Read Hatam YOHANES 3 Bible Online

YOHANES 3 - Hatam bible

YOHANES 3

¹Mpe dima lene andigpoi Nikodemus gwam nok Nikei Puig Yahudi binggre kin nimpung Farisi nya cem.

²Mpe di gom lene noni ug ngat Yesus mem mmun bihig ser Noni “Guru e, nikan tut bipia Nani ne guru di Allah cuk kwei ri. Gino Noni ningat rin bit Na bi ne bit bon abibon mindur nok gi abibon dima kan bi.”

³Yesus buhup “Ma ayok ngon kep bipia gino tungwagom yai nisrek nimbicanti bi[5] ne bit bon noni coi bit Allah Ninyeng Tak Kepti kan bi.”

⁴Nikodemus hig ser Yesus “Gino tungwagom ug wer andigpoi su ne notou nipmem srek tut noni hanyen bu i? Bit bon noni coi hanyen ug ei nipmem ninghopti bisrek tut noni hanyen bu kan bi!”

⁵Yesus buhup “Dipai nijit bina bipia gino tungwagom srek tug hon minyei kin Ninnei Gi Kwes bi ne bit bon noni coi bit Allah Ninyeng Tak Kepti kan bi.

⁶Tungwatu nya igyai niyaijo tug hon icig bat-ipmem bat nya noro igyai niyaijo nijep tug hon Allah Ninnei.

⁷Anga leu sut gi dipai bina bipia suar jahagom jiyai nisrek nimbicanti[6] au.

⁸Bit leu nok hou di kui nyeti leu nima kwei-nima kwei ba, amiap nibimbi noro akan tut nikwei leusi kin nuug eisi bi. Nok gima cem tut yo di Allah Ninnei srek tut yok nya.”

⁹Nikodemus hig ser Yesus “Notou mun di apai sut dima mipek kep mem tungwatu nya i?”

¹⁰Yesus hig ser noni “Nani ne guru di ninyeng jei ei mben Israel igyai him rin noro akan tut mun dini yok bi e?

¹¹Ma ayok ngon kep bipia nitri tut mun di nikan tut ba, nipai sut mun di ningat bou niyai him tu noro jingon jo kep nihyet di nitri tut bije bi.

¹²Dipui sut mun di pek kep mem tungwatu nya ei dihyeisi dini bije noro jingon jo kep Da bi. Gino dipui sut mun di pek kep ei gwamti bu bije lene notou mijingon jo kep i?

¹³Munggwom Tungwatu Nipmot di kwei leu gwamti Nongkom kui ug ei gwamti noro tungwa hi kui ug ei gwamti bi sren.

¹⁴ Bit leu nok Musa kon wou ngkimom-tembaga ei biei ninggrupti bitas tut ei iggum ndigsi. Nok gima cem tungwatu nya mitas biei tut Munggwom Tungwatu Nipmot,

¹⁵leu binhyepo bikwop no di ba ningon com Noni miyai niyaijo nijep di jo kikau.

¹⁶Lewo Allah ningon ngakei tungwatu dihyeisi dini hagom nindig bibor apino kes Nipmot di nimig gom ngat hak ei mem yok leu binhyepo bikwop no di ba ningon com Nipmot misar bi noro yai niyaijo nijep di jo kikau.

¹⁷Lewo Allah cuk Nipmot kwei ei dihyeisi dini nok nikei di pai kep tungwatu nya bi noro nok No di teu yok leu sisar biyai niyaijo nijep biyok.

¹⁸No di ba ningon com Nipmot tug ndei hukum bi. Noro no di ba ningon com Noni bi tug ndei hukum leu Allah tu lewo ba ningon com Nipmot di nimig gom ngat dima bi.

¹⁹Noni tug ndei hukum bitig dino nipigati piga digai dihyeisi dini tu noro tungwatu nya ijoi sut nidinditi nindig dor njiriek nipigati lewo igyai munti nya hagom kinei bibor.

²⁰Niyai kep mun di kinei cig ningon mpo tut nipigati bikwei ndam nipigati bi. Noni kou sut gima nide mun di kinei nya jo brei ei tungwatu nya igyai him a.

²¹Noro no di yai igbit Allah ningon kanti kwei ndam nipigati leu binhyepo nipigati piga digai nide niyai igbit Allah ningon kanti.”

²²Gima ngwig leu api Yesus kin yo di igya kui Noni yuug ei hanjop Yudea. Noni bong bit yok ei sirima mem bed poi ba, tur tungwatu nya ei minyeiti.

²³Yohanes cem tur tungwatu nya ei minyeiti ei mpia di ninyeng Ainon dideu minu ndig Salim. Mpia ttou nsi dima nok minyei nimangti ri. Gima rino tungwatu nya yuug ngat noni leu binhyepo noni tur yok ei minyeiti.

²⁴ Mpe dima ne Yohanes sima ei ig bui nsi bigyo.

²⁵Yo di igya kui Yohanes ibou poi kin mben Yahudi gom isrep yam tut midut nipiap yonti bipwoisi.

²⁶Yoni yuug ba, ihig ser Yohanes “Guru e, ayok ngon kep No di bit na ei Minyei Yordan nite dima ug di ando binye pima e? Nogindini Noni cem tur tungwatu nya ei minyeiti apino yahagom induk yam bingwig kep Noni!”

²⁷Yohanes buhup “Gino Allah sindui sut bi lene bit bon mun nyeng hi pek kep mem tungwatu nya kan bi.

²⁸ Jingon dorti tut mun di dipai sut Noni pima bipia dani ne Nibou Ndig di teu tungwatu nya biyai niyaijo nijep biyok rin bi noro Allah cuk da kwei bibie mem Noni.

²⁹Bit leu nok pinai pilei di wak nitnem. Nongkom ninyeng tak kep sop gwam nitta pilei di noni yok wa kep tu. Noro nisut di ya kui noni ntu kep nihyet apino ningon llei sut. Nok gima tut dani cem. Nogindini diyai nillei titut yam ei dingonti.

³⁰Suar Noni bon ninyeng di jei bibor noro dibon dinyeng wer cun he.”

³¹“No di juk kwei leu gwamti ninyeng jei dor njiriek tungwatu nya yahagom. No di ntun tungwatu dihyeisi dini him nggre kin yo dima ba, noni pui sut mun di jo ei dihyeisi dini he. No di juk kwei leu gwamti ninyeng jei dor njiriek tungwatu nya yahagom.

³²Noni tri tut mun di Noni ngat bou niyai him bimiap ei nitingou nsi cem noro tungwatu nya ingon jo kep nihyet bi.

³³Tungwa tou rino ba ningon com nihyet di pai dima lene mipai ei nibreisi bipia Allah nihyet ne nihyet di nijit-jau ri.

³⁴No di Allah cuk kwei tri tut nihyet di kwei leu Allah lewo Allah kes Nonti Ninnei titut yam ei ningonti.

³⁵ Nicig ningon ngakei Nipmot bibindei ba, Noni krau nisindemti hagom ei nindati.

³⁶No di ba ningon com Allah Nipmot yai niyaijo nijep di jo kikau ei ningonti tu. No di ba ningon com Allah Nipmot bi yai niyaijo nijep bi. Noro noni tug ndei hukum leu Allah bijo ninno bijo kikau.”