Read Hatam KISAH 1 Bible Online

KISAH 1 - Hatam bible

KISAH 1

¹ Dipas srat gi nigom bina di Teofilus tut Yesus de midyai nya kin ningginau tungwatu nyati tu. Gima hagom leu njap di Noni kinyon ei Nide midyai nyati,

²kikau ug bipek njap di Allah kon Noni ug ei gwamti hanyen. Noro nipou tirigi Noni ug ei gwamti bigyo lene Noni pingok yo di igya kui Noni di mbus yok ei su nya ingonti tug hon nisindemti leu Allah Ninnei.

³Niabiati Noni yai nimai bikiju hanyen lene Noni ndo niyaijo nijepti brei biyok tug hon nisinati mang bibor mem njap ningot bitai. Yoni ingat Noni brei bou igyai him leu api Noni simbot kep tut Allah Ninyeng Tak Kepti biyok.

⁴ Tirigi Noni ningat rin bit yok[1] lene Noni pai biyok “Ma jintek leu minu ndig Yerusalem au. Noro ma jimem kep ser mun di Dicig preu ei mem je bit leu nok gi dipai bije pima tu.

⁵ Lewo Yohanes tur tungwatu nya ei minyeiti noro ei njap poi bu lene Allah mitur je ei Allah Ninneiti.”

⁶Tirigi yo di igya kui Yesus induk yam ei bit Noni lene ihig ser Noni, “Tuhan e, jei bi ne ma ata mben Israel Inyeng Tak Kepti hanyen rin e?”

⁷Yesus buhup, “Dicig Nongkom kos tut nituti kin nikwesti mem mun dima yok hagom. Noni ce tut mun dima yok jo ei nibreisi mem je bigyo lewo jem bou nikos tutti dima mem Nonti.

⁸ Noro tirigi Allah Ninnei srek kwei ei jeni dip lene Noni misindem tut je apino mijitri tut mun di jingat bou jiyai him tut Dani ei minu ndig Yerusalem kin hanjop Yudea kin Samaria hagom ba, kikau ug bipek minu nohon keti cem.”

⁹ Niabiati Yesus pai nok leu lene Allah kon Yesus bikui ug ei gwamti bou igyai him kikau bingat ningat bu bi lewo bumbuhui ttou gom nggai kep Noni.

¹⁰Tirigi itou kep kui mpia-bbed him nggilun bicap ser Yesus nikuisi lene ibou can di ijuk sinsun di tiei kei ittau kros bigya ei ikieti,

¹¹bipai biyok, “Je di mben Galilea e, nggon rino jiya hak bijitou kep mpia-bbed him i? Allah kon Yesus bikui ug ei gwamti leu joho bei. Noni mikwei hanyen tug hon nisinati di jingat bou jiyai him aponi dima yo.”

¹²Gima ngwig leu lene yo di igya kui Yesus ingkwei hanyen leu nungug Zaitun ndam minu ndig Yerusalem lewo minu dideu yam.

¹³ Tirigi ikwei krau minu ndig Yerusalem hanyen tu lene icoi ug ei ig bei di ibong ser ba, ikui bidem yam ei ninsi di jo anai. Petrus kin Yohanes kin Yakobus kin Andreas kin Filipus kin Tomas kin Bartolomeus kin Matius kin Yakobus di Alfeus nipmot kin Simon Patriot kin Yudas di Yakobus nipmot ingat rin ba,

¹⁴yahagom iba ingon gom bidem yam ei mem ingat nadi bit leu nok igyai kepti. Yo dini ingat nadi bit sop nya kin Maria di Yesus nipmem kin nikinjoi bat nya cem bikwop njap.

¹⁵Njap poi ser lene yo di ingon jo kep nya ibou sratus gom ningot can idem yam lene Petrus kiju bitri tut nihyet. Noni pai biyok,

¹⁶“Disut bat jen, suar mun di Allah Ninnei pai tug hon Daud nuhui him ei Allah nihyet bokti tut Yudas di bie tut yo di ikat Yesus pima hagom cut igkep noni hak ug.

¹⁷Yudas srig nyeni ikieti ba, Yesus dimig noni cem leu binhyepo noni yai midyai bit nye.” (

¹⁸ Yudas ba mitiei di noni yai leu niyaisi di sibut buug bipek dihyei hanjop nsi gom. Noni cut bibiam mpia ei sirima ba, ninghop tigwau bimai ug.

¹⁹Timiei minu ndig Yerusalem yahagom imiap tut mun di cut igkep noni. Gima rino iba yonti ighyet bijem mpia ttou nsi dima ninyeng Akeldama gi ikiek nihyet dima lene nibimbiti pai ‘Dihyei Ninggrom Siber Eisi’.)

²⁰ “Lewo Srat Mazmur pai ‘Ma nide ig bei dem kep ha he bong ba, tungwa hi bong ser bu bi.’ Nok gima cem ipas srat bokti ‘Ma hiter ya luei nohoti biyai kep nide midyai.’

²¹Gima rino suar nyeni indo tungwagom di srig nyeni ikieti mem nijam di Tuhan Yesus ningat rin bit nye ei dihyeisi dini,

²² habiei leu nimbie him tirigi Yohanes kinyon ei nitur tungwatu nya ei minyeiti[2] kikau kwei bipek mpe di Allah teu Noni leu ikieti. Suar tungwagom di ngat Yesus nikiju hanyenti bou niyai him miba no bikum nyeni bu.”

²³Gima rino yo di idem yam dima idimig ibou can ba, hi ninyeng Yusuf gi ijem ninyeng hi Barsabas (ninyeng hi Yustus cem) kin Matias.

²⁴Lene ingat nadi bipai “Tuhan e, akan bidem tut mun di jo ei tungwatu yahagom ingonti. Gima rino ando igbit tungwagom leu ibou can dini igom di adimig ei su,

²⁵leu binhyepo noni yai midyai dem kep nok no di ya kui Nani biya luei Yudas di kes nye ei buug ei mpia nimai nya ide tu nohoti.”

²⁶Pai nok leu rino iko binggok tut ibou can dima leu api mun di iko dima ndo Matias. Gima rino ikon noni ninyeng nok no di ya kui Yesus nijep di ba no bikum ibou simnaibrimiggom bu.