Read Hatam KISAH 17 Bible Online

KISAH 17 - Hatam bible

KISAH 17

¹Paulus kin Silas imbut imig bu bigya bidem hanjop Amfipolis kin Apolonia kikau biyuug krau minu ndig Tesalonika. Mben Yahudi ide ig mbusyamei gom jo ei minu ndig dima.

²Gima rino Paulus yai nok niyai kepti bicoi ug ei ig mbusyamei dima ba, noni kin mben Yahudi isimbot kep biyam tut Allah nihyet mem ide Njap Nigwam Kep Ninghuisi kikau ei ari ningai di bram yam dima.

³Noni mbot kep tut Allah nihyet brei biyok tug hon nibokti di bindo bipia suar Nibou Ndig di teu tungwatu biyai niyaijo nijep biyok di Allah preu ei mem yok yai ninghuisi wei leu api kiju hanyen leu nimaisi. Noni tri tut biyok “Yesus di ditri tut bije dini ne Nibou Ndig di teu tungwatu biyai niyaijo nijep biyok di Allah preu ei mem je ri.”

⁴Leu api tungwatu nya ibou poi bitut mben Yunani imang ndig di ikuk yok bak Allah kin sop di inyeng jei nya imang bibor cem yahagom ingon jo kep Yesus leu api itti kin Paulus kin Silas.

⁵Noro mben Yahudi ingon kinei sut Paulus kin Silas bikes ingon kanti bak yo di ingkek ndok nya ei biyati ba, yahagom ibicom yam ei nimpung gom. Yo dini ibindei ba, timiei minu ndig dima ighyet ngwig kep yam bibisau ug ei Yason de ig bei. Yoni inggek dimbou binggok ser Paulus kin Silas bipi bikri yok kwei bikes yok ei timiei minu ndig dima yoho bei.

⁶Noro ingat Paulus kin Silas bi. Gima rino ikri Yason kin yo di ingon jo kep nya ibou poi ug ei nibou nya yoho bei lene ibipai bipia “Yo dima ibindei ba, tungwatu dihyeisi dini yahagom ighyet ngwig kep yam. Nogindini ikwei krau ide minu dini cem,

⁷ba, Yason cigit yok kui nide igya. Yo dima isrep tut Kaisar nimbrap tutti nya bitri tut Yesus di nok nibou ndig hiter bu.”

⁸Ipaisi dima bindei ba, tungwatu ningot ndig dima kin nibou nya yahagom ighyet ngwig kep yam nindig bibor.

⁹Lene nibou nya icuk Yason kin yo di ingon jo kep Yesus nindigsi nya leu binhyepo iba mitiei bigo gau yonti. Gima ngwig lene nibou nya isindui sut yok bimbut.

¹⁰Yo di ingon jo kep nya ei minu ndig Tesalonika ipinak Paulus kin Silas ug ei minu ndig Berea mem himmun ndia. Tirigi yuug krau lene icoi ug ei mben Yahudi ide ig mbusyamei.

¹¹ Timiei minu ndig Berea nya igyok ingon mem Paulus nihyet dor njiriek timiei minu ndig Tesalonika. Ingig itingou mem nihyet tut Yesus lene ikieng leu Allah nihyet ba, iba srat bokti dima binai nihyet di Paulus tri tut biyok bikwop njap-njap.

¹²Timiei minu ndig Berea imang bibor bitut sop nya kin pinai nya di mben Yunani di inyeng jei nya imang bibor cem yahagom ingon jo kep Yesus.

¹³Tirigi mben Yahudi ei minu ndig Tesalonika imiap Paulus ninghapti tut gi noni tri tut Allah nihyet ei minu ndig Berea cem lene induk yam kwei bihwen timiei minu ndig Berea ingonti ba, ikrau ingon tut Paulus nya.

¹⁴Yo di ingon jo kep nya ei minu ndig Berea ibipbur bibuwak Paulus ug ei mukti noro Silas kin Timotius igwam nyahan.

¹⁵Niabiati yo dima ibuwak Paulus kikau ug ei minu ndig Atena tu lene ikes noni leu lene ingkwei hanyen ug ei Berea. Lo, Paulus sok nihyet bak Silas kin Timotius leu binhyepo ikwei sin noniti haninyai.

¹⁶Lo bi lene Paulus bong ei minu ndig Atena bimem kep ser Silas kin Timotius ikweisi bingig niyai kep minu ndig dima bingat lo, minu ndig dima mpung tut kwar di tungwatu ikuk yok bak nya. Apino ningon buhun tut nindig bibor.

¹⁷Gima rino noni kin mben Yahudi kin ngkiai nya di ikuk yok bak Allah yahagom iba ighyet bidahat yam ei mben Yahudi ide ig mbusyamei. Noni mbrap bit tungwatu nya ei biyati bikwop njap-njap.

