Read Hatam NINDAT KEP TUHAN NICUKTI NYA 8 Bible Online

NINDAT KEP TUHAN NICUKTI NYA 8 - Hatam bible

NINDAT KEP TUHAN NICUKTI NYA 8

¹“Ma jiba jingon gom bibit TUHAN nicuk jeti di ditri tut bije njap di ammani leu binhyepo jiyaijo ba, jimangti kum eisi ei minu di Noni preu ei mem jidigup bat-jidigai bat nya ba, jidigek kep mpia ba, jibong kei jigwam kei eisi.

²Ma jiyok ngon kep notou TUHAN di nok jide Allah bie tut je kak jimbutti di jei bibor mem ari bingwam nyatungwacan gi pini jug tu. Noni ba mun di buhun bibor bibingon je leu binhyepo kan tut jingon kanti nya bikan tut gino jibit nicuk jeti nya cem.

³ Noni sindui sut je bijinggum bibor leu api yai manna bije nok jide njita. Hon kep mpe dima nimo jug ne jeni kin jidigup bat-jidigai bat nya jiyem njita nok gima hi bi sren. Noni yai nok gima leu binhyepo bingginau je bipia tungwatu nya igyaijo tug hon njita he bi noro tug hon nihyet di tibim ei TUHAN nuhui him cem hagom.

⁴Jide sinsun jo ninno ba, rik-ta bi. Jimig cem dwoi bi sren mem ari bingwam nyatungwacan.

⁵Ma jiyok ngon kep bipia TUHAN di nok jide Allah sok kep je ba, ttem je bit leu nok no di pinai ubon nimunggwom bat nyati.

⁶Gima rino ma jiyai igbit TUHAN di nok jide Allah nicuk jeti nya hagom. Ma jiyai igbit niggai serti nya ba, jiba jibou coi mem Noni cem.

⁷Noni mibuwak je ug ei minu di nnum bibor di bon minyei nggram nya kin minyei bousi nya kin minyei di jo dihyei jo bibiam sindem bidem mbang briep nya kin nungug tou nya hagom cem.

⁸Minu dima bon miai gandum barli kin ba anggur ningat kin biei ara ningat kin biei delima ningat kin biei zaitun ningat kin ahwei lon ningei.

⁹Ei minu dima lene mijinggum ba, mijuhui mbum bu bi. Ngkimom nitu bousi jo ei hak ninsi nya lene mijitig ngkimom-tembaga ei nungug tou nya ei minu dima.

¹⁰Mpe dima ne mijiyem njita di mindei je ninyeng hagom apino mijipai sigyo hanyen bak TUHAN di nok jide Allah lewo Noni yai minu di nnum bibor dima bije tu.”

¹¹ “Ma jingon sok kep jenti ser nhyema jingon prion ser TUHAN di nok jide Allah au. Ma jingon nghen leu gima jibit nicuk jeti nya di ditri tut bije njap di ammani au.

¹²Ei nidipti bu tirigi jiyem njita ninyeng hagom bindei je cem jingot jide ig di jibongti binddong kei ba,

¹³jide mindhe-ndhe nya di jihyen kep nya kin jide perak kin mas kin ndigban nindigsi kum eisi ba, nindig bibor tu lene,

¹⁴ma jingon sok kep jenti ser nhyema jingon jei ba, jibbwe ser TUHAN di nok jide Allah au. Lewo Noni teu je bijingwes ngun leu gi jiwer awak ei minu Mesir tu.

¹⁵Lene Noni buwak je ug ei iggum ndigsi di nindig bibor ba, kinei bibor cem ba, mpia dima nok wou piet kin amai nggre nghousi. Lene Noni bindei dino minyei biam leu bor ngug mem je tirigi jingat rin ei iggum ndigsi po bon ningak-caisi pima.

¹⁶Noni yai manna di nok njita bije ei iggum ndigsi. Hon kep mpe dima nimo jug ne jidigup bat-jidigai bat nya igyem njita nok gima hi bi sren. Noni ba mun di buhun bibor bibingon je leu binhyepo bikan tut jingon kanti nya. Gima hagom nok leu binhyepo Noni miyai gi kei bije ei nidipti bu.

¹⁷Gima rino ma jikan bipia mijinyeng tut mun dima yok hagom tug hon jide nisindemti au.

¹⁸Ma jiyok ngon kep bipia TUHAN di nok jide Allah yai nisindemti bije leu binhyepo jinyeng tut ndigban. Noni yai nok lewo ningon gom tut mun po Noni preu ei mem jidigup bat-jidigai bat nya pima.

¹⁹Ma jingon prion ser TUHAN di nok jide Allah ba, jikuk je bak nung nya bijibon jenti nok awak mem nung nya cem au. Disok kep je njap di ammani bipia gino jiyai nok gima lene TUHAN mikes hukum ei je dip bijimai bijingwig.

²⁰Gino jibit TUHAN di nok jide Allah nicuk jeti nya bi lene Noni mihwen je bijingwig dem kep nok ngkiai nya di Noni hwen yok bingwig tirigi jikieng kep ide minu dima.”