Read Hatam YOHANES 15 Bible Online

YOHANES 15 - Hatam bible

YOHANES 15

¹“Dani ne ba anggur ninjem di ningat-ngat ri. Dicig ne No di nyohou miai ba anggur nghousi ri.

²Bikwop ninda di tug Da lo, ningat ntun him bi ne Noni sriot leu hak ug. Noni kot ninggrupti bipe nimeng bihi leu ninda di ningat ntun him leu binhyepo ningat hi kin ntun him bu.

³Dibindei ba, jipwoi tug hon ningginausi di ditri tut bije tu.

⁴Ma jicom jigau ninghig-niker ei Dati lene Dani cem dicom digau ninghig-niker ei jeti. Bit bon ningat ntun ninda him tug hon nonti kan bi. Gino ninda tug ninjem lene ngat ningat ri. Nok gima mem jeni cem. Gino jicom jigau ninghig-niker ei Dati bi lene bit bon jingat ningat kan bi.

⁵Dani ne ba anggur ninjem ba, jeni ne ninda ri. No di com nigau ninghig-niker ei Daniti lene Dani dicom digau ninghig-niker ei noniti ba, noni mingat ningat mang di ntun noni him ri. Gino jisriot jenti leu Dani lene bit bon jingat ningat kan bi.

⁶No di nyohou miai ba anggur nghousi misriot no di com nigau ninghig-niker ei Dati bi noyam kin gi noni sriot biei nda leu apino mui. Noni mimbus ninda dima hagom keyam bindig kep huma.

⁷Gino jinok gom kin Da ba, dihyet jo ei jeniti lene ma jahara Da tut mun nyeng hagom bit leu jingon kanti leu api dibirop hanyen bije.

⁸Gino ningat mang ntun jeni him lene tungwatu nya ikon Dicig ninyeng. Tug hon nisinati dima lene jinok yo di igya kui Da di nijit nya ri.

⁹Dingon ngakei je bit leu nok Dicig ningon ngakei Da. Ma jicom jigau ninghig-niker ei Dati leu binhyepo dingon ngakei je.

¹⁰Gino jibindei mbut Ditde nicukti nya apino jingon gom tut Ditde ningon ngakeisi. Gima noyam kin dingon gom tut Dicig Nide ningon ngakeisi tug hon gi dibit nicukti nya.

¹¹Ditri tut mun dini hagom bije leu binhyepo dingon llei biborti coi ug ei jingonti bibindei ba, jingon llei biborti kei-kau.

¹² Ma jingon ngakei yam noyam kin gi dingon ngakei je. Gima ne Ditde nicuk jeti ri.

¹³No di ningon ngakei nisut bat nya ningat-ngat rino no di kes niyaisi ei bimai luei yok.

¹⁴Gino jibit Ditde nicukti nya lene jinok disut bat di dingon kieti nya ri.

¹⁵Dijem je awak bu bi lewo awak nya ikan tut iceu niyai munti nya bi. Noro dijem je disut bat di dingon kieti nya lewo ditri tut mun di dimiap leu Dicig hagom bije tu.

¹⁶Jidimig Dani bi noro didimig jeni bidicuk je leu binhyepo juug ngat ningat mang bibor ba, ningat dima ne ningat di bit bon pror yon kan bi. Gino jahara Dicig tut mun nyeng hi tug hon dinyeng[15] lene Noni mibirop hanyen bije.

¹⁷Ditde nicuk jeti pai bipia ma jingon ngakei yam.”

¹⁸“Mpe dino tungwatu dihyeisi dini ingon mpo tut je lene ma jiyok ngon kep bipia ingon mpo tut Da bibie tu.

¹⁹Gino jinok gom kin tungwatu dihyeisi dini lene ingon ngakei je lewo jinok yoni. Noro didimig je bijo ter leu tungwatu dihyeisi dini bijinggre kin yok bu bi. Yo dima ingon mpo tut je drek dip gi jinggre kin yok bu bi.

²⁰ Ma jiyok ngon kep mun di dipai bije. Awak nya inyeng jei dor njiriek iceu ninyeng bi. Gino ihwen bit Dani lene mihwen bit jeni cem. Gino ibit Ditde ningginausi lene mibit jide ningginausi cem.

²¹Yoni ibibon je nok gima drek dip gi jibit Da lewo ikan tut No di cuk Da kwei bi.

²²Gino dikwei tri nihyet biyok bi lene ingon mui ba, sisar ntun him bi. Noro tini bu ne bit bon ipai mun mem isu tindei ide sisar kan bi.

²³No di ningon mpo tut Da ningon mpo tut Dicig cem.

²⁴Gino diyai midyai di bit bon yo di hiter igyai kan bi ei ikieti bi lene ingon mui ba, sisar ntun him bi. Noro tini bu ne ingat Ditde midyai nya hagom bou igyai him ba, ingon mpo tut Dani kin Dicig tu.

²⁵ Ide ningon mpo tut Dati cut igkep Da bit leu nok ide Puig Yahudi nicukti nibokti di pai ‘Yoni ingon mpo tut Da mikui-kausi.’

²⁶Midicuk No Di Mpu je hwou ba, Noni mikwei leu Dicigya. Noni ne Ninnei Gi Kwes di mbot kep tut nihyet di nijit-jau tut Allah bije ri. Tirigi Noni kwei lene mitri tut Da.

²⁷Jeni cem ma jitri tut Da lewo jiya kui Da leu nimbie him kwei bipek ammani kep tu.”