Read Hatam YOHANES 8 Bible Online

YOHANES 8 - Hatam bible

YOHANES 8

²Njap bigyoti di hyep bu lene Noni ngkwei hanyen kwei ei Tuhan De Ig. Tirigi tungwatu nya yahagom ingwig kep Noni lene Noni gwam jug ba, sindi ngginau yok.

³Leu api guru Puig Yahudi nicukti nya kin Farisi nya ibuwak misop gom di cut ei sisar nicut tut yamti kwei ndam Noni bikes noni biya ei yahagom yoho bei,

⁴lene ipai bak Yesus “Guru e, ibou poi ittau kep misop dini hammi tirigi noni cut ei sisar nicut tut yamti leu api ikat noni kwei dini.

⁵ Nicukti di tug hon Musa cuk nye bipia suar iba tig bihwen sop di cut nok gini bimai ug. Noro ma apai igbit angon kanti ug e.”

⁶Ipai nok leu binhyepo isrou Yesus lene gima bon nituti mem ibipai kep Non drek dip. Noro Yesus ndun bou bitou kep dihyei ninjek dip lene ba ninda pijum bipas ei dihyeiti.

⁷Ibisau huk Noni ninno leu api Noni kon nibou kui bipai biyok “Disindui sut ba, no di bon sisar hi bigyo rima ba tig bihwen misop dini bibie a.”

⁸Pai nok rino Noni ndun bou bitou kep dihyei ninjek dip bipas ei dihyeiti hanyen bu.

⁹Tirigi nibou dima yok imiap Yesus nipaisi nok rino yahagom intek gimahap sindam ba, andig-ndau nya intek bibie. Lene Yesus gwam nigwamti lo, misop dima ya niyati.

¹⁰Lene Yesus kon nibou bitou kep noni lene hig ser “Yo dima ritou i? Hi pai kep na bi e?”

¹¹Noni buhup “Andigpoi e, hi bi.” Yesus pai “Kei Dani cem dipai kep na bi. Ambut hak ug noro ma abon sisar bu au.”]

¹² Lene Yesus pai bak yo di imang bibor dima hanyen bu “Dani ne nipigati mem dihyeisi dini ri. No di bit Da mbut mem nidinditi bi noro yai nipigati di niyaijo nijep.”

¹³ Noro Farisi nya ibuhup “Aba ahyet dima bimbrap gau Nanti. Gima rino ahyet dima ndo bindo di nijit binye bi.”

¹⁴Yesus buhup “E bi. Mbro nok gino dimbrap gau Danti lo, dipaisi dima nijit lewo dikan tut dikwei leusi kin duug eisi cem. Noro jikan tut dikwei leusi kin duug eisi bi.

¹⁵Jimbus tungwatu nya ingonti tug hon nisinati di ntun dihyeisi dini him. Noro dimbus tungwatu nya ingonti bi.

¹⁶Gino dimbus ingonti ne Ditde nimbus ingonti igbit rin lewo diya biDangkom bi noro Dicig di cuk Da kwei cem No ya tut Da ba.

¹⁷Nibokti di ipas ei jide Puig Yahudi nicukti pai ‘Gino ibou can ingat mun nyeng gom bou igyai him ba, ighyet ket ei yam hyetti lene ighyet dima nijit ri.’

¹⁸Dimbrap gau Danti ba, Dicig di cuk Da kwei cem mbrap gau Da.”

¹⁹Ihig ser Noni “Acig No hantou i?” Noni buhup “Ningat ne jikan tut Da igbit bi bijikan tut Dicig cem igbit bi. Gino jikan tut Da tu lene jikan tut Dicig cem.”

²⁰Yesus pai mun dini yok hagom mpe dino Noni ngginau tungwatu nya ei Tuhan De Ig ba, gwam dideu brua di icom mitiei mbusyamei eisi nijoti. Noro hi kat Noni bi lewo tto bou dem bigyo.