¹⁸Guru nya ibou poi leu nimpung Epikuros kin ibou poi leu nimpung Stoa cem iba ighyet bidahat Paulus ba, ibou poi ihig yam “Guru di ningon mbum dini huk nihyet tut mindei ngan i?” Leu api hiter ibuhup “He ma noni tri tut ngkiai nya ide mun di ikuk yo bak e?” Ibuhup biyam nok lewo Paulus tri tut Yesus kin nikiju hanyen leu nimai eisi.

¹⁹Yo dini ibuwak Paulus biyuug sut ug ei ide dewan yoho bei ei nungug tou Areopagus bipai binoni “Ando tut ningginausi di nijep-jep dini binye leu binhyepo nikan tut.

²⁰Lewo ningon kiowi tut ade ningginau nyeti dima ba, ningon ya mem gima ambot kep binye.” (

²¹Ipai nok lewo timiei minu ndig Atena kin ngkiai nya di ibong ei minu ndig dima yahagom ita ibou ei nipui kep nihyet mindurti bigyok itta kep nihyet nijep-jau cem. Igyai munti dini yem jam bingwig leu yok bikwop njap ngwa hagom.)

²²Lene Paulus kiju biya ei dewan di idem yam ei nungug tou Areopagus yoho bei bibuhup “Andigpoi di mben Atena jen, dingat bou diyai him bipia jiba jingon di joi bibor bikuk je bak jide kwar nya.

²³Lewo tirigi dimbut-mbut nyen ei jide minu ndig dini lene dingat mpia ttou nsi di jikuk je bak jide kwar eisi nya bidittau kep nimbar hum dok mem midut gom di srat bokti joti. Ipas eisi ‘Mem Allah Di Nikan Tut Bi.’ Mbro nok gino jingon kiowi tut Allah di jikuk je bak dima lo, nogindini dindo Noni brei bije.

²⁴ Allah di pai tes dihyeisi dini bitut mun di joti nya hagom ne Tuhan mem mpia-bbed him kin dihyeisi dini ri. Noni bong ser ig kwar di tungwatu ibon bou inda him bi.

²⁵Noni cem suar tungwatu nya bimpu Noni bi. Lewo Noni rino yai mun di tungwatu isuar ninyeng hagom biyok lene biyai niyaijo kin nihi ninnei bak tungwatu cem.

²⁶Noni ripo pai tes tungwagom nok ide pung di intun him lene bindei ba, tungwatu nya ibong bidem dihyeisi dini nisurti-nipekti. Nipou tirigi Noni pai tes yok bigyo ne Noni nyohou kos tut ide nijam di igyaijo kin mpia ttou nsi di ibong eisi cem.

²⁷Allah yai gima hagom leu binhyepo yoni inggok ser Noni. Mpaba yoni itau kep Noni tirigi inggok-nggok nyen ser Noni e? Gima hagom nok lo, Allah ningat rin ei minu ting leu nye bi.

²⁸Bit leu nok tungwagom pai ‘Igyaisi jo ba, ingon bingmai lene ingat rin ei dihyeisi dini cem tug hon Allah de nisindemti.’ Nikon doia cig di inggre kin je cem ibinut bu bipai ‘Nyeni yahagom Allah nimunggwom bat nya ri.’

²⁹Gino nyeni intun Allah him nok nimunggwom bat nya lene ma ibibon Noni noyam kin mun di tungwatu iba mas kin perak kin tig bibon bou inda him au.

³⁰Allah ba niyai ngat nijam ndi po tungwatu nya ingon mbum pima. Noro tini bu ne Noni cuk tungwatu nya ‘Ma yahagom ittin ser ide sisar bikiek ndam Allah hak.’

³¹Lewo Noni kos tut bitto bou dima Noni ba ningon di sren-srau bibirop hanyen bak tungwatu dihyeisi dini yahagom tug hon tungwagom di Noni dimig ei dima. Noni ndo bindo bak tungwatu yahagom tirigi Noni win no dima leu nimai eisi.”

³²Tirigi yo dima imiap Paulus tri tut tungwagom di kiju hanyen leu nimai eisi tu lene ibou poi ipa ndip noni lo, hiter ipai binoni “Ningon ya mem nituti tirigi akwei tri tut nihyet dini hanyen binye.”

³³Lene Paulus kes yok bimbut leu yok.

³⁴Noro ibou poi di isrig yo dima ikieti itti kin Paulus ba, ingon jo kep Yesus. Yo dini inyeng Dionisius di nggre kin dewan Areopagus nya kin no di sop di ninyeng Damaris kin nindigsi nya ibou poi cem.