Read Hatam KISAH 21 Bible Online

KISAH 21 - Hatam bible

KISAH 21

¹Nipigo nibou mbusyamei Efesus nya binikes yok leu api nibri kibar minyei hanyen. Niba kibar bitot minyei ngwa dip ug ei Mios Kos lene njap di hyep bu nibitot minyei ngwa dip ug ei Mios Rodos lene njap di hyep bu nibitot minyei ngwa dip ug ei Mios Patara.

²Nikinyon kibar ei Mios Patara biningat kibar hiter di tin ei mem bitot minyei ug ei hanjop Fenisia. Gima rino nibri kibar dima binimbut.

³Niba kibar bitot minyei sur Mios Siprus lo, kibar rop sir mios dima nibiho kikau ug ei minu Siria bipiar nyahan ei minu ndig Tirus. Lene nikinyon leu kibar bibou timiei kibarti nya icat ndigban leu kibar nsi ug e.

⁴Nuug cem kep yo di ingon jo kep Yesus ei minu ttou nsi dima binibong bit yok mem ari nitindur gom. Allah Ninnei bie tut yo dini bisok kep Paulus ngkiem ser nhyema noni ug ei minu ndig Yerusalem au.

⁵Noro jei bi lene tto bou dem mem nikes yok leu binibinut nimbutti kikau. Gima rino yoni kin itnem bat nya kin imunggwom bat nya yahagom yehei sut nye leu minu ndig dima ba, nuug ei muk nintig dip leu api niba nibiau bicom mpia biningat nadi.

⁶Nahagom nipigo yam lene nibri kibar hanyen lo, yo dima ingkwei hanyen ug ei ide ig bei.

⁷Nijo leu minu ndig Tirus binibitot minyei ug ei minu ndig Ptolemais. Nuug cem kep yo di ingon jo kep nya ei mpia ttou nsi dima. Nipigo yok binibong bit yok mem njap gom ngat.

⁸ Njap di hyep bu lene nijo leu minu ndig Ptolemais binimbut ug ei minu ndig Kaisaria. Tirigi nuug krau minu ndig dima lene nuug cem kep Filipus. Noni ne nitri tut Nihyet Di Kei cig rin binibit bong. Noni nggre kin ibou muhwindacan di mbusyamei nya ei minu ndig Yerusalem itta yok pima.

⁹Filipus yai nipmisop bat sop gwam nitta pilei nya ibou bitai di igyai nisindemti leu Allah mem gima itri tut Allah nihyet.

¹⁰ Nibong bit Filipus mem njap poi lene Nabi Agabus jo leu hanjop Yudea bikwei krau minu ndig Kaisaria.

¹¹No dini kwei cem kep nye leu api ba Paulus de bang bingot nonti nimig-ninda leu api pai “Allah Ninnei tri tut bipia mben Yahudi ei minu ndig Yerusalem miba nisinati dini bingot bang dini niceu leu api mikes noni ei ngkiai nya indati.”

¹²Tirigi nimiap nipaisi dima lene nyeni kin nindigsi nya nisok kep Paulus ngkiem ser nhyema noni ug ei minu ndig Yerusalem au.

¹³Noro Paulus buhup “Nggon rino jipim kep da ba, jibiyai dingon pus tut je i? Ditin ei mem ikat da ei minu ndig Yerusalem he bi noro mem diyai nimai drek dip Tuhan Yesus cem.”

¹⁴Bit bon nipingok ningonti kan bi. Gima rino nikes hon ba, nice tut yam hyet binipai “Nnaba tug hon Tuhan ningon kanti hak ug.”

¹⁵Nigwam ei sirima mem njap poi leu api nitin ei minai ba, nuug ei minu ndig Yerusalem.

¹⁶Yo di mbusyamei minu ndig Kaisaria nya ibou poi yehei sut nye kikau ug ei Manason de ig leu api nibong bit noni. (Manason nitimieisi leu Mios Siprus ba, noni bit Yesus ninno tu.)

¹⁷Tirigi nyeni nuug krau minu ndig Yerusalem lene yo di ingon jo kep nya iba ingon di llei bibor biya um nye.

¹⁸ Njap di hyep bu lene nehei sut Paulus ba, nuug cem Yakobus. Nibou mbusyamei nindigsi nya cem yahagom ingat rin ei nide ig bei.

¹⁹Niabiati Paulus pigo yok lene noni kwop kep midyai di Allah bibon tug hon noni ei ngkiai nya ikieti hagom biyok.

²⁰Imiap tut mun di Paulus kwop kep nya lene yahagom inggei sut Allah leu api ipai bak Paulus “Nikindig na e, angat bou ayai him bipia mben Yahudi ibou sribu-ribu ingon jo kep Yesus tu. Ba, yahagom ita ibou ei gima ibit Puig Yahudi nicukti nya cem.

²¹Ba, imiap tut anghapti bikan bipia angginau mben Yahudi di ibong ei ingkiaisi leu binhyepo ikes Puig Yahudi nicukti nya hak ei. Ba, ikan bipia apingok kep ingonti ser nhyema ibasunat imunggwom bat nya bibit mben Yahudi igyai kepti nya au.