²¹Yesus pai biyok hanyen “Dimbut ri. Mbro nok gino jinggok ser Da lo, mijimai ei jide sisarti. Bit bon jibit Da ug ei mpia ttou nsi dima kan bi.”

²²Gima rino nibou mben Yahudi nya ihig yam ser “Leu ma Noni miyai nimai biNonti e? Lewo pai bipia bit bon hi bit Noni ug ei mpia ttou nsi dima kan bi.”

²³Lene Noni buhup “Jitimieisi jo bijehei ei dihyeisi dini noro dijuk leu anai hu kwei. Jikwei leu dihyeisi dini noro dikwei leu dihyeisi dini bi.

²⁴Gima ripo dipai bije bipia mijimai ei jide sisarti. Gino jingon jo kep bipia Dani ne No di ninyeng DANI DINGAT RIN bi ne mijimai ei jide sisarti.”

²⁵Ihig ser Noni “Anyeng tou i?” Yesus buhup “Dani ne no ripo dipai bije habiei su pima.[12]

²⁶Dipi bibou dimbrap tut mun nyeng mang bibor di bitut jeni ba, dipai kep je cem. Noro No di cuk Da kwei ningon sren-srau. Ditri tut nihyet di Noni sok ei Da dip hanyen bak tungwatu dihyeisi dini.”

²⁷Yo dima ingon kiowi tut mun di Yesus pai sut Nicigya.

²⁸Gima rino Noni pai biyok “Mpe dino jitas biei salib tut Munggwom Tungwatu Nipmot ne jikan tut bipia Dani ne No di ninyeng DANI DINGAT RI. Mpe dima lene mijikan tut bipia diyai midyai bit leu dingon kanti bi. Noro ditri tut nihyet di Dicig sok ei Da dip he.

²⁹No di cuk Da kwei cem ningat rin kin Da bikes Da ei bi lewo diyai midyai bit leu Nonti ningon kanti bikwop mmun-njap.”

³⁰Lene tungwatu nya imang bibor di imiap nihyet di Yesus tri tut iba ingon com Noni.

³¹Gima rino Yesus pai bak mben Yahudi di iba ingon com Noni “Gino jibit Ditde ningginausi lene jeni ne yo di itti kin Da nijit-jau ri.

³²Leu api mijingon dorti tut Allah nihyet di nijit-jau ba, Noni bindei kwek je leu awak bijiyati kwes drek dip.”

³³ Yo dima ibuhup “Nintun Abraham him bininok awak mem tungwatu nya hi bi sren. Gima rino ma ambot kep tut angon kanti dino apai bipia ‘nyeni miniyai gi kwek leu awak biniyati kwes dima ug e’.”

³⁴Yesus pai biyok “Dipai nijit bije bipia bikwop no di bon sisar ne no dima nok awak mem sisar.

³⁵No di nok awak tig mbier tut niceu nide ig bei nsi nya bi. Noro niceu nipmot tig mbier tut nicig nide ig bei nsi nya kikau.

³⁶Gima rino gino Allah Nipmot kwek je leu awak bijiyati kwes lene jinok awak bu bi sren.

³⁷Dikan tut bipia jintun Abraham him. Noro jibingon mem gima jiyai nimai biDa drek dip jingon di tunggwei sut Ditde ningginausi.

³⁸Ditri tut mun di Dicig ndo biDa noro jeni rino jiyai midyai bit leu nok jicig nicuk jeti.”

³⁹Yoni ibuhup “Nicig rino Abraham.” Yesus pai biyok “Gino jintun Abraham him bijinok nimunggwom bat nijit-jau nya lene mijiyai bram Abraham niyaisi.”

⁴⁰Ditri tut mun di nijit-jau di dimiap leu Allah bije hak. Noro jibingon mem gima jiyai nimai biDa. Abraham bon mun bit leu nok gima bi!

