Read Hatam KISAH 13 Bible Online

KISAH 13 - Hatam bible

KISAH 13

¹Nabi nya kin guru nya ibou poi yo rinaha ei yo di mbusyamei minu ndig Antiokhia nya ikieti. Yo dini ne Barnabas kin Simeon di ijem ninyeng hi Motrom kin Lukius leu minu ndig Kirene kin Menahem ndig bit Nibou Ndig Herodes ba,[8] ningon kieti noni tirigi inok munggwom yo kin Saulus.

²Mpe di gom tirigi ikuk yok bak Tuhan bigyem njita bi mem nituti poi lene Allah Ninnei pai biyok “Ma jidimig Barnabas kin Saulus ei mem Da leu binhyepo igyai midyai di dikos tut ei mem yok tu.”

³Niabiati yo di inggre kin mbusyamei igyem njita bi mem nituti poi bingat nadi cem leu api ikes inda ei Barnabas kin Saulus ibou dip bikes yok bimbut.

⁴Barnabas kin Saulus imbut birop ug ei minu ndig Seleukia bit leu nok Allah Ninnei nicuk yokti. Leu api ibri kibar minyei gom biyuug ei Mios Siprus.

⁵Tirigi ikwei krau minu ndig Salamis lene itri tut Allah nihyet bikwop ei mben Yahudi ide ig mbusyamei nya. Yohanes-Markus cem ningat rin bit yok bimpu yok.

⁶Lene ijo leu minu ndig Salamis bigya bidem Mios Siprus kikau ba, ikwei krau minu ndig Pafos ei mios dima nohon keti. Leu api yuum Bar-Yesus di mben Yahudi gom ei minu ndig dima. Nung kui no dini bitri tut nonti bipia noni ne nabi ri.

⁷No dini jem nisut bit Sergius-Paulus di nok nibou mios dima di ningon ki ba, nintin kimbou cem. Mpe dima lene nibou dima hig Barnabas kin Saulus kwei bigya ei noho bei lewo noni joi sut gima ngig nitingou mem Allah nihyet.

⁸Tungwatu nya iba nihyet Yunani bijem no di nung kui no pima ninyeng hi Elimas. Ba, no dini tte tut Barnabas kin Saulus buhum nibou ninsi ser nhyema noni ba ningon com Yesus au.

⁹Noro Saulus di ijem ninyeng hi Paulus pri niyai kep nung dima tug hon nisindemti leu Allah Ninnei,

¹⁰bipai binoni “He na di antun Bilis him e, atte tut mun di kei nya hagom ba, nani ne nicom biei mpup ris tungwatu nya cig ri. Nggon rino anggek tut Allah nikos tutti mem gima teu tungwatu leu sisar biyai niyaijo nijep biyok kikau ba, akes hon kan bi i?

¹¹Nogindini angat i! Tuhan ninda ndig tak kep na ba, mbigom ayai tu apino bit bon angat mpia njap bi mem njap poi.” Hammi tirigi Paulus pai bak nok rino nidinditi nggai kep Elimas leu lene noni tibap-tibap wai binggok no di krau ninda bicen no.

¹²Tirigi nibou mios dima ngat mun di cut igkep Elimas bou niyai him lene ningon jo kep Yesus lewo nggap leu tut Tuhan ningginausi nindig bibor.

¹³Lo bi lene Paulus kin nisut bat nya ibri kibar minyei ei minu ndig Pafos bibitot minyei ngwa dip ug ei minu ndig Perga ei hanjop Pamfilia. Yoni yuug krau lene Yohanes-Markus kes yok bingkwei hanyen ug ei minu ndig Yerusalem.

¹⁴Ba, yo cin dima ijo leu minu ndig Perga bimbut imig ug ei minu ndig Antiokhia ei hanjop Pisidia leu api icoi ug ei mben Yahudi ide ig mbusyamei mem ide Njap Nigwam Kep Ninghuisi bigwam bit yo di idem yam ei su.

¹⁵Niabiati nibou mbusyamei gom kwop ayat leu Puig Yahudi nicukti nya kin srat nabi nya ide cem tu lene nibou nya icuk hi bihig ser Paulus nya bipai “Nisut bat jen, gino jikwei sut nihyet di biwin kep tungwatu ingonti lene ma jitri tut nihyet dima binye hak ug.”

¹⁶Gima rino Paulus kiju biya lene kimut ninda kep yok bipai biyok, “Disut bat je di mben Israel kin je di nindigsi di jikuk je bak Allah e, ma jingig jitingou mem dihyet.

