Read Hatam YOHANES 6 Bible Online

YOHANES 6 - Hatam bible

YOHANES 6

¹Njap poi ser lene Yesus ngkwei hanyen ug ei Igpong Galilea nite dima ug. Tungwatu nya ijem igpong dima ninyeng hi Igpong Tiberias.

²Noni kwei krau lene imang bibor ingwig kep Noni lewo ingat mindur di Noni bibon nya tirigi bindei ba, yo di inggwen ikei hanyen.

³Yesus kui ug ei nungug tou gom leu api kuk No bigwam jug[8] lene yo di igya kui Noni ingat rima bit Noni.

⁴Mpe dima lene tto bou mem mben Yahudi ibon pesta kep Njap Ndig Paskah dideu su.

⁵Yesus mian ser mpia ttou nsi dima bingat tungwatu nya imang bibor di induk yam kwei ttai Noni. Gima rino Noni hig ser Filipus “Ipek njita ei sirigitou mem ibitri yo dini yahagom i?” (

⁶Yesus hig singgre Filipus nok leu binhyepo bingon noni lewo Noni kos tut ningon kanti tut mun dima bon mem yok tu.)

⁷Filipus buhup “Gino iba mitiei buhun nitig sratus can[9] bipek roti lene gima dem bi lewo bikwop tungwagom-gom miyem njita poi mien he.”

⁸Andreas di Simon Petrus nikinjoi di ya kui Yesus pai biNoni,

⁹“Mot gom di pwoi roti nindak muhwi kin wau can he ningat rin bit nye. Noro ningat ne njita dima dem mem ibitri tungwatu ningot ndig dini bi.”

¹⁰Yesus pai “Ma jicuk yahagom bigwam jug.” (Mpia ttou nsi dima bon abris nghousi nindig bibor.) Gima rino yahagom igwam jug. Andigpoi nya di isrig yokti imangti ibou sribu muhwi.

¹¹Lene Yesus krau roti nindak muhwi bipai sigyo kep bak Allah leu api kki bitri yo di igwam ei mpia dima yahagom. Nok gima tut wau cem ba, Noni pai sigyo kep leu api bitri yok ba, yahagom igyem njita bindei yok.

¹²Tirigi igyem njita bindei yok tu lene Yesus pai bak yo di igyai kui Noni “Ma jimbus njita niken keyam leu binhyepo bihi cut mangkrei ei dihyeisi bi.”

¹³Leu api imbus roti niken di yo dima yahagom igyem leu roti nindak muhwi pima ei bansi simnaibrimigcanti ba, hagom ut.

¹⁴Tirigi tungwatu ningot ndig dima yok ingat mindur di Yesus bibon lene ipai biyam “Jit jit, No dini ne Nabi[10] di ingon ya mem di mikwei ei dihyeisi dini pima ri.”

¹⁵Yesus kan tut bipia mbigom yo dima ibidip huk Noni mem gima ita Noni nok nibou ndig mem yok. Gima rino Noni kes yok ei ba, kui ug ei minu nungug tou mangti dima kou.

¹⁶Mmunti lene yo di igya kui Yesus ijuk ug ei igpong nipimat ba,

¹⁷ibri ut bingkwei hanyen ug ei minu ndig Kapernaum ei igpong nite dima ug. Mmun bidindi-kai su lo, Yesus ttau kep yok bigyo.

¹⁸Jei bi lene hou di nimig ten bibor kui yokti ba, muk cem tti nindig bibor.

¹⁹Yoni itig minyei biyuug ei nahacanti lene ingat lo, Yesus mbut nimig ei minyei ngwa dip bahatap yok. Nok rino ingwes mba tut.

²⁰Noro Noni mbrua kep yok “Ma jittin au. Da pa ri!”

²¹Lene iba ingon di nggan-triot biya um Noni leu api Noni bri ut bit yok. Lene bindei ba, ide ut ug krau igpong nintig dip kros ei mpia ttou nsi di itig minyei biyuug ndam pima.

²²Njapti kui bu lene tungwatu ningot ndig di igwam ei minyei nite dima ug ei mpia ttou nsi di Yesus kes yo ei pima ikan kep bipia annani ut gom ngat kwei piar ei mpia ttou nsi dima. Ba, ikan kep bipia Yesus bri ut dima bit yo di igya kui Noni bi. Yongkom he ibri ut noro Yesus gwam mam bei.

²³Jei bi lene timiei minu ndig Tiberias nya ibri ide ut bikwei krau mpia ttou nsi di tungwatu ningot ndig igyem roti di Yesus pai sigyo kep eisi pima.

