Read Hatam KISAH 24 Bible Online

KISAH 24 - Hatam bible

KISAH 24

¹Njap muhwi ser lene Imam Nibou Ndig Ananias kin nibou mben Yahudi nya ibou poi kin Tertulus niya hacan ei nikei noho bei cig yahagom ikwei ei minu ndig Kaisaria. Igya ei Nibou Feliks noho bei bikindi ipai kep Paulus.

²Tirigi Nibou dima ndo bak Tertulus lene noni kindi mbrap bipai, “Na di Nibou di anyeng jei e, anyeng di tak kep nyende minu dini bindei ba, nahagom nibong kei nigwam kei ninno tu. Ba, anyeng di tak kep nye tug hon angon kiti dima kinding nye di mben Yahudi nibongti nigwati nya bikei hanyen tu.

³Nibirop hanyen binipai sigyo nindig bibor bina di Andigpoi bikwop njap bidem minu dini nisurti-nipekti.

⁴Ma aba angon di mbris bingig atingou mem dihyet di jei bi dini lene ma anghen ser au. Gi nok ne duhuk dihyet di jei biyem jam leu na bi.

⁵Jo nibreisi mem nye bipia no dini ne no di mbuk di nggek tut nibong kei nigwam keisi ri. Noni rino bindei di mben Yahudi ighyet srou kui yam bidem dihyeisi dini hagom. Ba, noni ne nibou gom mem nimpung Nazaret ri.

⁶Paulus pi bibindei ba, nirom kui Tuhan De Ig noro nikat noni. [Nipi binimbus ningonti bit leu nok Puig Yahudi nicuk nyeti.

⁷Noro nibou tentara di Lisias ba nimbuk bipos noni leu nyeni nindati,

⁸bicuk yo di ipai kep noni bikwei ya ei na di Andigpoi aho bei.] Gino na di Andigpoi ambus no dini ningonti lene mun di nipai kep noni tut hagom mijo nibreisi mem na di Andigpoi tug hon nonti nihyet.”

⁹Mben Yahudi di induk yam ei mpia dima yahagom ipai kep Paulus bram Tertulus nipai kep noti bipia nipai kepti dima ne nijit ri.

¹⁰Lene Feliks ndo bak Paulus mem noni birop mben Yahudi ighyet. Gima rino Paulus pai “Na di Andigpoi e, dikan tut bipia nani ne nikei di anyeng tak kep minu dini ninno tu ri. Gima rino diba dingon llei bimbrap gau danti ei na di Andigpoi aho bei.

¹¹Gino na di Andigpoi apigot bram mun di nijit lene mijo nibreisi mem na bipia njap simnaibrimigcan gi pini jug ne duug kuk da bak Allah ei minu ndig Yerusalem.

¹²Mben Yahudi ittau kep da bingat di diba dihyet bidahat tungwatu nya ei Tuhan De Ig bidibon mun hyet di binggek tungwatu nya ei ig mbusyamei Yahudi kin minu ndig Yerusalem nisurti-nipekti cem bi sren.

¹³Bit bon yo dini indo mun di bindo tut ide nipai kep dati dima ei na di Andigpoi ahobei kan bi.

¹⁴Suar dipai jit bak na di Andigpoi bipia dikuk da bak Allah di ide pung di intun him nya ikuk yok bak pima bit leu nok Yesus nicuk nyeti. Yo dini isrep tut bipia nicuk nyeti dima ne puig srawir ri. Noro dingon jo kep mun nyeng hagom di jo ei Puig Yahudi nicukti nyati cem Srat Nabi Nya ideti cem.

¹⁵Diyok dingon mem Allah noyam kin yo dini igyok ingon mem Noni tut gima Noni miwin yo di ingon sren nya kin yo di ingon rom nya cem yahagom leu imai eisi.

¹⁶Gima rino dita dibou ei dingon mien di kwes kin Allah kin tungwatuti kikau.

¹⁷ Niabiati diya bidem minu di ting mem ari bingwam poi leu su lene dingkwei hanyen kwei ei minu ndig Yerusalem bidipwoi mitiei di bahati tut disut bat mben Yahudi. Mpe dima lene dibindei ba, imam nya ibon midut nibui mindhe bak Allahti gau da.

¹⁸Mpe dino dibindei mbut midut dima biput bigyo lene yo dima ingat da ei Tuhan De Ig tirigi dibindei mbut midut ningon kwes kin Allahti bingwig leu su lo, tungwatu nindigsi inggreu ttai da ba, ighyet hwen yam cem bi.

¹⁹Noro mben Yahudi ibou poi di ijo leu propinsi Asia he rino ingat rin ei sirima. Yo dima ide nipai kep dati ne nijit rin. Gi kei mem yonti ikwei ya ei na di Andigpoi aho bei bipai kep da bindo ditunggweisi bina hak ug.

²⁰He ma ahig ser yo dini tut mun di diyai tunggwei di biyai dingon mui tirigi dimbrap gau danti ei Nikei Puig Yahudi Nya yoho bei pima.

²¹ Au e ba, ikan tut tirigi diya ei yo dima yoho bei lene ditri tut dihyet gom ngat bidipai ‘Jimbus dingonti njap di ammani drek dip gi dingon jo kep bipia Allah miwin nimai nya hanyen leu imai eisi.’ ”

²²Lene Feliks di kan bidem tut Ninjei Bit Krestenti dima mbrap gi ningwigsi bitak kep biyok bipai “Nok bibou nibou tentara Lisias kwei krau ug e leu api midimbus angonti bidikos tut dingon kanti bina.”

²³Lene noni cuk kompi gom leu binhyepo ya ser Paulus bisindui sut noni bimbut-mbut nyen. Bibon nituti mem Paulus nisut bat nya ikwei ngondut noni bit leu ijoi sutti.

²⁴Njap poi ser lene Feliks kwei sut nitnem Drusilla lo, noni ne sop Yahudi ri. Lene Feliks sok nihyet bak Paulus bipia kwei ngat yok. Tirigi Paulus tri tut nihyet tut niba ningon com Kristus Yesusti lene Feliks ngig nitingou mem noni.

²⁵Noro Paulus huk nihyet kikau bitri tut ningon srenti kin noom ningonti kin hukum di micut igkep tungwatu nya mem Njap Ningwig Honti cem. Feliks ningon ttin bibor bimbrua Paulus drek dip bipai “Cobi! Nogindini disindui sut ba, ambut hak ug. Mpe hi bu tirigi bon nikwesti mem da lene midihig na hanyen kwei.”

²⁶Feliks pai nok lene ningon ya mem Paulus kwas mitiei hi tut noni. Gima rino Feliks cuk kompi pima leu binhyepo buwak Paulus kwei ei Feliks noho bei nyen-nyen leu binhyepo mbrap bit noni.

²⁷Niabiati ari bingwam nitindur can ngwig leu lene nibou Perkius Festus kwei ya luei Feliks nohoti nok nibou di nijep bu. Noro Feliks huk bram gi mben Yahudi ijoi sut noni. Gima rino noni sindui sut Paulus bisima ei ig bui nsi kikau.