Read Hatam KISAH 22 Bible Online

KISAH 22 - Hatam bible

KISAH 22

¹bipai biyok “Dicig bat kin disut bat jahagom e, dimbrap gau danti ei joho bei. Ma jingig jitingou mem dihyet!”

²Tirigi tungwatu nya imiap tut Paulus di ba nihyet Ibrani bitri nihyet lene yahagom ikimut yuhuigya. Gima rino Paulus binut nihyet bu,

³ bipai “Dani ne mben Yahudi rin ba, dipmem srek tut da ei minu ndig Tarsus ei hanjop Kilikia lo, tirigi dimahan lene di bong ei minu ndig Yerusalem. Dicoi pikor bidigwam ei guru Gamaliel nimig him. Noni ngginau da mungkun tut Puig Yahudi nicukti nya di ide pung di intun him nya igyai binye. Ba, dita dibou ei Allah nicuk nyeti nya dem kep je di jita jibou eisi mem Noni njap di ammani.

⁴ Dihwen bit yo di itti kin Ninjei Bit Krestenti bidibindei bimai. Dikat pinai nya kin sop nya bidinggam yok ei ig bui nsi.

⁵Dem tut gima Imam Nibou Ndig kin Nikei Puig Yahudi Nya cem itri tut bije bipia diris bije bi. Yoni ipas srat nisindemti bak isut bat mben Yahudi ei minu ndig Damsyik bikes ei dindati. Tug hon srat dima lene nibou dima yok isindui sut bidikat yo di ingon jo kep ningginausi nijep dima bidibuwak yok hanyen kwei ei minu ndig Yerusalem leu binhyepo nibou nya ikes hukum ei yok dip.”

⁶“Mpe di gom tirigi dimbut ba, duug ei puig sinon dideu minu ndig Damsyik mem mpia huk pijum lene ninjeng nindig com kros kwei leu mpia-bbed him bipiga mpia tai da.

⁷Tirigi ditti ug ei dihyeisi rino dimiap nihyet di hig ser da ‘Saulus e, Saulus e, nggon rino ahwen bit Da i?’

⁸Lene dibuhup ‘Andigpoi e, Na tou i?’ Leu api nihyet dima tibim hanyen kwei bipai ‘Dani ne Yesus leu minu ndig Nazaret di ahwen bit ri.’

⁹Yo di ibit da ingat igbit ninjeng lo, imiap No di mbrap bit da nihyet bi.

¹⁰Lene dihig ser Noni bu ‘Tuhan e, midibon mindei i?’ Noni buhup ‘Akiju ba, aya pijum lene ma aug ei minu ndig Damsyik. Tungwagom ei minu ndig dima mipai bina tut ade midyai di bit leu Allah ningon kanti mem nani yo.’

¹¹Dida diyai lo, diyai tu tug hon ninjeng di piga mpia kei di com kwei leu mpia-bbed him bikrop tai da. Gima rino disut bat nya ikrau dinda bicen da ug ei minu ndig Damsyik.

¹²Tungwagom di ninyeng Ananias di kuk no bak Allah no bong ei minu ndig dima. No dini brim ningkek mem Puig Yahudi nicukti. Mben Yahudi nindigsi di ibong ei minu ndig Damsyik yahagom ikon ninyeng cem.

¹³No dima kwei ya simiak da bipai ‘Disut Saulus e, ayai piga hak.’ Pai nok rino diyai piga kros hanyen leu api dingat noni.

¹⁴Noni pai bida ‘Ide pung di intun him nya ide Allah dimig na leu binhyepo akan tut Nonti ningon kanti ba, angat Yesus di Allah de Awak di pwoi Allah ningon dima bou ayai him lene amiap Yesus nihyet tirigi Noni mbrap pijum bit na cem.

¹⁵Ma atri tut mun di angat bou ayai him kin nihyet di amiap ei atingou nsi cem bak tungwatu nya yahagom.

¹⁶Nogindini amem kep ser mindei i? Akiju ba, ayai nitur na ei minyeiti ba, ahara Tuhan leu binhyepo Noni kwek na leu ade sisar cem.’ ”

¹⁷“Lene dingkwei hanyen ei minu ndig Yerusalem bidingat nadi ei Tuhan De Ig leu api dingat-hi-ngat,

¹⁸bidingat lo, Tuhan ya ei doho bei bipai ‘Abrim amig ba, anang leu minu ndig Yerusalem haninyai lewo timiei minu ndig dini ingon jo kep ahyet di atri tut Da biyok bi.’

¹⁹Dibuhup ‘Tuhan e, mben Yahudi ikan tut bipia dicoi ug ei ide ig mbusyamei leu api dikat yo di ingon jo kep Na bidibui yok kinei-kinau.

²⁰ Nok gima cem dingat rin bit yo di ihwen Stefanus di tri tut nihyet Ade bidice tut gima nibou nya igyai nimai binoni. Gima he bi lewo diya ser yo di ibindei mbut mun di pek kep dima ide sinsun cem.’

²¹Noro Tuhan pai bida ‘Aug hak ug lewo dicuk na ug ei minu ting ndam ngkiai nya.’ ”

²²Tungwatu pima yok ingig itingou mem Paulus nihyet kikau ug bipek nipaisi bipia suar noni ug tri tut nihyet bak ngkiai nya lene gima bindei ba, yahagom ighyet ngwig kep noni drek dip ba, yahara kros bipai “Jikwei ba, ihwen noni hak ug! Dem mem gima niyaijo bu bi.”

²³Nok rino ighyet ngwig kep yam bimpig ide sinsun kui lene ikam dihyei ndung ba, ibigimahap kui.

²⁴Gima rino nibou tentara Roma cuk nide limwa nya bipia ikon Paulus kikau ug ei tentara nibousi di igya coi leu binhyepo imbas noni leu api noni mipai jit mun di bindei dino mben Yahudi imbrua kep nihyet.

²⁵Noro tirigi ingot nimig-ninda lo, imbas noni bigyo lene noni hig ser kompi di ya ser noni “Nibou Roma sindui sut ba, jimbas nide limwa nipou tirigi jipai kep noni ei nikei noho bei bigyo e?”

²⁶Kompi miap Paulus nihyet dima rino ug mbot kep tut bak nibou tentara bipai “Anggon ndei no dima i? Noni ne nibou ndig Roma de limwa ri!”

²⁷Lene nibou tentara ug ngat Paulus bihig pus noni “Ma apai igbit bida. Nani ne nibou ndig Roma de limwa rin e?” Paulus buhup “I, dani ne nibou ndig Roma de limwa ri.”

²⁸Lene nibou tentara pai “Dani cem noro diba mitiei nindig bibor bigo tut.” Paulus buhup “Noro diba da kep dinyeng nibou ndig Roma de limwa leu dicig-dipmem yoni.”

²⁹Paulus pai nok rino yo di itin ei mem imbas noni yoom yo leu lene nibou tentara cem digit tut gi noni ba lante biteu no di nibou ndig Roma de limwa nimig-ninda.

³⁰Nibou tentara joi sut kan tut mun di bindei di mben Yahudi ighyet ngwig kep Paulus. Gima rino njap di hyep bu lene noni sok nihyet bak imam nindig nya kin Nikei Puig Yahudi Nya yahagom leu binhyepo induk yam ei gom. Lene noni kwek lante di ibiteu Paulus nimig-ninda leu bibuwak noni kwei ei yo dima yoho bei.