwom bat nya imang bibor ba, dihyei mingat ningat mpung bipias hagau mem jeni ba, sapi kin kambir kin domba jide nya nimangti mikum eisi bibor cem.

⁵TUHAN minjei mun di kei bak jide gandum di jikos bijike kin yam kin njita di jiba gandum bingei dima cem.

⁶TUHAN minjei mun di kei bak jeni tug hon jide midyai di jibrim jingkek tut nya hagom.

⁷Gino jide siceu nya ihwen je lene TUHAN mibindei timek yok. Yoni mibrim imig sindem bibor kwei leu binhyepo ihwen je sindem noro minang hanyen sinsiou leu joho bei.

⁸Jide TUHAN Allah minjei mun di kei bak jeni tug hon jide midyai di jibrim jingkek tut nya lene mibindei ba, jide gudan mpung tut gandum cem. Noni miyai gi kei bije ei minu di Noni yai bije.

⁹Gino jibit jide TUHAN Allah nihyet bijiyai igbit nicuk jeti nya hagom lene Noni mibindei ba, jinok Nongkom Nide limwa nya bit leu nok gi po preu ei mem je pima tu.

¹⁰Apino ngkiai nya yahagom ei dihyeisi dini mingat brei bipia jeni ne mben gom ngat di TUHAN dimig ei mem Nonti rin leu api inghuisi mimpig sut je.

¹¹TUHAN miyai munggwom mang-mang bijeni. Mindhe-ndhe nihyen kep jide nya mimang lene jide miai mingat ningat di mpung bipias hagau ei minu di TUHAN preu ei mem jidigup bat-jidigai bat nya bipia miyai bijeni.

¹²TUHAN mibindei but biget bit nijam kwei leu biget nibousi di mpung bipias hagau ei mpia-bbed him. Noni miyai gi kei bije tug hon jide midyai di jibrim jingkek tut nya hagom apino mijicom ningwam bak ngkiai nya imang noro jeni mijidahat ningwam hanyen leu yok kan bi.

¹³Jide TUHAN Allah mikon jinyeng bijinok nibou di bie tut mben nindigsi nya lene Noni mikuk je bijinok ide limwa di ibit ighyet he bi. Gino jiba jingon di gom bibit TUHAN nicuk jeti nya di ditri tut bije njap di ammani hagom lene jide mun di jimati nya mikum eisi nindig bibor apino mijibong kei mijigwam kei cem. Ba, mijicut bihigom ba, juhui mbum cem bi sren.

¹⁴Noro ma jiba puig hiter di nijit bi bibbwe ser TUHAN nicukti nya dima au. Ma jikuk je bak nung nya ba, jiyai jingon gom bak cem au.”

¹⁵“Noro gino jibit jide TUHAN Allah nihyet ba, jiba jingon di gom bibit nicuk jeti nya kin nikos tutti nya di diyai bije njap di ammani hagom bi lene nisigionti dini yok hagom micut igkep jeni.

¹⁶TUHAN misigion jide minu ndig nya kin jide miaisi nya cem.

¹⁷TUHAN misigion gandum di jikos bijike kin yam kin gandum di jingei nok njita dima cem.

¹⁸TUHAN misigion jeni apino mijibon jimunggwom bat nya gom-gom he ba, ningat di ntun dihyei jide him nya bitut sapi kin kambir kin domba jide nya poi mien he.

¹⁹TUHAN misigion jide midyai di jibrim jingkek tut nya hagom.

²⁰Gino jibon sisar di kinei ba, jirok TUHAN ei cem lene mun di buhun micut igkep je ba, nibou buweisi mikieng kep je kin jide midyai hagom nggruk bibor cem. Apino hagom mibindei sar jeni bibor hak ei nijam di jei bi.

²¹Ninggwenti nya ninyeng hi gom hi gom micut igkep jeni kikau apino bit bon tungwa hi bong ei minu di jikieng kep dima kan bi.

