Read Hatam YOHANES 7 Bible Online

YOHANES 7 - Hatam bible

YOHANES 7

¹Leu api Yesus mbut-mbut nyen ei hanjop Galilea. Noni joi sut ngkwei ug ei hanjop Yudea hanyen bi lewo nibou mben Yahudi nya ibingon mem gima igyai nimai biNoni.

² Mpe dima ne tto bou dem mem mben Yahudi ibon pesta kep Njap Ndig Ig Jibei Mpam Meng ri.

³Gima rino Yesus nikinjoi bat nya ipai biNoni “Ma ajo leu mpia dini ba, aug ei hanjop Yudea hanyen leu binhyepo yo di ibit Na ingat Ade midyai nya ei igyai him.

⁴Gino tungwagom joi sut ninyeng jei lene ku nide midyai nya bijo nding leu tungwatu nya igyai him bi. Abindei ba, tungwatu dihyeisi dini hagom ikan tut Ade midyai nya!” (

⁵Ipai nok lewo iba ingon com Noni bi.)

⁶Yesus pai biyok “Tto bou dem mem Da bigyo noro tut jeni ne jibon nikwesti mem jenti bikwop njap-njap.

⁷Bit bon tungwatu dihyeisi ingon mpo tut je kan bi. Noro ingon mpo tut Da drek dip gi dipai biyok bipia igyai munti nya kinei bibor.

⁸Nnaba jimbut hak ug bijibon pesta kep njap nindig. Noro dimbut bi lewo tto bou dem mem Da bigyo.”

⁹Yesus pai nok lene kuk No bigwam ei hanjop Galilea.

¹⁰Nikinjoi bat nya yuug bon pesta kep njap ndig dima leu lene Yesus cem ug noro mbut brei ei tungwatu nya igyai him bi.

¹¹Nibou mben Yahudi nya cem induk yam kwei binggok ser Yesus mem njap nindig dima bihig yam ser “Yesus No hantou i?”

¹²Tungwatu ningot ndig di induk yam kwei imang bibor yahamui nyahan biyam tut Yesus. Bihi ipai “No dima kei bibor.” Noro bihi isrep “Noni bindei srawir tungwatu nya imang bibor.”

¹³Noro hi brim ningkek bikon nihyet tut Yesus bi lewo yahagom ittin nibou mben Yahudi nya.

¹⁴Njap poi bu tirigi Njap Ndig Ig Jibei Mpam Meng ug ei nahacanti tu lene Yesus coi ug ei Tuhan De Ig ba, sindi ngginau tungwatu nya.

¹⁵Nibou mben Yahudi nya inga leu nindig bibor bihig yam ser “Nggon rino No dini ningon ki nok i? Noni coi pikor hi bi sren.”

¹⁶Yesus buhup “Mun di tibim ei duhui him kwei leu dingon kanti bi noro kwei leu Allah di cuk Da kwei ningon kanti.

¹⁷No di joi sut gima yai igbit Allah ningon kanti kan tut bipia Ditde ningginausi kwei leu Allah e, he kwei leu dingon kanti he e?

¹⁸No di ngginau tungwatu nya bit leu nonti ningon kanti bisau sut ninyeng di jei. Noro no di bisau sut gima kon no di cuk noni kwei ninyeng jeisi ningon sren ba, niris mun jo ei noniti bi.

¹⁹Apo Musa yai Allah nicukti bije bi e? Noro jigom bit nicukti dima cem bi. Nggon rino jibingon mem gima jiyai nimai biDa i?”

²⁰Yo di ningot dig dima ibuhup “Nung kui Na! Tou ribingon mem gima yai nimai biNa i?”

²¹Yesus buhup “Dibon mindur gom ngat mem Njap Nigwam Kep Ninghuisi leu api jinga leu sut.

²² Jipmot bat nya igyai nibon midut sunat bit leu Musa nicuk jeti. Nicuk jeti dima kwei leu Musa bi noro kwei leu jide pung di jintun him nya habiei nipou su. Gima rino jibon midut sunat bak munggwom pinai nya mem Njap Nigwam Kep Ninghuisi.

²³ Gino jibon midut dima mem njap nigwam kep ninghuisi leu binhyepo jipigau Puig Yahudi nicukti nya bi lene nggon rino jingon sibui sut Da drek dip gi dibindei ba, tungwagom kei hanyen mem Njap Nigwam Kep Ninghuisi i?

²⁴Ma jikes hon ba, jigwam nok nikei di mbus tungwatu nya ingonti bit leu ingkek dip di jo ei igyai him au. Noro ma jigwam nok nikei di ba ningon srenti bimbus ingonti.”

²⁵Timiei minu ndig Yerusalem ibou poi ipai biyam “Nibou mben Yahudi nya ibingon mem gima igyai nimai bak No dima bi e?

²⁶Jingat i! Noni tri nihyet ei tungwatu nya igyai him noro nibou nya isrep huk Noni bi! Mpaba ikan tut bipia Noni ne Nibou Ndig di teu tungwatu nya biyai niyaijo nijep biyok rin e?

²⁷Noro tirigi Nibou Ndig di teu tungwatu nya biyai niyaijo nijep biyok kwei lene tungwatu nya mikan tut nitimieisi bi. Lo, nyeni ikan tut No dima nitimieisi.”

