Read Hatam YOHANES 16 Bible Online

YOHANES 16 - Hatam bible

YOHANES 16

¹“Ditri tut dihyet dini bije leu binhyepo jisrawir bi.

²Nibou nya micom je leu ig mbusyamei. Ei nidipti bu lene tungwatu nya ikan bipia gino igyai nimai bije lene gima bit leu Allah ningon kanti mem yok.

³Yo dima ibibon je nok lewo ikan igbit tut Dicig kin Dani cem bi.

⁴Noro ditri tut dihyet dini bije nogindini leu binhyepo tirigi tto bou dem ba, hagom cut igkep je lene jiyok ngon kep bipia ditri tut hagom bije tu.” “Ditri tut mun dini yok bije ei nimbie him bi lewo dingat rin bit je yo.

⁵Noro tini bu ne midingkwei hanyen ndam No di cuk Da kwei noro jigom gi hig ser Da tut mpia di duug eisi dima bi.

⁶Ningat ne jingon ngguk bibor nogindini lewo ditri tut mun dima bije.

⁷Noro dipai nijit bije bipia gino dimbut leu je lene dimbutti dima kei bibor mem je. Gino dimbut bi lene No Di Mpu je mikwei gwam bit je bi sren. Noro gino dimbut lene midicuk Noni kwei ei jingonti.

⁸Tirigi Noni kwei lene Noni mimbot kep mijit tut sisar kin ningon srenti kin hukum di mikwei leu Allah cem bak tungwatu dihyeisi dini.

⁹Yoni ingon kiowi tut sisar lewo iba ingon com Da bi.

¹⁰Ba, ingon kiowi tut ningon srenti lewo dingkwei hanyen ug ei Dicig nidim leu api mijingat Da bu bi.

¹¹Yoni ingon kiowi tut hukum di micut igkep yok lewo Allah pai kep no di ninyeng tak kep tungwatu dihyeisi hagom tu.

¹²Dipi bidimbot kep tut dingon kanti mang bibor nogindini bije bu noro dikan bipia jibou ngwakti sibui sut tu.

¹³ Noro tirigi Ninnei Gi Kwes di mbot kep tut Allah de mijit-jausi bije kwei lene Noni mipingok jingonti leu api mijikan tut mijit-jausi dima hagom. Noni mitri tut Nonti ningon kanti bi noro mitri tut mun di tibim ei nitingou nsi bimbot kep bije tut mun di mipek kep ei nidipti bu.

¹⁴Noni mikon dinyeng lewo mimbot kep tut mun di Noni miap leu duhui him bije.

¹⁵Mun nyeng hagom di jo bak Dicig jo biDa cem. Gima ripo dipai bije bipia Ninnei Gi Kwes mbot kep tut mun di Noni miap di tibim leu duhui him bije.

¹⁶“Jei bi ne jingat Da bu bi. Noro njap poi ser lene mijingat Da hanyen bu.”

¹⁷Yo di igya kui Yesus ibou poi ihig yam ser “Ingon kiowi tut nipai binyeti bipia jei bi ne mingat Noni bu bi leu api njap poi kin bu lene mingat Noni hanyen bu. Ingon kiowi tut nipai binyeti bipia Noni ngkwei hanyen ug ei Nicig nidim.”

¹⁸Lene ihig yam ser “Ingon kiowi tut nihyet dipai binye bipia ‘Jei bi’ cem. Ingon kiowi tut nipaisi nya dima!”

¹⁹Yesus kan tut bipia itin ei mem ihig ser Noni tut nipaisi nya. Gima rino Noni hig ser yok “Jihig yam tut dipaisi ‘Jei bi ne jingat Da bu bi noro njap poi ser lene mijingat Da hanyen bu’ dima e?

²⁰Ma jiyok ngon kep bipia mijipim bijiyai nggwei kibor cem noro tungwatu dihyeisi hagom ingon llei bibor. Jingon buhun noro jei bi lene jingon llei bibor hanyen bu.

²¹Bit leu nok sop di tta buhun ba, dideu nigwam tut munggwomti lene ningon buhun lewo tto bou dem mem ninghim dut. Noro tirigi srek tut munggwom leu su lene ningon prion ser nide ningon buhunti lewo ningon llei sut munggwom di noni srek tut ei dihyeisi dini.

²²Nok gima tut jeni. Nogindini jingon buhun noro midikwei ngat je hanyen bu leu api mijiyai ningon llei biborti. Bit bon hi pos jide ningon llei biborti dima hanyen leu je kan bi.

²³Tirigi njap dima dem ne mijihig ser Da tut mun nyeng hi bu bi. Ma jiyok ngon kep bipia mindei rino jahara Dicig tut tug hon dinyeng lene Dicig mibirop hanyen bije.

²⁴Leu nimbie him kikau kwei bipek ammani kep jahara Da tut mun nyeng hi tug hon dinyeng[16] bigyo. Ma jahara Da leu api jiyai mun dima leu binhyepo jiyai nillei titut yam ei jingonti.”

²⁵“Diba nihyet nibiti nindati bitri tut dihyet dini bije. Noro ei nidipti bu ne midiba nihyet nibiti nindati bitri tut dihyet bu bi noro miditri tut Dicig brei bije.

²⁶Njap dima dem ne mijahara Dicig tug hon dinyeng[17] lene jisuar Da mem dahara Dicig mem je bu bi.

²⁷Lewo Dicig ningon ngakei je drek dip gi jingon ngakei Da bijingon jo kep bipia dikwei leu Noni.

²⁸Nipou ne dikwei leu Dicig kwei ei dihyeisi dini. Tini bu ne dikes dihyeisi dini ei bidingkwei hanyen ug ei Dicig nidim.”

²⁹Yo di igya kui Noni ipai bak “Apaisi dima jo nibreisi tu. Aba nihyet nibiti nindati bimbot kep tut binye bi,

³⁰binikan tut bipia akan bidem tut mun nyeng hagom. Gima rino suar tungwatu nya ihig ser Na tut mun nyeng hi bu bi. Gima rino nyeni ningon jo kep bipia akwei leu Allah.”

³¹Yesus buhup “Ningat ne jingon jo kep Da nogondini e?

³² Ma jiyok ngon kep bipia tto bou mem jintek gimahap midem ba, tto bou dima dem tu. Bikwop jahagom mijingkwei hanyen ug ei jide ig bijikes Da ei apino digwam biDangkom. Noro digwam biDangkom bi lewo Dicig ningat rin bit Da.

³³Ditri tut dihyet bije leu binhyepo jingon jo nyahan tug hon jinok gom kin Da. Tungwatu dihyeisi dini igyai ninghuisi wei bije. Noro ma jibrim jingkek! Lewo dihwen bitimek nisindemti nya ei dihyeisi dini tu!”