Read Hatam YOHANES 10 Bible Online

YOHANES 10 - Hatam bible

YOHANES 10

¹“Dipai nijit bije bipia no di coi kak dimbou hui ug ei sar nsi bi noro kriau ba, gau sar ne no di nggimang kin no di sibut cem ri.

²No di coi kak dimbou hui ug ei sar nsi ne gembala di hyen kep domba nya ri.

³Awak di bong ser dimbou hui kau dimbou leu noni leu api domba nya imiap nihyet tirigi noni jem kep yok bindat kep yahagom inyeng igbit leu api hei sut yok.

⁴Tirigi noni hei sut domba nya bibie tut yok lene domba nya ibit lewo imiap igbit nihyet.

⁵Domba nya ibit ngkiai nihyet bi. Noro inang lewo imiap igbit nihyet bi.”

⁶Yesus pui sut nihyet nibiti nindati dini biyok noro ingon dor niti bi.

⁷Gima rino Yesus pai biyok hanyen bu “Dipai nijit bije bipia Dani ne dimbou mem domba nya icoi kak ri.

⁸Yo di ikwei nipou tirigi dikwei bigyo yahagom ne ninggimang kep mun cig kin yo di isibut nya cem ri. Noro domba nya imiap igbit yo dima ighyet bi.

⁹Dani ne dimbou hui ri. Bikwop no di coi kak Da miyai niteu leu sisar kin niyaijo nijepti. Noni hei-hei nyen biyem njita nok gi dem.

¹⁰Ninggimang kep mun cig gau sar bimbrai domba nya leu api bui nok mikwau bidigou binggek tut domba nya. Noro dikwei leu binhyepo tungwatu nya igyai niyaijo nijep di mpung kin pias-hagau ei ingonti.

¹¹Dani ne gembala di ningon gom tut domba nya rin ba, ditin ei bidikes Dinnei ei mem domba nya.

¹²Noro awak pima ne domba nya iceu kin ide gembala rin bi. Tirigi nsien bigbehei ham domba nya lene noni kes domba nya ei binang leu leu api nsien dima briu-briu nyen domba bibindei ba, nindigsi intek gimahap.

¹³Noni nang leu domba nya lewo noni nok awak he. Ningon gom tut domba nya bi.

¹⁴Dani ne gembala di ningon gom tut domba nya rin ba, dingat igbit Ditde domba nya. Nok gima cem Ditde domba nya ingat igbit Da.

¹⁵ Dicig ngat igbit Da bidingat igbit Noni cem. Gima rino ditin ei mem gima dikes Dinnei ei mem domba Tde nya.

¹⁶Ditde domba nindigsi di icoi kwei ei sar nsi dini bigyo yo rinaha. Suar dijem yoni cem kwei leu api imiap dihyet apino domba nya yahagom inok gom ba, ide gembala cem gom ngat.

¹⁷Dicig ningon ngakei Da lewo dikes Dinnei ei leu binhyepo diyai Dinnei hanyen.

¹⁸Bit bon tungwa hi pos Dinnei leu Da bi. Dikes Dinnei ei bit leu Danti dingon kanti. Disindem mem gima dikes Dinnei ei ba, disindem mem gima diyai Dinnei hanyen cem. Dicig cuk Da leu binhyepo diyai midyai nok gima.”

¹⁹Lene tungwatu nya isrep yam tut mun di tibim ei Yesus nuhui him.

²⁰Imang bibor ighyet kui yam bisrep “Nung kui Noni! Mirei bon Noni! Jingig jitingou mem nihyet tut nggon i?”

²¹Noro hiter ipai “Gino nung kui Noni lene bit bon Noni tri tut nihyet nok gima kan bi. Notou nung sindem mem gima bindei ba, no di niyai tu niyai da hanyen i?”

²²Tirigi bed di biang hou kin tto bou mem tungwatu nya ibon pesta kep Njap Ndig Nipiga Tuhan De Ig ei Yerusalem dem,

²³lene Yesus mbut ei Bisai Salomo ei Tuhan De Ig,

²⁴mpe dino tungwatu nya ingwig kep Noni bihig ser Noni “Akes hon gino abiti ninda ei njap pig bu i? Gino Nani ne Nibou Ndig di teu tungwatu nya biyai niyaijo nijep biyok rin lene ma apai mungkun leu binhyepo nikan tut hak ug.”

²⁵Yesus buhup “Dipai brei bije tu noro jingon jo kep Da bi. Diyai midyai tug hon nisindemti di Dicig yai biDa ba, midyai dima ndo bindo tut Da.

²⁶Jingon jo kep Da bi lewo jinggre kin Ditde domba nya bi.

²⁷Ditde domba nya imiap dihyet. Dingat igbit yok lene ibit Da.

²⁸Diyai niyaijo nijep di jo kikau biyok leu api isar hanyen bi sren. Bit bon hi pos yok leu dinda nsi kan bi.

²⁹Dicig di kes yok biDa bon ninyeng dor njiriek[13] nindigsi nya. Bit bon hi pos yok leu Dicig di nyohou yok ninda nsi kan bi.

³⁰Dicig kin Dani ninok gom kin yam.”

³¹Lene mben Yahudi iteu tig hanyen mem ibihwen Noni.

³²Noro Yesus pai biyok “Diyai midyai di kei mang bibor brei ei jiyai him bit leu Dicig nicuk Dati. Midyai di kei di diyai dima gi tou rino jihwen Da drek dip i?”

³³ Mben Yahudi ibuhup “Nihwen Na drek dip Ade midyai di kei nya bi. Noro drek dip ahyet di wer mpiahi tut Allah. Nani ne tungwatu dihyeisi dini he rin noro apai sut Nanti bipia Nani ne Allah ri.”

³⁴ Lene Yesus buhup “Bit leu nok gi ipas ei Puig Yahudi nicukti ‘Allah pai biyok bipia jeni ne awak di dipai tes nya ri.’

³⁵Ikan tut bipia nibokti di ipas ei Allah Nihyetti ne nijit di ug hon nohonti bi sren ri. Allah pai sut yo di ibit Nonti nihyet bipia yoni ne awak di Noni pai tes nya ri.

³⁶Dicig dimig Da ei leu api cuk Da kwei ei dihyeisi dini. Nggon rino jipai sut Da bipia dihyet wer mpiahi tut Allah tug hon gi dipai ‘Dani ne Munggwom Allah Nipmot rin’ i?

³⁷Gino diyai midyai bit leu Dicig ningon kanti bi ne ma jingon jo kep Da au.

³⁸Mbro nok gino jingon jo kep Da bi lo, gino diyai midyai bit leu Dicig ningon kanti ne ma jingon jo kep Ditde midyai hak ug leu binhyepo jikan tut mungkun bipia Dicig kin Dani ninok gom kin yam.”

³⁹Yo dima ibrim ingkek hanyen bipi bikat Noni noro ningwes ngun leu inda nsi.

⁴⁰ Noni ngkwei hanyen ug ei Minyei Yordan nite dima ug ndam mpia ttou nsi di Yohanes tur tungwatu nya ei minyeiti bibong ei sirima.

⁴¹Tungwatu nya imang bibor induk yam kwei kep Noni bipai biyam “Yohanes bibon mindur hi bi noro nihyet hagom di noni tri tut No dini ne nijit ri.”

⁴²Lene yo di ibong ei mpia ttou nsi dima cem imang bibor iba ingon com Noni.