Read Hatam YOHANES 9 Bible Online

YOHANES 9 - Hatam bible

YOHANES 9

¹Tirigi Yesus mbut lene Noni ngat no di niyai tu habiei leu nipmem ninghopti.

²Yo di igya kui Yesus ihig simber Noni “Guru e, tou ribon sisar di bindei dino no dini srek kin niyai di tu i? Nonti e, he nicig-nipmem nya e?”

³Yesus buhup “Nide sisar bindei niyai di tu ba, nicig-nipmem nya ide sisar bindei niyai di tu cem bi. Gi niyai tu dima bon nikwesti mem tungwatu nya ingat Allah de nisindemti di bindei ba, noni kei hanyen.

⁴Tirigi njap jei yo ne suar nyeni igyai midyai di Allah di cuk Da kwei pima Nide nya. Jei bi ne mmun nggai nye ri. Mpe dima lene bit bon hi yai midyai bu kan bi.

⁵ Tirigi dingat rin ei dihyeisi dini lene Dani ne nipigati di piga digai tungwatu dihyeisi dini nya ri.”

⁶Pai nok rino Yesus nduk nirai ei dihyeiti biya binggwei nok igkrop lene ba dihyei dima bidip no di niyai tu niyai mpau,

⁷bicuk noni “Aug ba, apiap ayai ei Ugyou Siloamti.” (Gi ikiek ninyeng Siloam ne noyam kin ‘Pinak Tu’.) Gima rino no dima ug bipiap niimaisi leu api ngkwei hanyen kin niyai di da tu.

⁸No dima nide yo di ninttig-tta nya kin yo di ingat kep noni tirigi tindei tungwatu nya bahara yok pima ihig yam “No dini ne no di gwam bitindei tungwatu nya bahara yok pima rin bi e?”

⁹Bihi ipai “Noni ne no pa ri.” Noro hiter isrep “Noni ne no dima rin bi noro ikreng yam he.” Noro no dima pai biyok “Dani ne no pima ri.”

¹⁰Yo dima ihig simber noni “Mindei ribindei dino ayai da hanyen i?”

¹¹Noni buhup “Yesus nduk nirai ei dihyeiti biya binggwei leu api bidip diyai mpau bicuk da ug ei Ugyou Siloam bidipiap diyai eisi. Lene duug ei ugyou dima bidipiap diimaisi apino diyai da hanyen.”

¹²Ihig ser noni “No di cuk na dima ritou i?” Noni buhup “Dikan tut bi.”

¹³Yo dima ibuwak no di niyai da hanyen biyuug ngat Farisi nya.

¹⁴Yesus ba dihyei di ya biwer igkrop bibindei ba, no dima niyai da hanyen mem Njap Nigwam Kep Ninghuisi.

¹⁵Farisi nya cem ihig simber noni tut mun di bindei dino niyai da hanyen. Noni buhup “No dima ba dihyei di ya biwer igkrop bibidip diyai mpau leu api dipiap diimaisi ei minyeiti apino diyai da hanyen.”

¹⁶Farisi nya ibou poi isimbot kep biyam “Jo nibreisi bipia No di bindei ba, no dini niyai da hanyen ntun Allah him bi lewo niyai munti dima bit nidimig sutti tut Njap Nigwam Kep Ninghuisi bi.” Noro hiter isrep “Notou no di bon sisar bon mindur dini i?” Lene isrep yam.

¹⁷Gima rino Farisi nya ihig simber no dima mbigom kin bu “Ambot kep tut No di bindei ba, ayai da hanyen i. Apai sut Noni ne tou i?” No dima buhup “Noni ne nabi ri.”

¹⁸Noro nibou mben Yahudi ingon srep no di mbot kep tut bipia nipou ne niyai tu noro tini bu ne niyai da hanyen. Gima rino isok ighyet mem nicig-nipmem nya bikwei,

¹⁹bihig simber yok “No dini jipmot rin e? Jipai sut noni bipia niyai tu habiei leu nipmem ninghopti e? Gi nok lene notou niyai da hanyen i?”

²⁰Nicig-nipmem nya ibuhup “Nikan tut bipia noni ne nyeni nipmot ningat rin ba, niyai tu habiei leu nipmem ninghopti.