²⁴Tirigi yo dima ingat lo, Yesus kin yo di igya kui Noni imbut leu su lene iba ut bitot minyei ngwa dip hanyen ug ei minu ndig Kapernaum binggok ser Noni.

²⁵Tirigi yo dima ittau kep Yesus ei igpong nite dini kwei lene ihig ser Noni “Guru e, akwei apig su i?”

²⁶Yesus buhup “Dipai nijit bije bipia jinggok ser Da drek dip gi jingon dorti tut mindur di dibibon nya bi. Noro drek dip roti di jiyem bindei je pima.

²⁷Ma jicom jahanggwap tut roti di mipror yon au. Noro ma jicom jahanggwap tut roti di bit bon pror yon kan bi di bindei ba, jiyai niyaijo nijep di jo kikau. Munggwom Tungwatu Nipmot yai roti dima bije lewo Nicig Allah ndo brei bipia joi sut Noni tu.”

²⁸Yo dima ihig ser Noni “Niyai midyai mindei leu binhyepo niyai igbit Allah ningon kanti mem nye i?”

²⁹Yesus buhup “Allah ningon kanti mem je rinok gini. Ma jiba jingon com No di Noni cuk kwei su.”

³⁰Yo dima ibuhup “Andigpoi e, abon mindur leu binhyepo ningat bou niyai him ba, niba ningon com Na. Abon mindur mindei i?

³¹ Lewo ide pung di intun him nya igyem njita manna ei iggum ndigsi bit leu nok Allah nihyet pai ‘Noni yai roti leu gwamti biyok ba, igyem.’ ”

³²Lene Yesus buhup “Dipai nijit bije bipia Musa yai roti leu gwamti bije bi noro Dicig yai roti ningat-ngat leu gwamti bije.

³³Lewo roti di Allah yai bije dima ne No di juk kwei leu gwamti biyai niyaijo nijep bak tungwatu dihyeisi dini nya ri.”

³⁴Yo dima ibuhup “Andigpoi e, ayai roti dima binye biniyem ninghig-niker ei siri.”

³⁵Yesus pai biyok “Dinok roti di bindei ba, tungwatu nya igyai niyaijo nijep. No di bit Da minggum bu bi ba, no di ba ningon com Da minggobiau cem bi.

³⁶Noro bit leu nok gi dipai bije. Mbro nok gino jingat Da bou jiyai him tu lo, jiba jingon com Da bi.

³⁷Bikwop yo di Dicig kes yok biDa yahagom minggre kin Da leu api dirok yo di inggre kin Da ei bi sren.

³⁸Lewo dijuk kwei leu gwamti leu binhyepo diyai midyai bit leu Danti dingon kanti bi noro bit leu No di cuk Da kwei ningon kanti.

³⁹No di cuk Da kwei ningon kanti rinok gini. Bikwop yo di Noni kes yok biDa lene hi mipror bi. Noro midiwin yok hanyen leu imai eisi ei Njap Ningwig Honti.

⁴⁰Lewo Dicig joi sut gima tungwatu nya yahagom ingat igbit Allah Nipmot leu api iba ingon com Noni apino yo dima igyai niyaijo nijep di jo kikau lene diwin yok hanyen leu imai eisi ei Njap Ningwig Honti.”

⁴¹Mben Yahudi sindi inso Noni drek dip nihyet di pai biyok bipia Noni ne roti di juk kwei leu gwamti ri.

⁴²Ihig yam ser “No dini ne Yesus di Yusuf nipmot pima rin bi e? Nikan tut nicig-nipmem nya tu! Nggon rino Noni pai sut Nonti bipia juk kwei leu gwamti i?”

⁴³Lene Yesus pai biyok “Ma jinso Da bu au.

⁴⁴Bit bon hi nggre kin Da kan bi gino Dicig di cuk Da kwei buwak no dima kwei biDa bi. No di kwei ndam Da lene midiwin no dima leu nimai eisi hanyen mem Njap Ningwig Honti.

⁴⁵ Bit leu nok gi ipas ei Srat Nabi nya nibokti ‘Allah ngginau tungwatu nya yahagom ingonti.’ Bikwop no di miap Dicig nihyet biningon dorti tut ne no dima nggre kin Da.

⁴⁶Gi dipai dima ndo bipia hi ngat Dicig bou niyai him tu ne bi. Noro Nongkom di juk kwei leu Allah ngat Nicig bou niyai him tu.

⁴⁷Ma jingon jo kep bipia bikwop no di ba ningon com Da yai niyaijo nijep di jo kikau ei ningonti tu.