²²TUHAN mibindei ba, ninggwenti di kieng kep tungwatu nya yahagom micut igkep jeni ba, jidwoi-dwoi nyen ba, jingkek dut bibor cem. Noni mibindei ba, ngei ndung cut bihwen mun di hagom bi ngak-cai cem hou di bindei ngkiong mun nyeng hagom mihwen jide gandum di ningat ntun him tu hagom bikinei bingwig. Mun di buhun bibor dima yok micut igkep je kikau ba, jibisar kep.

²³Biget mibut bi lene gima mibindei ba, jide dihyei ninjek dip mingkiem noyam kin ngkimom nitu.

²⁴TUHAN mikes biget minyei di but kwei bi noro mikes niyap kin iggum di mbras noyam kin biget bibihwen je kikau ba, jibisar kep.

²⁵Gino jibit jide TUHAN Allah nicuk jeti nya bi lene Noni mibindei ba, jide siceu nya ibindei timek jeni. Mijibrim jimig sindem bibor ug ndam yok leu binhyepo jicut igkep yok noro mijinang sinsiou leu yoho bei. Tungwatu dihyeisi dini hagom di ingat mun di buhun di cut igkep je dima midigit tut.

²⁶Tirigi jimai drek dip lene jide nimbiam minok njita mem ha nya kin mindhe di niten-pos nya lene hi di mijji mindhe-ndhe dima yok bi.

²⁷TUHAN miba buhwei nya bihwen jeni noyam kin gi po bibon bak mben Mesir pima tu. Bras di ullen kin kudis mikieng kep jingkek dip lo, obat hi mem bi.

²⁸TUHAN mibindei ba, mirei kibou je ba, jiyai tu bijingon tai-tai bou cem.

²⁹Mijitibap-tibap nyen mem mpia huk pijum noyam kin yo di igyai tu nya noro mijittau kep puig bi. Mun nyeng di jibrim jingkek tut nya hagom micut hacan. Tungwatu nya mico kep je binggek jide minu cem mipos mun di jinyeng tut nya kikau jiyaijo ningwig honti lo, hi di mimpu je bi.

³⁰Gino jibit jide TUHAN Allah nihyet bi lene mun nyeng dini yok micut igkep jeni. Mijiyok wab kep sop hi noro hiter miwak noni nok nitnem. Mijiwin ig noro mijibong ei ig dimati bi. Mijita ba anggur kioi ei jide miai anggur nghousi noro mijipuk ningat di ntun him bijiyem bi.

³¹Hiter mibui jide sapi nya bou jiyai him noro mijiyem ninghui bi. Hiter mimbrai jide keledai nya bimbut tut bou jiyai him noro mijiya jiyati bijitou kep he leu api yo dima mitug keledai dima yok hanyen bije bi. Hiter mimbrai jide domba nya bigyai bak jide siceu nya lene hi di mimpu je bi.

³²Ngkiai nya mikat jimunggwom bat nya biyuubon yok nok awak bou jiyai him. Mbro nok gino jiyai dut drek dip gi jinggok jimunggwom bat nya ikwei hanyenti dima bikwop njap-njap lo, mijinggok yok mikui-kausi he. Lewo yoni mingkwei hanyen kwei bi sren.

³³Ngkiai nya mikwei mbrai jide njita ngat di jicom jahanggwap tut bibor nya lene jenti mijitug ndei mun nyeng hi bi. Gi jitug ndei rino nico kep je ninghig-niker kin niba nisibut biyai je cem.

³⁴Mirei mibon je drek dip mun di buhun tak je dima.

³⁵TUHAN mibindei ba, bras yem jimig ba, bit bon jikei hanyen kan bi. Buhwei cem micom jingkek dip leu jimig jou kikau ug bipek jibou nggram him.

