Read Hatam YOHANES 1 Bible Online

YOHANES 1 - Hatam bible

YOHANES 1

¹Habiei ei nimbie him nipou tirigi Allah pai tes dihyeisi dini bigyo ne Nihyet No rinaha. Nihyet dima ningat rin bit Allah ba, noyam kin Noni cem.

²Nihyet kin Allah yahacem Yo rinaha habiei ei nimbie him.

³Allah pai tes mun di hagom tug hon Noni ba, pai tes mun nyeng gom njiriek Noni bi.

⁴Nihyet dima ne nibousi mem niyaijo nijep ri. Niyaijo nijep dima ne nipigati di piga ei tungwatu nya ingonti ri.

⁵Nipigati dima piga ei nidinditi noro bit bon nidinditi mu[1] nipigati kan bi.

⁶ Mpe dima ne Allah cuk Yohanes kwei leu api noni tri tut Allah nihyet.

⁷Ba, Yohanes kwei tri tut nipigati dima bak tungwatu nya leu binhyepo yo di imiap nihyet yahagom ingon jo kep nipigati.

⁸Yohanes ne nipigati dima rin bi noro kwei tri tut nipigati he.

⁹Nipigati dima ne nipigati di nijit rin ba, kwei ei dihyeisi dini leu binhyepo piga ei tungwatu nya yahagom ingonti.

¹⁰Nihyet No rinaha ei dihyeisi dini. Allah pai tes mun di hagom tug hon Noni noro tungwatu nya ingat igbit Noni bi.

¹¹Noni kwei ei nitimieisi noro Nide mben igya um Noni bi.

¹²Lo, tungwatu nya bihi igya um Noni leu api iba ingon com Noni. Gima rino Noni bindei ba, idem mem gima inok Allah nimunggwom bat nya.

¹³Yoni inok nimunggwom bat nya tug hon nisrek leu tungwatu nyati ba, tug hon tungwatu nya ingut kanti cem bi. Noro Allah bindei ba, igyai niyaijo nijep.

¹⁴Nihyet dima luei nitta binok tungwatu ba, kwei bong bit nye. Nyeni ingat nikei-kau-keisi di Nicig yai biNoni lewo Noni ne Nipmot nimig gom ngat ri. Nipmot singat tut nye nindig bibor ba, Nongkom ndo Allah ningat titut yam brei binye.

¹⁵Yohanes tri tut Noni bipai “No dima ri. No di dipai sut bipia Noni miya abia kep da kwei ba, ninyeng jei bibor dor njiriek da lewo No rinaha nipou tirigi dipmem srek tut da bigyo.”

¹⁶Nihyet dima nisingat tut nyeti bindei ba, Noni njei mun di kei binye sindam buug hon nohonti bi.

¹⁷Ide Tuhan yai nicukti binye tug hon Musa noro ndo nisingat tut nyeti kin Allah de ningon gomti brei binye tug hon Yesus Kristus.

¹⁸Hi ngat Allah bou niyai him bi sren. Noro Nipmot nimig gom ngat di ya kui Nicig binok gom kin Allah cem ndo Nicig brei binye.

¹⁹Nibou mben Yahudi nya ei minu ndig Yerusalem isok ighyet ei imam nya kin yo di intun Lewi him dip bak Yohanes bihig ser noni “Nani tou i?”

²⁰Yohanes buhup brei biyok “Dani ne Nibou Ndig di teu tungwatu nya biyai niyaijo nijep biyok rin bi.”

²¹ Ihig ser noni bu “Gi nok lene nani tou i? Elia e?” Noni buhup “Dani ne Elia cem bi.” Ihig ser noni mbigom bu “He nani ne Nabi di Mipbor Ngat pima rin e?”[2] Yohanes buhup “Dani ne bi.”

²²Lene ipai binoni “Gi bi ne apai igbit anyeng binye. Lewo suar ningkwei hanyen binibuhup yo di icuk nye kwei ighyet. Apai sut nanti binye i?”

²³ Yohanes buhup “Dani ne no di Nabi Yesaya pai sut ri. Noni pai, ‘Tungwagom nihyet tibim kwei leu iggum ndigsi bipai bipia ma jitin puig di sren kei mem Tuhan nimbutti.’ ”

²⁴Gima rino yo di Farisi nya icuk yok kwei,[3]

²⁵ihig ser Yohanes mbigom bu “Gino nani ne Nibou Ndig di teu tungwatu nya biyai niyaijo nijep biyok kin Elia kin Nabi di Mipbor Ngat pima cem bi ne nggon rino atur tungwatu nya ei minyeiti i?”

²⁶Yohanes buhup “Ditur tungwatu nya ei minyeiti noro No di jingat igbit bi No ya ei jikieti.

²⁷Noni ya abia kep da. Dem mem dikwek Nide srop leu nimig jou bi.”

²⁸Mun dini yok hagom pek kep mem yok ei minu mien Betania[4] ei Minyei Yordan nite dima ug ei bei mpia nipriti. Gima ne mpia ttou nsi gom di Yohanes tur tungwatu nya ei minyeiti ei ri.

