Read Hatam NINDAT KEP TUHAN NICUKTI NYA 29 Bible Online

NINDAT KEP TUHAN NICUKTI NYA 29 - Hatam bible

NINDAT KEP TUHAN NICUKTI NYA 29

¹Gini ne nicuk yokti nya di Musa tri tut bak mben Israel ei minu Moab leu binhyepo igyai hagom bit leu TUHAN nipreu ei mem yoti ri. Gi preu dini bikum ei gi preu di TUHAN bon bit yok ei Nungug Sinai.

²Lene Musa nduk mben Israel yahagom kwei ba, idem yam leu api pai biyok “Jingat mun di TUHAN bibon bak nibou ndig mben Mesir kin nide nibou di igya kui noni kin nide minu titut yam bou jiyai him tu.

³Jingat mun di buhun bibor di cut igkep yok kin mun mindur nya kin bindo di nindig bibor di TUHAN bibon nya tu.

⁴Noro Noni sindui sut bijingon hukti tut mun di hagom di pek kep mem je dima kwei bipek ammani kep bigyo.

⁵TUHAN bie tut je bijimbut jimig ei iggum ndigsi ei nijam ari bingwam ningot bitai noro sinsun jide kin srop jide bitun-ta ei sirima bi sren.

⁶Roti hi mem njita kin ba anggur ngei kin mun ngei di pu je mem gima jidut cem hi jo bije bi noro TUHAN yai mun di jisuar nya hagom bijeni leu binhyepo jikan kep bipia Noni ne jide TUHAN Allah ri.

⁷ Lene mpe di nyeni ikwei krau mpia dini lene Nibou Ndig Sihon leu Hesybon kin Nibou Ndig Og leu minu Basan injei siceu kwei bigya kep bihwen nyeni noro nyeni ibindei timek yok.

⁸ Ba, ipos yo ide minu leu yok bikwas tut keret Ruben kin keret Gad kin keret Manasye nite hi.

⁹Gima rino ma jiba jingon di gom bibit gi preu dini titut yam leu binhyepo ningat di kei mintun midyai di jibrim jingkek tut him.

¹⁰Njap di ammani jahagom jiya ei jide TUHAN Noho bei. Nok nibou mben nya kin nibou di inyeng jei nya kin nibou tentara nya kin pinai nya yahagom,

¹¹kin sop nya kin munggwom nya yahagom kin ngkiai di ibong timiei ei jikieti di irop biei kin gi itau minyei mem jeni.

¹²Jide TUHAN Allah bon gi preu dini bit jeni ba, jahagom jidem yam leu binhyepo juhum kep gi preu dini lene jibibit gi preu nicuk jeti nya.

¹³Njap di ammani TUHAN simbot dat hanyen bipia jeni ne Nide limwa nya rin tug hon gi preu dini. Noni ne jide Allah rin dem igbit nipreu kep jeni kin jidigup bat-jidigai bat di Abraham kin Ishak kin Yakub nyati.

¹⁴TUHAN bon gi preu kin nicukti nya dini hagom mem jeni he bi.

¹⁵Noro mem tungwagom-gom di ya ei mpia dini ei ide TUHAN Allah Noho bei mem njap di ammani kin ide nintun him di bram yam nya cem.”

¹⁶“No jiyok ngon kep mun di pek kep mem jiyaijoti ei minu Mesir kin jimbutti tirigi po ibikwam ug ei minu di mben hiter nya ide pima cem yo e.

¹⁷Jingat mben dima ide kwar di kinei bibor di ikuk yok bak di nyeni ingat lo, igyai kou di iba biei kin tig kin perak kin mas bibon nya.

¹⁸ Gima rino ma jiya ser jingonti leu binhyepo tungwagom leu jikieti nok pinai hi e, he sop hi e, he ig bei nsi nya gom e, he mben gom e, njap di ammani ma ingkwei leu ide TUHAN Allah ba, ikuk yok bak ngkiai nya ide nung nya au. Niyai munti dima noyam kin biei nigau di hei ba, wer mun di iba inda ta di mpo lene wer krisieu di mpo cem ntun him.

¹⁹Gino tungwa hi leu jikieti miap tut TUHAN nicukti di buhun bibor dima lene ma kan bipia mbro nok gino rom no kep nonti ningon kanti lo, mun di pek kep mem niyaijoti nya hagom mimbut nok gi kei mem noni. Noni mikan nok gima au. Mun dima mibindei sar jeni bitut yo di ingon rom kin yo di ingon sren cem jahagom.

²⁰TUHAN mikos ser no dima niyai munti di kinei dima bi. Noro noni mitug ndei TUHAN nigga biborti di kui mpia ba, mun nyeng di buhun bibor di ipas kep ei srat diniti micut igkep noni kikau bibou TUHAN icok tut noni bihigom ug e.

²¹TUHAN mibindei sar noni nok bindo mem mben Israel yahagom lene mikes hukum tug hon nisigionti di indat kep ei gi preu di ipas kep ei Srat TUHAN Nikos Tutti Nyati dini ei noni dip.

²²Ei nijam di nidipti bu lene jide nintun him di bram yam nya kin ngkiai nya leu minu ting nya mingat mun di buhun dima yok kin ninghuisi wei di TUHAN bindei bihwen jide minu cem.

²³ Jide miaisi nya hagom mporo wer iggum ndigsi di belerang kin nsim ut kep. Dem mem ita mun eisi bi lene minta cem hei ei sirima bi. Jide minu midem kep minu ndig Sodom Gomora nya kin Adma Zeboim nya di TUHAN bindei sar tirigi nigga biborti cig-cai.

²⁴Lene tungwatu dihyeisi dini hagom mihig ser yam ‘Nggon rino TUHAN yai nok gima tut yo ide minu dima i? Mindei ribindei di Noni gga bibor nok gima i?’

²⁵Lene nibuhupti pai nok gini ‘Lewo yoni ipigau idigup bat-idigai bat nya ide TUHAN Allah de gi preu di Noni bon bit yoni mpe di Noni buwak yok kwei leu minu Mesir.

²⁶Yoni yuubon yonti nok awak mem nung di ikuk yok bak gi nipou bi sren nya. TUHAN ggai ser yok bipai “Ma jikuk je bak nung dima au.”

²⁷Gima rino TUHAN gga Nide limwa nya apino bindei ba, mun di buhun bibor nya di ipas kep ei srat diniti cut igkep ide minu hagom.

²⁸TUHAN nigga biborti kum eisi nindig bibor. Lene ba nigga biborti dima bohom mben Israel leu itimieisi ba, com yok nok awak ug ei ingkiaisi apino ingat rin ei sirima kikau kwei bipek ammani kep.’

²⁹Ide TUHAN Allah ku mimun tut mun nyeng poi noro Noni ndo Nikos Tutti Nya bak nyeni tu. Gima rino suar nyeni kin ide nintun him yamti di bram yam nya ibit nihyet bijo ninno bijo kikau hak ug.”