³⁶TUHAN micom jeni kin jide nibou ndig ug ei jingkiaisi di jeni kin jidigup bat-jidigai bat nya ikan tut bi. Ei sirima lene ngkiai nya mikuk je nok awak mem nung di ikuk yok bak di iba biei kin tig bibon.

³⁷Mben hiter di ingat je ei mpia di TUHAN bindei ntek gimahap je ug eisi midigit tut mun di cut igkep je. Yoni miba ighyet bicig-cig nyen je ba, ibipa tut je cem.

³⁸Mijindim ningan mang noro jitug ndei ningat poi mien he lewo hai ceng nya migyem njita kioi jide nya hagom bingwig.

³⁹Mijita ba anggur kioi ei jide miai anggur nghousi ba, jinyohou hagom nok gi kei noro mijipuk ningat bijidut ningei cem bi. Lewo auu meta nya migyem ba anggur dima yok bingwig.

⁴⁰Biei zaitun mehei ei minu dima nisurti-nipekti noro ningat nya millet bingwig apino mijitug ndei nide mini zaitun hi bi.

⁴¹Mijibon jimunggwom pinai nya kin sop nya cem noro jide siceu nya mikat yok tirigi ikon mbrap bit je lene miyuubon yok nok awak ba, isar bihigom leu je.

⁴²Hai ceng nya mikwei yem biei ngat kin nimeng hagom kin njita miaisi hagom cem bingwig leu je.

⁴³Ngkiai di ibong ei jitimieisi inyeng mikui bibor noro jinyeng micut nimo jug.

⁴⁴Yoni mima mitiei nok gi dem mem gima igyai nok ningwam bak jeni. Noro jide mitiei minok gi dem mem gima jiyai nok ningwam bak yoni bi. Apino inyeng mitak kep je.

⁴⁵Mun di buhun dima yok hagom micut igkep je lene miwaisi kep je kikau ba, juug bisar ug. Lewo jibit jide TUHAN Allah nihyet ba, jibon igbit niggai serti nya di Noni tri tut bije bi.

⁴⁶Mun di buhun dima yok mibindo tut hukum di Allah kes ei jeni kin jide nintun him di bram yam nya dip bijo ninno bijo kikau ri.

⁴⁷Jide TUHAN Allah ba nisinati hagom binjei mun di kei bak jeni tu. Noro jiba jingon di llei kin jingon di nggei-hi-nggei bigikuk je bak Noni bi.

⁴⁸Gima rino suar jikuk je bak siceu di TUHAN mipinak yok kwei mem gima ihwen bit je. Mijicut ei ninggumti kin ninggobiauti kin ninda ngwakti cem ba, juhui mbum nindig bibor. TUHAN[13] mico kep jeni sindem kikau ba, jibisar.

⁴⁹TUHAN mijem mben gom di jingon hukti tut ighyet bi nya kwei leu minu nohon keti mem gima ihwen jeni. Yoni midwop kwei bikam jeni noyam kin ha krubrigya.

⁵⁰Yoni isibut bibor bingondut ndigpoi koi nya kin munggwom nya bi.

⁵¹Yoni mibindei sar jide mindhe-ndhe nihyen kep nya kin njita ngat ei jide miasi nya hagom bisar bingwig. Lene yoni mibet gandum kin ba anggur ngei kin mini zaitun kin sapi nya kin kambir nya kin domba nya cem hi ei mem je bi leu api jibimai jinggum.

⁵²Yoni minjei siceu bihwen bikwop minu ndig di jo ei minu di jide TUHAN Allah miyai bije hagom apino ngug tig di jo nai di jibindei sindem di jiba jingon com nya cem mitti hak.

⁵³Tirigi jide siceu igyon ttai jide minu ndig nya lene ninggum mihwen je apino jingon cun bijibui jenti jimunggwom bat nya di jide TUHAN Allah yai bije nok mikwau bijiyem.