¹⁷ Mben Israel ide Allah dimig ide pung di intun him nya leu api bindei ba, ibong ingkiaisi ei minu Mesir bidigek bibor. Leu api Noni ba nisindemti di nindig bibor bibuwak yok kwei leu minu dima.

¹⁸ Noni om ningon tut yok drek dip igyai munti nya kikau mem ari bingwam ningot bitai ei iggum ndigsi.

¹⁹ Noni njei bitot mben ngkiai nya nitindur muhwindacan bitimek bingwig ei Kanaan leu api kwas minu dima hagom tut mben Israel leu binhyepo igyai minu dima titut yam binok ide minu ninda rom.

²⁰ Mun di pek kep dima yem ari bingwam sratus bitai ningot muhwi. Gima ngwig leu lene Noni ta nikei nya di inyeng tak kep yok kikau ug bipek nijam dino Nabi Samuel kiju mem yok kep.

²¹ Tirigi mben Israel ibingwam biyahara mem nibou ndig gom mem gima ninyeng tak kep yok lene Allah dimig Saul di Kis nipmot di ntun Benyamin him binok nibou ndig mem yok kikau ei ari bingwam ningot bitai.

²² Tirigi Allah cut Saul ninyeng nibou ndig leu lene Noni dimig Daud binok nibou ndig mem yok bu. Allah pai sut Daud ‘Jo nibreisi mem Da bipia Daud di Isai nipmot yai dingon di llei sut noni. Noni yai midyai hagom bit leu dingon kanti.’

²³Allah ba yo di intun Daud him bitin ei No di teu mben Israel leu sisar biyai niyaijo nijep biyok bit leu nok nipreu ei mem yokti tu. No di teu mben Israel leu sisar biyai niyaijo nijep biyok pima ne Yesus ri.

²⁴ Nipou tirigi Yesus kinyon ei Nide midyai nyati bigyo lene Yohanes tri tut bak mben Israel leu binhyepo ittin ser ide sisar bikiek ndam Allah leu api itur yok ei minyeiti.

²⁵ Tirigi Yohanes yai nide midyai bidideu ningwigsi lene noni hig ser tungwatu nya ‘Jikan bipia dani ne tou i? Jingon ya mem tungwagom noro dani rin bi. He jingat i! No dima ya abia kep da kwei. Dem mem gima dimpu Noni bidikwek Nide srop leu nimig jou bi.’

²⁶Disut bat je di jintun Abraham him kin je di nindigsi di jikuk je bak Allah e, Allah sok nihyet tut niteu leu sisarti kin niyaijo nijep kwei bak nyeni yahagom.

²⁷Yesus ne No di teu tungwatu leu ide sisar biyai niyaijo nijep biyok ri. Noro timiei minu ndig Yerusalem kin ide nibou nya ikan tut bi. Yoni ingon dorti tut nabi nya ide ningginausi di ide nibou nya ikwop bikwop Njap Nigwam Kep Ninghuisi bi. Leu api ijem nimai gau Yesus. Tug hon nisinati dima lene ibindei ba, nihyet di nabi nya itri tut Yesus nipou su pima pek kep tug hon Noni.

²⁸ Mbro nok gino bit bon yo dima ipai mun mem ibisu tindei kan bi lo, yahara Pilatus mem gima noni yai nimai bak Yesus.

²⁹ Niabiati yo dima igyai hagom bit leu nok Gi Preu Nitimiei bokti pai sut Nontiti tu lene icug ningut leu biei salib bitig ei hak mihyeti.

³⁰Noro Allah win Yesus hanyen leu nimai eisi.

³¹ Leu api Yesus ndo Nonti brei bak yo di ibit Noni ei hanjop Galilea ug ei minu ndig Yerusalem mem njap mang bibor. Nogindini yo dima itri tut kep bak mben Israel bipia ingat Yesus Nonti bou igyai him tu.

³²Gima rino nogindini nikwei tri tut Nihyet Di Kei bije. Allah preu ei mem ide pung di intun him nya tut mun nyeng gom nipou su,

³³ lene Noni bindei ba, mun dima pek kep mem nye di intun yoni him tirigi Noni win Yesus hanyen leu nimai eisi. Lewo Srat Mazmur pasar can pai ‘Nani ne Dipmot ri. Njap di ammani ne Dani dinok Acigya.’

