Read Hatam NINDAT KEP TUHAN NICUKTI NYA 30 Bible Online

NINDAT KEP TUHAN NICUKTI NYA 30 - Hatam bible

NINDAT KEP TUHAN NICUKTI NYA 30

¹“Nogindini mibon nituti mem jihig jingon eisi. Jijoi sut niyai gi kei e, he jijoi sut nisigion jeti nok gi dipingok je tut e? Gino mun di buhun pima hagom cut igkep je apino jibong jingkiaisi ei minu di TUHAN di nok jide Allah com je eisi ei nidipti bu nya lene mijiyok ngon kep puig can dini di dindo bije.

²Gino jeni kin jide nintun him yamti di bram yam nya jikwei kuk je hanyen bak TUHAN di nok jide Allah bijiba jingon titut bibit nicuk jeti nya di ditri tut bije njap di ammani lene,

³TUHAN di nok jide Allah mingondut je. Noni minduk je hanyen kwei leu jingkiaisi di Noni com je eisi leu api mibindei ba, jibong kei jigwam kei hanyen.

⁴Mbro nok gino TUHAN di nok jide Allah com je kikau ug ei minu nohon keti lo, Noni minduk je hanyen kwei.

⁵Lene mijikieng kep dihyei hanjop nsi po jidigup bat-jidigai bat nya ibong ser pima. Lene Noni mibindei ba, jibong kei jigwam kei apino mijidigek kep mpia nindig bibor dor njiriek jidigup bat-jidigai bat nya imangti.

⁶TUHAN di nok jide Allah mibindei ba, jeni kin jide nintun him yamti di bram yam nya jingon sren leu binhyepo jiba jingon titut bingon ngakei Noni apino mijibong ser minu dima kikau.

⁷Noni micug nisigion jeti nya pima hagom hanyen leu je lene mikes hagom ei jide siceu nya di ingon mpo tut je ba, ico kep je dip.

⁸Mpe dima ne mijibit nihyet kin nicuk jeti nya di ditri tut bije njap di ammani cem hagom hanyen bu ri.

⁹TUHAN di nok jide Allah mibindei ba, jide midyai nya hagom kei bibor kei ba, mijidigek kep mpia bijihyen kep jide mindhe-ndhe nya mang bibor kin jide beisi mingat ningat nindig bibor cem. Noni mibindei ba, jibong kei jigwam kei lewo Noni joi sut je bit leu nok gi po Noni joi sut jidigup bat-jidigai bat nya pima.

¹⁰Noro suar jibit nihyet ba, jiyok ngon kep nicuk jeti nya di dipas kep ei Nide srat nicukti hagom. Suar jiba jingon titut bikwei hanyen ndam Noni.

¹¹Nicuk jeti nya di ditri tut bije njap di ammani nggruk bibor ba, jo ting bibor ba,

¹² jo anai ei mpia-bbed him cem bi. Jihig yam ‘Tou rikui ug ei mpia-bbed him biyai nicukti nya kwei mem je leu binhyepo jimiap nihyet ba, jibit nihyet i?’

¹³Nicuk jeti dima jo minu ting ei muk ngeisi nite dima ug cem bi. Jihig yam ‘Tou sigon muk ngeisi biyai nicukti nya kwei mem je leu binhyepo jimiap nihyet ba, jibit nihyet i?’

¹⁴Ma jihig yam nok gima au. Lewo nicuk jeti nya jo dideu bibor ei jibou ngwakti kin juhui him cem. Gima rino krop kei mem jibit hagom nok gi kei.

¹⁵Njap di ammani dibon nituti mem gima jima gi kei e, he jima gi kinei e? Mem gima jima niyaijo e, he jima nimai e?

¹⁶Dicuk je njap di ammani leu binhyepo jingon ngakei TUHAN di nok jide Allah ba, jibit nihyet bijiyok ngon kep nicuk jeti nya leu api mijibong kei mijigwam kei bijidigek kep mpia cem. TUHAN di nok jide Allah miyai gi kei bije ei dihyei hanjop nsi di jei bi mijikieng kep.

¹⁷Ne gino jibit nihyet bi ba, jisem tut Noni bijisindui sut ngkiai nya ide nung nya bijikuk je bak bit yok cem,

¹⁸lene disok kep je bipia TUHAN micok tut je bijingwig. Mijibong jei bibor ei dihyei hanjop nsi di sindi mijiyati ei Minyei Yordan nite dima ug bi.

¹⁹Nogindini dibon nituti mem gima jima niyaijo e, he jima nimai e? Nituti mem gima jima gi kei e, he jima nisigion jeti e? Njap di ammani dihig mpia-bbed him kin dihyeisi dini ikwei bingat jide nikos tutti bou igyai him. Gima rino ma jikos tut bipia jima niyaijo.

²⁰ Ma jingon ngakei TUHAN di nok jide Allah ba, jibit nihyet ba, jingon gom tut Noni cem apino jeni kin jide nintun him yamti di bram yam nya mijibong kei mijigwam kei mem nijam di jei bibor ei minu di Noni preu ei mem jidigup bat-jidigai bat di Abraham kin Ishak kin Yakub nya tu.”