⁵⁴Nok gima cem andigpoi di ninyeng jei di ningon singat cem ningon ndei ninggum bi ei nijam di igyon ttai minu ndig dima ser apino bui nonti nimunggwom bat nya nok mikwau biyem kep ninggum lewo njita hi jo bi. Lene noni mikwas mikwau dima poi mien tut nide adig-ajoi hi kin nitnem di ningon ngakei kin nimunggwom bat nindigsi nya cem bi.

⁵⁵

⁵⁶ Nok gima cem sindig di ninyeng jei di ningon singat di nyeng bibor ba, gimbun mbut nimig kan bi dima cem ningon ndei ninggum bi biyai nok gima. Ninggum mihwen sop dima mem nijam di igyon ttai minu ndig dima ser apino bui ningwoi nide di sindi srek bitut niban cem nok mikwau ba, yem niku. Lene noni mikwas mikwau dima poi mien tut nijjep di ningon ngakei kin nimunggwom bat nindigsi nya cem bi.

⁵⁷

⁵⁸Gino jiba jingon di gom bibit jide TUHAN Allah ningginau jeti nya di jo ei srat diniti ba, jinggei sut jide TUHAN Allah di ninyeng jei bibor bijinga leu tut Nide nisindem biborti cem bi,

⁵⁹lene Noni miba ninggwenti di bit bon obat di sindem bibor bindei bijikei hanyen kan bi kin nsuwer ajar di ug hon nohonti bi ba, bihwen je kin jide nintun him di bram yam nya cem.

⁶⁰Ninggwenti di buhun bibor nya di jingat bou jiyai him ei minu Mesir pima micut igkep je lene mijikei hanyen kan bi sren.

⁶¹TUHAN mibindei ba, ninggwenti nya ninyeng mang bibor kin nsuwer ajar di ipas kep ei Srat TUHAN Nikos Tutti Nya dini bi micut igkep je. Leu api ninggwenti dima yok mibindei sar jeni.

⁶²Mbro nok gino jimangti midem kep ham mpia-bbed him lo, jibou poi he rima ingwes ngun. Lewo jigibit jide TUHAN Allah bi.

⁶³TUHAN mijoi sut bindei sar jeni bicok tut jeni ningwig noyam kin gi nipou po Noni joi sut yai nibong kei ningwam kei bak jeni bikum ei jimangtiti pima. Noni mitiba jeni hanyen leu minu di jei bi mijiyai bijiyati bijikieng kep dima.

⁶⁴TUHAN mibindei ntek gimahap je ug ei ngkiai nya ikieti ei dihyei nisurti-nipekti. Ei sirima lene mijikuk je bak nung nya di iba biei kin tig bibon. Kwar dima ne gi hi di jigikan tut bi rin ba, jidigup bat-jidigai bat nya cem igikan tut bi.

⁶⁵Bit bon mijuum nibong nyahanti ei mben dima yok ikieti kan bi. Lene mijijem mpia ttou nsi hi bou je nok jide bi. TUHAN mibindei ba, jingon bos-bos nyen ba, jingon cut leu bijingon kinei-kinau ba, jingon cut leu cem.

⁶⁶Mijuum kep mun di buhun di hwen bit jide niyaijoti kikau ba, jigwam ningon di digitti kin nittin tut nimaiti bikwop mmun-njap.

⁶⁷Mpe di jiba jiyai nghuisi jik kep mun nyeng hi lene jingon mipri ndei bijimai lewo jittin tut. Bikwop njap tekti lene mijiyok jingon mem mmun di minggai kep je. Leu api bikwop mmun lene mijiyok jingon mem njap tekti hanyen bu.

⁶⁸Mbro nok gino TUHAN pai[14] bipia ma jingkwei hanyen ug ei minu Mesir au lo, Noni miba kibar minyei bipinak je hanyen ug ei minu dima. Mijitri jenti nok awak mem jide siceu nya ei sirima noro hi di pek jeni bi.”