²¹Noro tut niyai da hanyenti ne nikan tut bi ba, nikan tut no di bindei di noni kei hanyen cem bi. Ma jihig ser nonti. Noni ndigpoi su ba, mibuhup jihyet a.”

²²Nicig-nipmem nya ibuhup nok lewo idigit tut nibou mben Yahudi nya di igyok ingon gom tut bikwop no di mbot kep tut bipia ningon jo kep Yesus nok Nibou Ndig di teu tungwatu nya biyai niyaijo nijep biyok lene micom noni leu yo di inggre kin mben Yahudi ide mbusyamei.

²³Tut gima rino nicig-nipmem nya ipai biyok “Noni ndigpoi su ba, jihig ser nonti.”

²⁴Lene nibou nya ihig no dima kwei mbigom bu bibidip huk “Ma aheng bitug hon Allah ninyeng bipia ma apai mun di nijit-jau binye. Nikan tut bipia No dima ne No di bon kep sisar ri.”

²⁵No dima buhup “Noni bon kep sisar e, he bon kep sisar bi e? Dikan tut bi. Noro dikan tut mun nyeng gom. Nipou ne diyai tu noro tini bu ne diyai da hanyen tu.”

²⁶Lene ihig simber noni hanyen bu “No dima nggon ndei na i? Notou Noni bindei ba, ayai da hanyen i?”

²⁷No dima buhup “Dimbot kep tut hagom bije tu noro jijoi sut dihyet bi. Nggon rino jihig da bidindat kep hanyen bu i? Mpaba jeni cem jijoi sut jitti kin Noni e?”

²⁸Lene iba ighyet di ten bisrep “E bi! Atti kin Noni noro nye dini nitti kin Musa.

²⁹Lewo nikan tut bipia Allah mbrap bit Musa. Noro nikan tut No dima nitimieisi bi.”

³⁰No dima buhup “Mbenjen! Jikan tut nitimieisi bi noro Noni bindei bidiyai da hanyen!

³¹Ningat ne Allah buhup yo di ibon kep sisar ighyet bi. Noro buhup yo di ikuk yok biNoni kin yo di ice tut bibit Nonti ningon kanti yahagom ighyet.

³²Habiei leu nimbie him kikau kwei bipek ammani kep ne hi gi miap tut no di sindem mem gima bindei ba, no di niyai tu tirigi nipmem srek tut hi di niyai da hanyen nok gima bigyo.

³³Gino No dima ntun Allah him bi ne bit bon Noni bibon mindur cem kan bi.”

³⁴Apino nibou nya ibuhup “Mbenjen! Abon kep sisar habiei leu apmem nisrek tut nati kikau kwei bipek ammani kep leu api abingon mem gima angginau nyeni e?” Hon kep njap dima kui ne icom noni leu yo di inggre kin mben Yahudi ide mbusyamei.

³⁵Yesus miap tut gino nibou nya iciu ser no dima ninyeng leu daptar di tibim tut yo di inggre kin mbusyamei Yahudi inyeng lene Noni nggok bihig ser noni “Aba angon com Munggwom Tungwatu Nipmot e?”

³⁶No dima buhup “Andigpoi e, ando igbit Munggwom Tungwatu Nipmot bida leu binhyepo diba dingon com Noni.”

³⁷Yesus buhup “Angat Noni bou ayai him tu. Noni rino sindi mbrap bit na nogindini.”

³⁸No dima pai “Tuhan e, diba dingon com Na.” Pai nok leu api ba nibiau bicom mpia ei Yesus Noho bei.

³⁹Lene Yesus tri tut “Dijuk kwei ei dihyeisi dini nok Nikei di mbus tungwatu nya ingonti leu binhyepo yo di igyai tu nya igyai da hanyen lo, yo di igyai da nya igyai tu hanyen.”

⁴⁰Farisi nya ibou poi di igya ei mpia dima imiap Yesus nipaisi leu api ihig ser Noni “Apaisi dima ndo bipia nyeni cem niyai tu e?”

⁴¹Yesus buhup “Gino jiyai tu ne jingon mui bi. Noro gi jipai sut jenti bipia jiyai da lene gima ndo bipia jingon mui yo.”