Read Hatam KISAH 15 Bible Online

KISAH 15 - Hatam bible

KISAH 15

¹ Mpe dima lene tungwatu ibou poi ijo leu hanjop Yudea biyuug ei minu ndig Antiokhia ba, itri tut bak yo di inggre kin mbusyamei nya bipia gino igyai midut sunat bit leu nok Puig Yahudi nicuk yokti bi ne bit bon igyai niteu leu sisarti kin niyaijo nijep cem kan bi.

²Paulus kin Barnabas isrep tut yo dima drek dip ide ningginau yokti dima nindig bibor. Gima rino yo di inggre kin mbusyamei idimig Paulus kin Barnabas kin timiei minu ndig Antiokhia nya ibou poi bipinak yok ug ei minu ndig Yerusalem leu binhyepo ihig ser yo di igya kui Yesus kin nibou mbusyamei nya tut munhyet dini.

³Yo di inggre kin mbusyamei nya yehei sut Paulus nya ug ei minu ndig dima nisai. Leu api Paulus nya igya bidem hanjop Fenisia kin Samaria bitri tut bak tungwatu nya bipia ngkiai nya ingon jo kep Allah tu. Ighyet di itri tut dima bindei ba, yo di inggre kin mbusyamei nggi minu dima ingon llei bibor.

⁴Tirigi Paulus nya ikwei krau minu ndig Yerusalem lene yo di inggre kin mbusyamei kin yo di igya kui Yesus kin nibou mbusyamei nya yahagom igya um yok. Lene Paulus kin Barnabas ipui kep Allah de midyai di Noni bibon tug hon yoni.

⁵Noro yo di ingon jo kep nya ibou poi di inggre kin nimpung Farisi isrep tut yok bipai “Suar ngkiai nya di ingon jo kep Yesus igyai midut sunat bibit leu Puig Yahudi nicukti nya cem.”

⁶Lene yo di igya kui Yesus kin nibou mbusyamei nindigsi nya induk yam ei gom leu binhyepo isimbot kep biyam tut munhyet dini.

⁷ Iba ighyet bidahat yam ninno tu lene Petrus kiju biya lene pai biyok “Disut bat jen, jikan tut bipia Allah dimig da leu jikieti nipou su leu binhyepo ditri tut Nihyet Di Kei bak ngkiai nya apino yoni cem imiap nihyet ba, ingon jo kep Yesus.

⁸ Ba, Allah di kan bidem tut mun di jo ei tungwatu ingon bei ndo brei binye bipia Noni singat tut ngkiai nya tirigi Noni bindei ba, Ninnei srek kwei ei yoni cem ingonti bit leu nok Noni srek kwei ei nyeni cem ingonti nipou su.

⁹Allah mig mbus nyeni kin yoni ter leu yam bi. Noni yai ingon kwes kei tug hon ide niba ningon com Noniti.

¹⁰Nggon rino jisrep tut Allah ningon kanti tug hon mun di buhun di jikes ei yo dima inghat dip i? Lewo bit bon nyeni ide pung di intun him nya kin nyeni cem ibiang mun dima kan bi.

¹¹Ningat ne nyeni ingon jo kep bigyai niteu leu sisarti kin niyaijo nijep cem tug hon Tuhan Yesus di singat tut nye. Lene nok gima tut yoni cem.”

¹²Gima rino yahagom ikimut yuhui bigwam nyahan bingig itingou mem Paulus kin Barnabas ighyet di itri tut Allah de mindur kin bindo di Noni bibon tug hon yoni ei ngkiai nya ikieti ug e.

¹³Niabiati ikes ighyet hon leu api Yakobus pai biyok “Disut bat jen, ma jintu kep dihyet dini!

¹⁴Nogindi pa Simon pai brei bije tut Allah di singat tut ngkiai nya ei nimbie him tirigi Noni dimig keret gom leu ngkiai nya ikieti leu binhyepo inok Nide limwa nya pima.

¹⁵Mun dini noyam kin nihyet di tibim ei nabi nya yuhui him. Lewo Allah Nihyet pai binye,

¹⁶ ‘Ei nidipti bu ne midikwei hanyen bidingot Daud de ig lewo ig dima tti tu. Mbro nok gino ig dima timek bingwig su lo, midikinding hanyen,

¹⁷leu binhyepo tungwatu nindigsi bitut ngkiai nya di dinyeng tak kep yok inggok ser Tuhan ba, yahagom iba ingon com Noni.’ Gima ne Tuhan nihyet rin,

¹⁸lewo Noni tri tut mun dini yok habiei ei nimbie him.”

¹⁹Yakobus binut bu bipai “Dipai dingon kanti brei bije bipia ma nyeni ibindin ngkiai nya di sindi ingon jo kep Allah au.

²⁰ Noro ma ipas srat di bisok kep yok ser nhyema imbres yok leu mikwau di tungwatu ipigig ser di ibui bak kwar di ikuk yok bak nya kin mindhe di iba kuk bikri kep nikimam di ninggrom huisi kin niyem ninggromti kin nicut tut yamti cem.