²⁹Njapti kui bu ne Yohanes ngat igbit Yesus tirigi ttau kwei. Noni pai biyok “Jingat i! Domba Pmot Allah de di kos ser tungwatu dihyeisi dini ide sisar No rima!

³⁰No di dipai sut bipia ya abia kep da ba, ninyeng jei bibor dor njiriek dinyeng lewo Noni No rinaha nipou tirigi dipmem srek tut da bigyo pima ri.

³¹Nipou ne dikan tut ninyeng bi. Noro dikwei tur tungwatu nya ei minyeiti leu binhyepo dibindo Noni brei bak mben Israel.”

³²Yohanes tri tut mun di noni ngat bou niyai him bipai “Dingat Allah Ninnei di dwop juk nok hakimoi leu mpia-bbed him biteu ei Yesus dip leu api dimba hanyen ug bi.

³³Mpe dima lene dikan igbit Noni bi. Noro Allah di cuk da kwei mem gima ditur tungwatu nya ei minyeiti pai bida ‘Mporo angat Allah Ninnei di dwop juk bigwam ei tungwagom dip leu api dimba hanyen ug bi. No dima rino tur tungwatu nya ei Ninnei Gi Kwesti.’ ”

³⁴Yohanes pai biyok “Dingat mun dima yok hagom bou diyai him tu. Gima rino dipai bije bipia Noni ne Allah Nipmot ri.”

³⁵Njapti kui bu lene Yohanes kin yo di igya kui noni ibou can ingat rin ei mpia ttou nsi dima hanyen.

³⁶Tirigi Yohanes ngat Yesus di njiriek noni lene pai “Domba Pmot Allah de pima rima!”

³⁷Ibou can di igya kui Yohanes pima ikes noni ei leu bibit Yesus.

³⁸Yesus ngat yo cin di ibit Noni lene hig simber yok “Nggon rino jibit Da i?” Leu api ibuhup “Rabi e, abong ei siritou i?” (Ninyeng rabi noyam kin ninyeng guru.)

³⁹Noni buhup “Jikwei ngat.” Gima rino ibit Noni bingat igbit nibongti leu api ibit bong lewo ug ei jam bitai ba, mpia cut tu.

⁴⁰Tungwagom leu ibou can di imiap Yohanes nihyet bibit Yesus pima rino Andreas di Simon Petrus nikinjoi.

⁴¹Noni ug nggok ser nikindig Simon haninyai bipai bak “Nyeni nuum Nibou Ndig di teu tungwatu nya biyai niyaijo nijep biyok di tungwatu nya ijem ninyeng Kristus tu.”

⁴²Leu api noni buwak Simon bikwei ngat Yesus. Yesus ngig niyai kep Simon lene pai bak “Anyeng Simon ba, acig ninyeng Yona. Noro hon kep ammani kui ne ijem anyeng Kefas bu.” (Ninyeng Kefas noyam kin ninyeng Petrus ba, ndo tut nungug tigya.)

⁴³Njapti kui bu lene Yesus kos tut ningon kanti mem gima ug ei hanjop Galilea. Noni ttau kep Filipus bipai binoni “Akwei bit Da.”

⁴⁴Filipus nitimieisi leu minu mien Betsaida ba, Andreas kin Petrus ibong ei sirima.

⁴⁵Filipus ug nggok ser Natanael bipai binoni “Nyeni nuum tungwagom di Musa pas tut Noni ei Puig Yahudi nicukti ba, nabi nya cem ipas tut Noni. Ninyeng Yesus leu minu ndig Nazaret ba, nicig ninyeng Yusuf.”

⁴⁶Noro Natanael srep “Bon mun di kei hi kwei leu Nazaret e?” Filipus buhup “Akwei suug ngat i.”

⁴⁷Yesus ngat Natanael di kwei ndam Noni lene pai sut noni “Jingat i! No dini ne mben Israel ningat-ngat rin ba, niris mun bak tungwatu nya jo ei Noniti bi.”

⁴⁸Natanael buhup “Notou akan igbit tut da i?” Yesus buhup “Aponi tirigi Filipus buwak na kwei bigyo ne dingat na tirigi agwam kui biei ara dima tu.”

⁴⁹Natanael buhup “Na di Guru e, jo nibreisi bipia Nani ne Allah Nipmot ba, mben Israel ide Nibou Ndig cem ri!”

⁵⁰Yesus hig ser noni “Angon jo kep Da drek dip gi dipai sut na bipia dingat na tirigi agwam kui biei ara dima tu e? Mporo ma angat mun di bon ninyeng dor njiriek gima di mipek kep mem na bu yo!”

⁵¹ Yesus pai bu “Ma jiyok ngon kep lewo dipai nijit-jau bije bipia mijingat mpia-bbed him kau leu lene Allah de malaikati nya ikui-juk nyen biti Munggwom Tungwatu Nipmot noyam kin iti lin.”