Read Hatam YOHANES 20 Bible Online

YOHANES 20 - Hatam bible

YOHANES 20

¹Mben Yahudi ide las gom ttau su leu api Maria Magdalena ba mmun ngwa kin buug cem kep hak mihyeti bingat lo, tig mma son leu su ba, nimbou jo hak.

²Gima rino noni dor bingkwei hanyen ba, nggok ser Simon Petrus kin no di Yesus ningon kieti di ya kui Noni pima bipai biyok “Hi ket Yesus ningut hanyen leu hak mihyeti tu. Dikan tut mpia di igyok ningut hanyen eisi bi!”

³Lene Petrus kin no di ya kui Yesus pima yuug ngat ser hak mihyeti.

⁴Yahacem idor sindem noro gi hi dor sindem njiriek Petrus buug krau hak mihyeti bibie.

⁵Noni hun kep hak mihyeti bingat lo, sre di inggai nimai eisi jo nijoti noro noni coi kikau ug bigyo.

⁶Simon Petrus bram noni bicoi kikau ug ei hak mihyeti bingat sre di jo nijoti,

⁷kin sinsun nghas di ibinggai kep Yesus nibou pima di jo kin sre bi noro kijum bijo simiak nite nibousi.

⁸Leu api no di ya kui Yesus di kwei krau bibie cem coi ug ei hak mihyeti bingat lene ningon jo kep bipia Yesus kiju hanyen tu. (

⁹Lewo hon kep mpe dima bijug yo di igya kui Yesus ingon kiowi tut nipas kepti ei Allah nihyet bokti tut Yesus nikiju hanyen leu nimai eisi.)

¹⁰Leu api yo cin di igya kui Yesus dima ingkwei hanyen ug ei ig bei.

¹¹Maria Magdalena ya nyen kui hak mihyeti bipim. Noni ba nipim buhun kep hak mihyeti,

¹²bingat malaikati nya ibou can di ijuk sinsun di tiei-tiau di igwam ei hak mihyeti di yo pima ikes Yesus ningut eisi. Hi gwam hammi nibou lene hi gwam hammi nimig.

¹³Malaikati cin dima ihig ser Maria “Sindig e, nggon rino apim i?” Maria buhup “Bihi iket ditde Tuhan ningut tu lo, dikan tut mpia di igyok ningut hanyen eisi bi.”

¹⁴Pai nok lene kiek no bingat Yesus di ya ei sirima noro ngat igbit Noni bi.

¹⁵Yesus hig ser noni “Sindig e, nggon rino apim i? Anggok ser tou i?” Noro Maria kan bigya no dima ne no di nyohou mitou ninghousi dima ri. Gima rino hig ser noni “Andigpoi e, gino akon Yesus ningut leu mpia dini lene ma apai igbit mpia ttou nsi di akes ningut eisi leu binhyepo duug kon hanyen kwei.”

¹⁶Yesus hig noni “Maria e!” Maria kiek noho ndam Yesus lene ba nihyet Ibrani bibuhup “Rabuni!” (Gi ijem bipia “Guru”.)

¹⁷Yesus pai binoni “Ma anggriou Da hon tiri lewo dikui hanyen ug ei Dicig nidim bigyo. Noro ma aug ngat dikinjoi bat nya ba, apai biyok bipia dikui hanyen ndam Dicig dino jeni cem Jicig bidikui hanyen ndam Ditde Allah kin jide Allah.”

¹⁸Gima rino Maria Magdalena ngkwei hanyen bimbot kep tut bak yo di igya kui Yesus bipia “Dingat Yesus bou diyai him tu!” Pai nok lene bindat kep mun di Yesus sok ei noni dip hagom biyok.

¹⁹Mmun tu ba, mben Yahudi ide las gom tun tu. Yo di igya kui Yesus induk yam kwei ei ig bei bilit ser dimbou nya bingkiem lewo ittin nibou mben Yahudi nya. Idrui sut lo, Yesus ttau kros hak biya ei ikieti lene pai biyok “Dwai! Ma jingon jo nyahan.”

²⁰Tirigi pai nok rino Noni ndo ninda kin nikimbu dip biyok. Yo dima ingat Noni lene yahagom ingon llei bibor.

²¹Lene Yesus pai biyok mbigom kin bu “Ma jingon jo nyahan. Dicuk je ug ei dihyeisi dini noyam kin Dicig cuk Da kwei ei dihyeisi.”

²²Lene Noni hi Ninnei ei yo dip bipai biyok “Ma jiyai Ninnei Gi Kwes ei jingonti.

²³ Gino jikos ser tungwatu nya ide sisar lene Allah cem kos ser ide sisar. Gino jikos ser ide sisar bi lene Allah cem kos ser ide sisar bi.”

²⁴Tomas (di ijem ninyeng “Ninggre”) cem ya kui Yesus noro gwam bit nisut bat nindigsi nya tirigi Yesus ttau kep yok bi.

²⁵Gima rino nindigsi nya ipai binoni “Ningat Tuhan Yesus bou niyai him tu!” Noro Tomas buhup “Gino dingat ninda nimuhweisi di iba paku bipek bou diyai him bidisu dinda bidingget nimuhweisi dima kin nikimbu dip nimuhweisi bi lene dingon jo kep nikiju hanyenti bi sren.”

²⁶Ari gom bu lene yo di igya kui Yesus induk yam hanyen kwei ei ig bei lene Tomas cem gwam bit yok. Mpe dima cem ilit ser dimbou nya bingkiem noro Yesus ttau kros hak biya ei ikieti bipai biyok “Ma jingon jo nyahan.”

²⁷Leu api Yesus pai bak Tomas “Angat dinda ba, ayok anda pijum eisi lene asu anda ei dikimbu nimuhweisi cemti. Ma ahig angon eisi bu au noro ma angon jo kep!”

²⁸Tomas pai bak Yesus “Nani ne ditde Tuhan ba, Allah di dikuk da bak ri!”

²⁹ Gima rino Yesus pai binoni “Angon jo kep lewo angat Da bou ayai him tu e? Yo di ingat Da bou igyai him bigyo lo, ingon jo kep tu ne ingon nggei-hi-nggei!”

³⁰Yesus bibon mindur hiter mang bibor bou yo di igya kui Noni igyai him noro hi pas kep tut hagom titut yam ei srat diniti bi.

³¹Noro hi pas kep mindur dini yok hagom leu binhyepo jingon jo kep bipia Yesus ne Nibou Ndig di teu tungwatu nya biyai niyaijo nijep biyok cem Allah Nipmot cem ri. Tug hon nisinati dima jiyai niyaijo nijep tug hon jide niba ningon com Noti.