⁴⁸Dani ne roti di yai niyaijo nijep ri.

⁴⁹Jide pung di jintun him nya igyem manna ei iggum ndigsi noro imai bingwig.

⁵⁰Gino jiba roti di kwei leu gwamti kin manna binai yam lene roti di kwei leu gwamti bindei ba, yo di igyem kep roti dima imai bi.

⁵¹Dani ne roti di yai niyaijo nijep di juk kwei leu gwamti ri. No di yem roti dini miyai niyaijo nijep di jo kikau. Roti di diyai binoni ne dinghui rin ba, diyai roti dini bak tungwatu nya leu binhyepo igyai niyaijo nijep.”

⁵²Imiap nihyet dima lene mben Yahudi isrep yam tut bihig yam ser “Notou No dini yai Nonti ninghui binye ba, igyem i?”

⁵³Lene Yesus pai biyok “Ma jiyok ngon kep bipia gino jiyem Munggwom Tungwatu Nipmot ninghui bijidut ninggrom bi lene bit bon jiyai niyaijo nijep ei jingonti kan bi.

⁵⁴Bikwop no di yem dinghui ba, dut dinggrom cem lene no dima rino yai niyaijo nijep di jo kikau ei ningonti. Midiwin noni hanyen leu nimai eisi mem Njap Ningwig Honti.

⁵⁵Lewo dinghui ne njita ningat-ngat rin ba, dinggrom cem ba anggur ngei ningat-ngat ri.

⁵⁶Bikwop no di yem dinghui bidut dinggrom cem lene no dima ningon jo gom kin Da ba, dingon jo gom kin noni.

⁵⁷Dicig di cuk Da kwei ne niyaijo nijep nibousi ri. Diyaijo tug hon Noni. Nok gima cem tut no di yem dinghui. Noni yai niyaijo nijep tug hon Da.

⁵⁸Gi dipai dini tut roti di juk kwei leu gwamti noro dem kep manna di jide pung di jintun him nya igyem bi. Yoni igyem kep manna noro jei bi lene igyaijo ngwig hon nohonti. Noro no di yem roti dini yai niyaijo nijep di jo kikau.”

⁵⁹Yesus ba nihyet dini bingginau tungwatu nya ei mben Yahudi ide ig mbusyameisi ei minu ndig Kapernaum.

⁶⁰Tungwatu ningot ndig di ibit-bit nyen Yesus di imiap nihyet dima ipai biyam “Nihyet dima buhun bibor. Tou rimice tut i?”

⁶¹Yesus kan tut mun di inso tut. Gima rino Noni hig ser yok “Dihyet dini bindei ba, jingon cut leu bijingkwei hanyen ug rin e?

⁶²Notou mem je gino jingat Munggwom Tungwatu Nipmot tirigi kui hanyen ug ei nitimieisi bou jiyai him i?

⁶³Allah Ninnei Nongkom yai niyaijo nijep bak tungwatu nya. Tungwatu nya ide nisindemti dem mem bi. Dihyet di dipai bije bindei ba, jiyai Allah Ninnei bitut niyaijo nijep di jo kikau ei jingonti.

⁶⁴Mbro nok gima lo, jibou poi jiba jingon com Da bi.” (Habiei ei nimbie him ne Yesus kan tut yo di iba ingon com Noni bi kin no di mitri Noni.)

⁶⁵Lene Noni binut nihyet bu bipai “Gima ripo dipai bije bipia gino Dicig buwak tungwagom kwei binggre kin Da bi lene bit bon no dima bit Da kan bi.”

⁶⁶Hon kep njap dima kui lene tungwatu ningot ndig di ibit-bit nyen Yesus ikes Noni bingkwei leu Noni.

⁶⁷Lene Yesus hig ser ibou simnaibrimigcan di igya kui Noni “Jeni cem jikes Da bijingkwei leu Da rin e?”

⁶⁸ Simon Petrus pai biNoni “Tuhan e, nibit tou bu i? Lewo nihyet Ade yai niyaijo nijep di jo kikau binye.

⁶⁹Niba ningon com Na biningon ngkiem tut bipia Nani ne No Di Ningon Kwes di Allah cuk kwei ri.”

⁷⁰Yesus buhup “Dani ripo didimig jibou simnaibrimigcan pima bi e? Noro jigom ne nibou ninnei rom nya ri.”

⁷¹Yesus nipaisi dima tut Yudas di Simon Iskariot nipmot. Mbro nok gino Yudas nggre kin ibou simnaibrimigcan di igya kui Yesus lo, noni tri Yesus.