²¹Lewo nibou nya ikwop kep Puig Yahudi nicukti ei jide ig mbusyamei hagom bikwop Njap Nigwam Kep Ninghuisi leu nipou kikau kwei bipek ammani kep bitri tut nihyet dima nggi minu cem.”

²²Yo di igya kui Yesus kin nibou nya kin yo di inggre kin mbusyamei yahagom ikos tut bipia idimig ibou can leu ikieti bipinak yok ug ei minu ndig Antiokhia bit Paulus kin Barnabas. Gima rino idimig Silas kin Yudas di Sabas nipmot. Yo di mbusyamei nye ei minu ndig Yerusalem ijoi sut yo cin dini nindig bibor.

²³Nibou nya igyai srat gom biyok mem ipwoi biyuug sut. Ba, nipas kepti pai, “Srat dini mem nikinjoi bat di ngkiai nya ei minu ndig Antiokhia kin Siria kin Kilikia jahagom. Nye di niya kui Yesus kin nye di nibou mbusyamei nya di ninok jikindig bat nya nipigo je.

²⁴Nimiap tut ibou poi di inggre kin nyeni di ihwou bibigen ser je. Yo dima igyai jingon di kiowi tut nyen de ningginau jeti nya. Noro nisok nihyet kin ningon kanti di nok gima ei yok dip bi sren.

²⁵Lewo nahagom nisimbot kep biyam tut munhyet dini binice tut yam hyet mem gima nisok nihyet ei ibou can dip hwou ndam je. Yo dima ibit Paulus kin Barnabas di nyeni ingon kieti.

²⁶Yo cin dini inggok imai eisi tut midyai di igyai mem ide Tuhan di Yesus Kristus.

²⁷Gima rino nipinak Silas kin Yudas hwou. Nihyet di yoni mitri tut bije dima noyam kin srat bokti di nipas ei sratti mem je.

²⁸Allah Ninnei kin nyeni nahagom nice tut yam hyet ba, minikes nicukti di buhun nindigsi nya ei jinghat dip bi noro nisok kep je tut nicukti di bon ninyeng.

²⁹Nicukti di bon ninyeng dima rino ma jimbres jenti leu mikwau di tungwatu ipigig ser di ibui bak kwar di ikuk yok bak nya kin niyem ninggromti kin mindhe di iba kuk bikri kep nikimam di ninggrom huisi kin nicut tut yamti. Gino jimbres jenti leu jiyai kepti di kinei dini yok hagom lene gini kei bibor mem je. Jicem o!”

³⁰Yo di ipwoi srat dima yuug ei minu ndig Antiokhia tu lene induk yo di ingon jo kep nya yahagom kwei leu api ikes srat pima biyok.

³¹Tirigi yo di mbusyamei nya ikwop srat bokti dima lene ingon nggan-triot kei lewo srat bokti dima tibim tut nihyet di biwin kep ingonti.

³²Yudas Silas nya ne nabi rin ba, yuhuk ighyet bibiwin kep yo di ingon jo kep nya ei minu ndig Antiokhia ingonti bibindei ba, yo dima igyai ningon di ngkiem kin nisindemti cem.

³³Niabiati yo cin dima ibong ei minu ndig Antiokhia mem ari poi bu lene yo di inggre kin mbusyamei nya ipinak yok bingkwei hanyen ba, isok gi ipigo yok ei yoni dip bak yo di ipinak yok kwei. [

³⁴Noro Silas kos tut bipia bong ei minu ndig Antiokhia bimbut bi.]

³⁵Paulus kin Barnabas ibong ei minu ndig Antiokhia mem bed poi bu. Iba yo bikum nindigsi nya ba, ingginau tungwatu nya bitri tut Allah nihyet cem.

³⁶Jei bi lene Paulus pai bak Barnabas “Akwei ba, simbut ri. Suug cem kep sisut bat yo di ingon jo kep Yesus nya bidem minu ndig di sitri Allah nihyet eisi hagom leu binhyepo singig siyai kep yok.”

³⁷Lo, Barnabas pi bibuwak Yohanes-Markus cem bikum yok.

³⁸ Noro Paulus ce tut bi lewo Yohanes-Markus yai midyai bit yok bimbut kikau nipou pima bi noro kes yok ei hanjop Pamfilia bingkwei hanyen.

³⁹Itte tut yam nindig bibor leu api ikwas yam. Barnabas buwak Yohanes-Markus bibri kibar minyei biyuug ei Mios Siprus.

⁴⁰Paulus buwak Silas ba, yo di mbusyamei ei minu ndig Antiokhia ingat nadi kep yok leu binhyepo Tuhan singat tut yok kikau bidem imbutti.

⁴¹Yoni igya bidem hanjop Siria kin Kilikia bibiwin kep yo di mbusyamei nya ingonti.