³⁴ Allah win Noni hanyen leu nimai eisi tu. Bit bon ningut kroi ei jui nsi kan bi. Tut gima ne Allah pai ‘Diyai nipreu eisi di kei di kwes-kwau bipror yon kan bi di dipreu ei mem Daud pima bije.’

³⁵ Bit leu nok ayat hiter pai ‘Ace tut Ade awak di ningon gom ningut kroi ei bi.’

³⁶Daud yai kep nide midyai bit leu Allah ningon kanti mem noni bingwig leu api noni cem mai. Itig ningut noyam kin itig nidigup bat-nidigai bat nya ingut apino ningut kroi ei jui nsi bihigom.

³⁷Noro Yesus di Allah win leu nimai eisi ningut kroi ei bi.

³⁸Disut bat jen, ma jiyok ngon kep mungkun bipia nihyet tut nikos ser sisarti tibim ei jitingou nsi nogindini tug hon Yesus.

³⁹Ma jiyok ngon kep mungkun bipia no di ningon jo kep Noni miningon ngun. Lewo bit bon Allah de Puig Yahudi nicukti bindei bijingon ngun kan bi.

⁴⁰Gima rino suar jitindei ser mun di nabi nya isok kep tungwatu nya tut leu binhyepo mun dima cut igkep je bi. Nabi nya ipai,

⁴¹ ‘Je di jihyet wer mpi hi tut Allah e, ma jiyok ngon kep gini. Mijinggap leu sut bijisar hak ug. Mbro nok gino tungwagom mbot kep tut brei bije lo, jingon jo kep Ditde midyai di diyai nya mem nijam dini bi.’ ”

⁴²Tirigi Paulus kin Barnabas yehei leu mben Yahudi ide ig mbusyamei lene yo di idem yam dima ihig yok hanyen kwei mem Njap Nigwam Kep Ninghuisi gi nidipti bu leu binhyepo itri tut nihyet bibinut hi kin bu.

⁴³Niabiati tungwatu pima yok yahagom intek gimahap bingwig leu lene mben Yahudi imang bibor kin ngkiai nya di itti kin puig Yahudi ibit yok. Gima rino Paulus kin Barnabas imbrap bit yok bibiwin kep ingonti leu binhyepo iba ingon com Allah nisingat tut yokti.

⁴⁴Njap Nigwam Kep Ninghuisi gi nidipti bu lene timiei minu ndig Antiokhia nya yahagom idem yam leu binhyepo imiap kep Allah nihyet.

⁴⁵Tirigi mben Yahudi ingat lo, tungwatu ningot ndig dima idem yam ei su lene ingon kinei sut Paulus kin Barnabas bipai Paulus kinei bitte tut nihyet di noni tri tut hagom.

⁴⁶Noro Paulus kin Barnabas ibrim ingkek kep yok bibuhup “Suar nitri tut Allah nihyet bije nipou bibie ug e. Noro jenti jikos tut bipia jidem mem jiyai niyaijo nijep bi drek dip gi jikou sut nihyet dima. Gima rino nogindini nikes je ei leu ba, nitri tut nihyet bak ngkiai nya.

⁴⁷ Lewo Tuhan nicuk nyeti pai ‘Dindo nani ba, anok ninjeng di piga digai ngkiai nya. Ma abindei ba, niteu leu sisarti kin niyaijo nijep kieng kep ngkiai nya ei dihyeisi dini hagom.’ ”

⁴⁸Tirigi ngkiai nya imiap nihyet dima rino ingon llei bibor binggei sut Tuhan nihyet. Ba, bikwop yo di Allah dimig yok ei mem igyai niyaijo nijep yahagom ingon jo kep Yesus.

⁴⁹Gima rino Tuhan nihyet kieng kep minu dima nisurti-nipekti.

⁵⁰Noro mben Yahudi ikes ingon bak andigpoi di inyeng jei nya ei minu ndig dima kin sindig di inggre kin nimpung di inyeng jei nya di ikuk yok bak Allah cem. Yo dini ikes ingon kanti bak tungwatu nya bibindei ba, ihwen bit Paulus kin Barnabas bijji yok leu ide minu ndig dima.

⁵¹ Leu api Paulus kin Barnabas ikit imig jou tut dihyei ndung di dimbos leu imig nok mun di bindo di bipingok ingonti leu lene irop ug ei minu ndig Ikonium.

⁵²Yo di sindi ingon jo kep Tuhan ei minu ndig Antiokhia ingon llei bibor ba, igyai nisindemti leu Allah Ninnei cem.