Read Hatam NINDAT KEP TUHAN NICUKTI NYA 32 Bible Online

NINDAT KEP TUHAN NICUKTI NYA 32 - Hatam bible

NINDAT KEP TUHAN NICUKTI NYA 32

¹“Mpia-bbed him e, ma amiap mun di tibim ei duhui him. Dihyeisi dini e, ma angig atingou mem dihyet.

²Dipingok jeti nya midem kep nok mpia di but leu api minok nggou di kieng kep dihyei ninjek dip. Dihyet rinok biget di mbras mem njita kioi binok mpia ngkoi mem mintu-minta cem.

³Dikon TUHAN ninyeng leu api Nide limwa nya mipui sut Nide nisindemti!

⁴TUHAN rinok No di sindem di ya srak ko hagau je. Noni kei-kau-kei ba, ningon sren-srau cem. No di ninyeng tak kep je ningon gom ba, bit bon Noni ris mun kan bi. Niyai munti nya hagom kei bibor kei lewo ningon mang bi.

⁵Noro jingon gom tut Noni ba, dem mem Noni hig je nok Nide limwa nya bi. Lewo jinok mben di ibon sisar di kinei bibor ba, iris mun cem.

⁶Je di jinok mben di ingon mbum ba, jingkek ndok e, dem mem gima jibibon TUHAN nok gima e? Noni ne jicig kin No di pai tes je cem rin ba, bibon jeni nok mben di bon ninyenga.

⁷Ma jiyok ngon kep nijam timiei kin nijam pung gi mimbrek ngan tu nya. Ma jihig ser jicig bat nya tut mun di pek kep ei nijam dima. Ma jihig ser andig-ndau nya tut mun di pek kep mem yok.

⁸ Tirigi po No Di Ninyeng Jei kwas dihyei hanjop nsi nya leu yam pima lene Noni pek hanjop nsi bibikwop mben nya hagom. Lene Noni sindui sut mben hi gom hi gom ikuk yok bak ide kwar nya.

⁹Noro Noni dimig Yakub de nintun him yamti di bram yam nya ba, inok Nide limwa nya.

¹⁰Noni tau kep yok tirigi imbut-mbut nyen ei iggum ndigsi di kinei bibor ba, hou nindig bibor kui yokti ei sirima. Lene Noni ya srak ko hagau yok binyohou yok nok Nide limwa nya.

¹¹Dem kep nok hacam krubri di ngginau nimien nya tut notou idwop-dwop nyen leu api teu yok nyahan ei ninyehei dip tirigi icut bimba kan bi.

¹²TUHAN Nongkom bie tut Nide limwa nya lo, kwar di ikuk yok bak hi mpu yok bi.

¹³Noni sindui sut yoni inyeng tak kep nungug him nya ba, igyem njita di hei bidem susti leu api idut ahwei lon ningei di igyai leu hak mihyeti nya ba, ide biei zaitun ngat ningat nindig bibor ei tig bou-bousi.

¹⁴Yoni idut sapi kin kambir do ngei nindig bibor ba, ide domba kin kambir kin sapi nya hagom pap-nap kei. Ide gandum kin ba anggur ningei hagom kei bibor kei.

¹⁵TUHAN de limwa nya inyeng tut mun nyeng hagom noro inok yo di yaham imbuk igkei kep Noni. Imig ngon nindig ba, inghop mpung tut njita cem noro ikes Allah di pai tes yok ei ba, ikou sut No di teu yok di ingwes ngun.

¹⁶Gi ikuk yok bak kwar nya bindei ba, TUHAN ibou dut ser yok. Gi icut ei sisarti bindei ba, ningon sibui sut yok.

¹⁷ Yoni ibui ide mindhe-ndhe nya bindig kep hum ei nimbar hum dokti bak ninnei rom nya kin kwar di ikuk yok bak nya di ingon kiowi tut kin nung di nijep nya di idigup bat-idigai bat nya ikuk yok bak bi sren tu.

¹⁸Yoni iba ingha bak No di sindem bibor di teu yok bingwes ngun ba, ingon prion ser ide Allah di yai niyaijo biyok tu.

¹⁹Tirigi TUHAN ngat gini hagom tu lene ningon sibui sut yok leu api ba ningha bak imunggwom bat nya.

²⁰Bipai ‘Mbro nok gino dingat igbit mun di mipek kep mem yok ei nidipti bu lo, midimpu yok bi sren. Lewo ingkek ndok ba, ingon gom tut Da bi.

²¹ Yoni ribindei dino dingon sibui sut ide kwar di ikuk yok bak nya lewo mun di ikuk yok bak dima yok hagom nok mun di igbit bi. Gima rino midiba mben hiter di nok mben di mungkun bi bidibindei ba, Ditde limwa nya igga bibor. Midiba mben hiter di ingon mbum bidibindei ba, Ditde limwa nya ibou dut bibor.

²²Dingon di sibui sut yok micig-cai dem kep nok hum njeng biyem dihyeisi kikau ug bipek gumihyep nimai. Hum dima miyem dihyei kin mun di joti nya hagom ba, yem nungug kikau nitriti nya.

²³Midibindei ba, mun di buhun mang bibor micut igkep yok bijo ninno bijo kikau leu api midiprindei yok kikau bibou Ditde tibor nya ngwig ug e.

²⁴Yoni mitug ndei nimai tug hon ninggum di hwen yok kin ingkek di dut kin nsuwer mbrei di hwen yok. Midisindui sut mindhe di niten-pos nya kin wou piet nya biyaham yahagom bingwig.