⁴¹Jiyai munti nya bram jicig niyai munti. Ibuhup “Ninok munggwom di isrek tug hon nibon sisarti bi. Nyeni nicig gom ngat di Allah Nongkom he.”

⁴²Lene Noni pai biyok “Ningat ne gino Allah ne jicig rin lene mijingon ngakei Da lewo dikwei leu Allah. Dikwei bit leu dingon kanti bi noro Noni rino cuk Da kwei.

⁴³Nggon rino jingon dorti tut dihyet bi i? Jingon dorti bi lewo jingon tunggwei nihyet di tibim ei duhui him.

⁴⁴Bilis ne jicig rin ba, jiyai midyai bit leu jicig ningon kanti. Noni ne nihwen mun cig rin habiei leu nimbie him. Noni tti kin Allah nihyet di nijit-jau bi sren lewo nijit-jausi ninyeng gom jo ei ningonti bi. Tirigi noni ris kep tungwatu nya lene gima yai bram nonti niyai kepti lewo noni ne niris kep mun cig kin nibousi mem niris yamti hagom ri.

⁴⁵Noro Dani ditri tut nihyet di nijit-jau. Leu gima rino jingon jo kep dihyet bi.

⁴⁶Tou leu jikieti di ndo ei nibreisi bipia dingon mui bidibon sisar ninyeng gom tu i? Gino ditri tut nihyet di nijit-jau lene nggon rino jingon jo kep Da bi i?

⁴⁷No di ntun Allah him ngig nitingou mem Allah nihyet. Noro jintun Allah him bi. Gima rino jingig jitingou mem dihyet bi.”

⁴⁸Mben Yahudi ihig ser Noni “Gi nipai sut Na bipia Nani ne mben Samaria di nung kui Na rin e? Gima ne anghapti di nijit rin bi e?”

⁴⁹Noni buhup “Nung kui Da bi. Dikon Dicig ninyeng noro jipai Da kinei.

⁵⁰Dingon bisau sut gima tungwatu nya ikon dinyeng bi. Noro tungwagom rino bisau sut gima diyai dinyeng di jei ba, Nongkom ne nikei di mbus dingonti ri.

⁵¹Dipai nijit bije bipia no di bit dihyet mai bu bi sren.”

⁵²Lene ibuhup bak Yesus “Nogindini jo nibreisi mem nye bipia nung kui Na! Abraham mai leu su ba, nabi nya cem imai leu su noro atri tut bipia no di bit ahyet mai bu bi sren.

⁵³Akan bipia anyeng jei dor njiriek icig Abraham e? Noni mai leu su ba, nabi nya cem imai leu su. Nani ne tou i? Bit bon anyeng jei dor njiriek icig Abraham kan bi!”

⁵⁴Yesus buhup “Gino dibingon mem gima dikon dinyeng ne dinyeng jeisi dima bon ninyeng bi. Noro gi kon dinyeng ne Dicig di jipai sut Noni bipia jide Allah rin lo,

⁵⁵jikan tut Noni igbit bi. Noro dikan tut Noni igbit. Gino doom ser bipia dikan tut Noni bi ne dinok no di ris ba, dinoyam kin jeni. Noro dikan tut Noni bidibit nihyet.

⁵⁶Jicig Abraham yai nillei lewo noni kan tut bipia noni mingat Dani bou niyai him. Tirigi noni ngat Da tu lene ningon llei bibor!”

⁵⁷Lene mben Yahudi ipai bak Yesus “Ade njap ug ei ari bingwam ningot muhwi bigyo. Notou angat Abraham bou ayai him i?”

⁵⁸Yesus buhup “Dipai nijit bije bipia nipou tirigi Abraham srek bigyo ne DANI DINGAT RI.”

⁵⁹Gipai nok rino mben Yahudi iteu tig mem gima ibihwen Noni. Noro Noni ku No nyahan bimbut leu Tuhan De Ig.