²⁸Tirigi Yesus sisip ngginau kep yo dima ei Tuhan De Ig lene Noni ba nihyet nindig bipai biyok “Jikan tut Da e? Jikan tut ditimieisi e? Dikwei bit leu dingon kanti bi. No di ningon sren-srau cuk Da kwei. Jikan tut Noni bi,

²⁹noro dikan tut Noni lewo Noni cuk Da bidikwei leu Noni.”

³⁰Tirigi pai nok rino yo dima ipi bikat Noni noro hi brim ningkek mem ngget Noni bi lewo tto bou dem bigyo.

³¹Imang bibor sindi iba ingon com Noni bipai biyam “Mpe di Nibou Ndig di teu tungwatu nya biyai niyaijo nijep biyok kwei lene Noni mibon mindur mang bibor dor njiriek mindur di No dini bon kep dima yok e?”

³²Nimpung Farisi nya imiap tut Yesus ninghapti tug hon tungwatu ningot ndig di yahamui biyam tut Noni. Gima rino imam nindig nya kin Farisi nya icuk yo di igya ser Tuhan De Ig ibou poi kwei bikat Noni.

³³Yesus pai bak tungwatu ningot ndig di ingat rin ei Tuhan De Ig “Digwam bit je jei bi. Leu api dingkwei hanyen ndam No di cuk Da kwei ug ri.

³⁴Mporo jinggok ser Da noro jingat Da bu bi lewo bit bon jicoi ug ei mpia ttou nsi dino duug eisi dima kan bi.”

³⁵Lene nibou mben Yahudi nya ihig yam ser “Noni tin ei mem gima mbut ug ei siritou apino ingat Noni bu bi i? Mpaba Noni muug bong bit mben Yahudi di ibong ei mben Yunani ikieti bingginau mben Yunani ei itimieisi e?

³⁶Noni tri tut bipia inggok ser Noni noro ingat Noni bi ba, bit bon icoi ug ei mpia ttou nsi di Noni ug eisi dima cem kan bi. Nyeni imiap nihyet dima bi.”

³⁷ Ei njap ningwig honti di bon ninyeng mem Njap Ndig Ig Jibei Mpam Meng lene Yesus kiju biya leu api ba nihyet nindig bahara “Ma no di nggobiau kwei ndam Da bidut minyei.

³⁸ Lewo Allah nihyet pai ‘Minyei niyaijo nijep mibiam kwei leu no di ba ningon com Da ningonti.’ ” (

³⁹Yesus pai nok tut Allah Ninnei lewo ei nidipti bu ne yo di iba ingon com Noni igyai Allah Ninnei ei ingonti. Noro tirigi Yesus tri tut nihyet dini lene Allah Ninnei srek kwei ei ingonti bigyo lewo Yesus yai nikei-kau-keisi tug hon nimai ei biei salibti bigyo.)

⁴⁰Tungwatu ningot ndig imiap Yesus nihyet lene bihi di isrig ikieti ipai biyam “No dini ne Nabi[11] di ingon ya mem pima ri!”

⁴¹Hiter ipai “No dini ne Nibou Ndig di teu tungwatu nya biyai niyaijo nijep biyok ri.” Noro hiter isrep “No di Nibou Ndig di teu tungwatu nya biyai niyaijo nijep biyok nitimieisi leu hanjop Galilea bi.

⁴² Allah nihyet pai ‘Nibou Ndig di teu tungwatu nya biyai niyaijo nijep biyok ntun Nibou Ndig Daud him ba, nipmem srek tut Noni ei minu ndig Betlehem di Daud nitimieisi.’ ”

⁴³Gima rino tungwatu nya isrep yam tut Yesus.

⁴⁴Bihi ipi bikat Noni noro hi brim ningkek bingget Noni bi.

⁴⁵Tirigi yo di igya ser Tuhan De Ig ingkwei hanyen lene imam nindig nya kin Farisi nya ihig ser yok “Nggon rino jikat Noni kwei bi i?”

⁴⁶Yo di igya ser Tuhan De Ig ibuhup “Mbenjen! Nimiap tungwatu nya ighyet hi nok No dini nihyet bigyo!”

⁴⁷Farisi dima yok ibuhup “Noni ris jeni cem bijisrawir tu e?

⁴⁸Jimiap tut nibou mben Yahudi kin Farisi di ningon jo kep Noni tu e?

⁴⁹Noro tungwatu ningot ndig dima yok ingon dorti tut Puig Yahudi nicukti bi. Gima rino Allah sigion yok tu.”

⁵⁰ Nikodemus di mbrap bit Yesus nipou su di nggre kin nimpung Farisi nya cem hig ser nindigsi nya,

⁵¹“Bit leu nok gi ipas ei Puig Yahudi nicukti ne harin dima ikes hukum ei tungwagom dip nipou tirigi imbus ningonti ba, ihig yam tut niyai munti nya bigyo a.”

⁵²Nindigsi nya ibuhup “Apo nani cem atimieisi leu hanjop Galilea e? Ma anyohou kwop leu Allah nihyet bokti leu binhyepo angon huk niti bipia nabi hi kwei leu hanjop Galilea bi sren.” [

⁵³Gima ngwig lene yahagom intek gimahap ug ei ide ig bei.