²⁵Ide siceu nya mihwen yok bingwig kak simpak ba, mun di buhun bibor micut igkep yok ei ide ig ba, ide pinjoi pilei nya kin sop pilei nya imai bingwig lene munggwom ngwoi nya kin andig-ndau nya cem misar bingwig.

²⁶Dibungwam mem gima dihwen yahagom bimai bingwig ser nhyema hiter igyok ngon kep yok bu bi.

²⁷Noro dikou sut gima ide siceu nya inggei sut yonti bikan bipia yonti rino ico kep Ditde limwa nya bingwig a.’ Lewo Da di TUHAN ridibindei ba, Ditde limwa nya icut bak ide siceu nya tu.

²⁸Mben Israel ne mben di ingon mbum ba, ingon ki bi ri.

²⁹Mun di bindei dino icut bak ide siceu nya jo nibreisi mem yok bi. Ingon kiowi tut mun di cut igkep yok tu.

³⁰Nggon rino ibou sribu gom icut bak ide siceu gom ngat i? Nggon rino ibou sribu simnai icut bak ide siceu nya ibou can he i? Lewo TUHAN di nok ide Allah kes yok ei ba, No di sindem bibor tri yok bak ide siceu nya tu.

³¹mben Israel ide siceu nya ikan tut bipia yonti ide kwar di ikuk yok bak nya sindem ba, noyam kin TUHAN di nok mben Israel ide Allah di sindem bibor bi.

³²Yo dima imbuk bibor dem kep nok mben Sodom kin mben Gomora. Inok ba anggur di mpo-mpam di ngat ningat di bindei nimai,

³³kin ba anggur ningei di bindei nimai dem kep nok wou piet di ham tungwatu nya.

³⁴TUHAN yok ngon kep notou mben Israel ide siceu nya ibibon yok ba, Noni bet ningon ei mem nikwesti tirigi Noni mikes hukum ei yok dip.

³⁵ Noni mibirop hanyen biyok tug hon hukum di Noni mikes ei yok dip. Jei bi lene yoni misar bingwig. Ide njap ningwig honti dideu kwei su.

³⁶ TUHAN teu Nide limwa nya tirigi Noni ngat bipia isindem bi. Noni ngondut Nide awak nya tirigi Noni ngat bipia inghuisi jet.

³⁷Lene Noni mihig ser Nide limwa nya ‘Nung nya di isindem po jiba jingon com pima yo rigitou i?’

³⁸Lewo kwar di ikuk yok bak dima yok igyem mindhe-ndhe di jibui mem yok nimmau ba, idut ba anggur ningei di juhug mem yok. Nogindini ma ikwei mpu je ba, idor kwei biteu je leu.

³⁹Jingat i! Dani ne Allah Di Nijit ri. Allah hiter hi bi lewo Dangkom ngat he rino Allah. Dihwen tungwatu nya ba, imai. Diwin nimai hanyen bidibindei ba, tungwatu nya ibok leu api ibokti dima jut hanyen ba, bit bon hi bigen ser diyai munti nya kan bi.

⁴⁰Dani ne Allah di niyaijo rin ba, dikon dinda bideheng tut tug hon dinyeng bipia,

⁴¹midisien Ditde simeda di ninjeng srei leu binhyepo dikos tutti nya hagom sren-srau. Midibirop hanyen bak Ditde siceu nya leu api midikes hukum ei yo di ingon mpo tut Da dip.

⁴²Inggrom misilipti Ditde tibor lene midiba Ditde simeda bihwen yo di ibigen ser Da yahagom ba, imai bingwig. Midisindui sut yok ba, bihi ihwen bit Da bi. Yo di ibok-ba kin yo di dipos yok tu nya yahagom mitug ndei nimai.

⁴³ Je di ngkiai nya e, ma jinggei sut TUHAN De limwa nya. Noni kes hukum ei tungwa tou rino hwen Nide limwa nya dip. Noni birop hanyen bak Nide siceu nya noro kos ser Nide limwa nya ide sisar.”

⁴⁴Musa kin Yosua indat kep doia dini ei mben Israel yoho bei ba, yahagom imiap tu.

⁴⁵Tirigi Musa kes nihyet hon biba TUHAN nicuk yokti nya bingginau mben Israel tu lene,

⁴⁶noni pai biyok “Suar jibit dicuk jeti di ditri tut bije njap di ammani hagom. Ma jingginau jimunggwom bat nya tut TUHAN nicuk jeti nya hagom leu binhyepo iba ingon gom bibit nihyet.

⁴⁷Nicuk jeti nya dima nok nihyet bu tan bi. Noro hagom mibindei ba, jiyaijo. Gino jibit hagom lene mijiyaijo jei bibor ei minu di sindi mijicoi ba, jiyai bijiyati ei Minyei Yordan nite dima ug.”

⁴⁸ Lene njap gom dima TUHAN pai bak Musa,

⁴⁹“Ma aug ei Nungug Abarim ei minu Moab di birok kik Yerikho. Lene ma akui ug ei mbigdip Nebo leu api acap minu Kanaan di jei bi midiyai bak mben Israel nok ide bu.

⁵⁰Lewo ayaijo mingwig hon ei mbigdip dima ug rin bit leu nok akindig Harun niyaijo ngwig hon ei mbigdip Hor nipou su.

⁵¹Lewo jahacem jingon gom tut Da ba, jikon dinyeng ei mben Israel yoho bei bi tirigi po jingat rin ei minyei bousi Meriba di jo dideu Kades ei iggum ndigsi Zin pima.

⁵²Gima rino disindui sut nani acoi ug ei minu Kanaan di jei bi midiyai bak mben Israel dima bi. Noro ma aya minu ting ba, acap minu dima he.”