²²Mbigom ne mben Yahudi di ingon jo kep Yesus dima imiap tut akweisi. Gima rino nibon notou i?

²³ Nnaba abit nyeni ningon kanti dini. Pinjoi ndig ibou bitai di ipreu ei mem Allah tut mun nyeng gom ingat rin ei sirini.

²⁴Ma abit yok bijibon midut ningon kwes kin Allahti. Lene ma ago gau yok leu binhyepo ibit midut nikak nibou nta leu[14] bit na. Tug hon nisinati dima lene tungwatu yahagom mikan tut bipia gino hiter ikkin kep anghapti drek dip ade ningginausi dima igbit bi noro ahati tut Puig Yahudi nicuk nyeti.

²⁵ Noro tut ngkiai nya di sindi ingon jo kep Yesus ne nipas srat ba, nibisok kep yok ser nhyema imbres yok leu mikwau di tungwatu ipigig ser di ibui bak kwar di ikuk yok bak nya kin niyem ninggromti kin mindhe di iba kuk bikri nikimam di ninggrom huisi kin nicut tut yamti cem.”

²⁶Njap di hyep bu lene Paulus ug buwak ibou bitai dima ba, yahagom ibon midut ningon kwes kin Allahti. Ba, icoi ug ei Tuhan De Ig bipai igbit njap nimangti di yoni ikes honti tirigi ingon kwes hanyen bu. Lewo mpe dima lene imam nya mibui mindhe tut ninggrom bibikwop yok.

²⁷Son dideu njap nimuhwindacan ningwigsi lene mben Yahudi ibou poi di ikwei leu hanjop Asia ingat Paulus ei Tuhan De Ig. Lene idor pip tungwatu imang bibor bikat noni,

²⁸leu api iba ighyet di ten bipai “Je di mben Israel e, jikwei mpu nye o! No dini ya bidem dihyeisi dini nisurti-nipekti bipingok tungwatu nya ingonti tug hon ningginausi di srep tut nye di mben Israel kin Puig Yahudi nicukti nya kin Tuhan De Ig dini. Nogindi pa noni buwak ngkiai nya kwei ei Tuhan De Ig bibindei ba, nirom kui mpia di dia-diau dini o!” (

²⁹ Ipai nok lewo ingat Trofimus leu minu ndig Efesus di bit Paulus nyen ei minu ndig Yerusalem leu api ikan bigya Paulus buwak noni kwei ei Tuhan De Ig.)

³⁰Timiei minu ndig Yerusalem nya yahagom ingon sibui nindig bibor ba, induk yam kwei lene ikat Paulus bikri noni ug ei nisai binggam dimbou pmem ei Tuhan De Ig ser.

³¹Leu api ibirim ingkek mem gima igyai nimai binoni rin lo, tungwagom sok nihyet bak nibou tentara Roma gom bipia timiei minu ndig Yerusalem yahagom ighyet ngwig kep yam.

³²Nibou tentara brim ningkek biya tut nide kompi nya ibou poi kin nide limwa nya bidor ug ei tungwatu pima yok ikieti. Tirigi yo dima ingat lo, nibou tentara kwei sut nide limwa nya lene ikes inda leu Paulus bibui noni bu bi.

³³Nibou tentara ttau ndam Paulus bikat noni lene cuk nide limwa nya biba lante can biteu noni. Leu api noni hig pus tungwatu pima yok “Tou rin i? Noni nggon ndei je i?”

³⁴Leu api ibou poi ibuhup nihyet nok gini lo, ibou poi ibuhup nihyet nok gima. Yahagom ighyet ngwig kep yam ser ba, bit bon nibou tentara mig mbus ighyet di igbit kin ighyet di nitrowai kan bi. Gima rino noni cuk nide limwa nya bipia ibuwak Paulus ug ei tentara nibousi di igya coi.

³⁵Ibuwak noni ug ei lin mbrei kiou lo, suar tentara pima yok ikon noni ei inghat dip nig-nai lewo mben Yahudi iten-pos bibor.

³⁶Yahagom idor bram Paulus ba, ighyet ngwig kep noni bipai “Jikwei ba, ihwen noni hak ug!”

³⁷Nipou tirigi tentara nya ikon Paulus ug ei tentara nibousi di igya coi bigyo lene Paulus hig ser nibou tentara “Andigpoi e, ma asindui sut da bidipai dihyet gom bina ug e?” Nibou dima buhup “Ambrap nihyet Yunani kan e?

³⁸Dikan bigya nani ne mben Mesir gom po ham nimbuk kep nibou ndig Roma binang tut yo di imbuk bibor ibou sribu bitai bitut ide minggwen nya ug ei iggum ndigsi pima rin bi e?”

³⁹Paulus buhup “Dani ne mben Yahudi rin ba, ditimieisi leu minu ndig Tarsus di nok minu ndig di bon ninyeng ei hanjop Kilikia. Ma asindui sut da ba, ditri tut dihyet bak yo di imbuk tut da dima ug e?”

⁴⁰Nibou dima ce tut Paulus ningon kanti dima lene Paulus kiju biya ei lin mbrei dip bikimut ninda kep yok. Tirigi yahagom ighyet ntus leu lene noni ba nihyet Ibrani bimbrap bit yok,