Read Hatam KISAH 25 Bible Online

KISAH 25 - Hatam bible

KISAH 25

¹Festus kwei bong ei hanjop dima mem njap ningai leu lene jo leu minu ndig Kaisaria buug ei minu ndig Yerusalem.

²Imam nindig nya kin nibou mben Yahudi nya ipai kep Paulus ei Festus noho bei ei minu ndig dima. Iba ighyet di mmau bahara Festus leu binhyepo,

³ noni ngondut yok bisok nihyet bak nide limwa nya bibuwak Paulus hanyen kwei ei minu ndig Yerusalem. Yahara Festus nok lewo ide limwa nya igyok ingon gom mem Paulus ba, itin ei mem ihwen noni hapuig.

⁴Noro Festus buhup “Paulus no sima ei minu ndig Kaisaria ba, jei bi ne dingkwei hanyen ug ei minu ndig dima ri.

⁵Ma jicuk jide nibou nya bibit da tirigi dingkwei hanyen ug ei minu ndig Kaisaria. Gino Paulus yai mun tunggwei sut je lene ma yo dima ipai kep noni.”

⁶Niabiati Festus bong ei minu ndig Yerusalem mem ari gom biniken leu lene noni ngkwei hanyen ug ei minu ndig Kaisaria. Njap di hyep bu lene noni nduk nikei di igya kui noni kwei ei nide kintrorti leu api sok nihyet bak kompi pima bibuwak Paulus kwei.

⁷Tirigi Paulus coi kwei rino mben Yahudi di ikwei leu minu ndig Yerusalem yahagom ingwig kep noni binjei mun di suwok mang bibor kep noni. Noro bit bon indo mun di bindo tut gi ipai kep noti dima kan bi.

⁸Paulus mbrap gau nonti bipai “Dibon mun tunggwei sut Puig Yahudi nicukti bidibindei ba, nirom kui Tuhan De Ig ba, dipai Kaisar Roma kinei cem bi sren.”

⁹Noro Festus huk bram gima mben Yahudi ijoi sut noni. Gima rino noni hig ser Paulus “Ace tut ba, angkwei hanyen ug ei minu ndig Yerusalem leu binhyepo dimbus angonti tut munhyet dini ei doho bei ei minu ndig dima e?”

¹⁰Paulus buhup “Diya diyati dini ei Kaisar Roma de nikei nya yoho bei. Dem mem nikei nya imbus dingonti ei sirini. Jo nibreisi mem na di Andigpoi bipia diyai mun tunggwei sut mben Yahudi bi.

¹¹Gino dipigau Nibou Kaisar nicukti nya apino dingon mui ne suar ditug ndei nimai drek dip ba, ayai nimai bida hak ug. Noro gino yo dini ipai da kinei mikuisi ne dem mem tungwa hi kes da ei indati bi. Dahara Kaisar Roma nonti mbus dingonti!”

¹²Niabiati Festus kin nide nikei nya isimbot kep biyam tut leu api Festus pai bak Paulus “Gino ahara Kaisar Roma nonti bimbus angonti lene suar ma aug ya ei Kaisar noho bei.”

¹³Bed poi ser lene Nibou Ndig Agripa kin Bernike ikwei ei minu ndig Kaisaria leu binhyepo igya um Festus.

¹⁴Ikwei bong mmun-njap poi lene Festus mbot kep tut munhyet dibitut Paulus bak Agripa bipai “Tungwagom di Feliks sindui sut di sima no rinaha.

¹⁵Tirigi duug ei minu ndig Yerusalem lene imam nindig nya kin nibou mben Yahudi nya ipai noni kinei ei doho bei ba, ibidip huk da leu binhyepo dikes hukum ei noni dip.

¹⁶Noro dibuhup bipia bit leu nye di mben Roma niyai kepti ne nikes no di tungwatu ipai kep dima ei yo dima indati bigyo bibou bon nituti mem noni mbrap gau nonti ei yo di ipai kep noni yoho bei nipou ug e.

¹⁷Gima rino tirigi yoni ikwei krau minu ndig Kaisaria lene dibinyen bi. Njapti kui bu lene dinduk nikei di igya kui da kwei ei ditde kintrorti leu api dicuk kompi gom bibuwak Paulus kwei biya ei doho bei.

¹⁸Tirigi yo di ipai kep noni ikiju bigya lene dingon ya mem gima injei kep noni tut mun di suwok bibor noro ipai hi nok bi.

¹⁹Noro Paulus kin yoni iba ighyet bidahat yam tut mun di ikuk yok bak kin No di ninyeng Yesus di mai su lo, Paulus kon nihyet tut bipai bipia kiju hanyen leu nimai eisi tu.

²⁰Dingon kiowi tut mun dini yok hagom ba, dipigot bram kan bi. Gima rino dihig ser Paulus ‘Gino ace tut ne dimbus angonti tut munhyet dima ei minu ndig Yerusalem e?’

²¹Noro Paulus hara Kaisar Roma nonti mbus ningonti. Noni bidip huk da leu binhyepo sima ei ig bui nsi kikau bibou Kaisar dima mbus ningonti tut nide munhyet. Gima rino noni sima bit leu nok dicuk noti bibou bon nikwesti mem dipinak noni ug ei Kaisar Roma noho bei ug e.”

²²Lene Agripa pai bak Festus “Dijoi sut nituti dima dimiap no dima nihyet.” Festus buhup “Njap di hyep bu api bon nituti mem gima amiap nihyet a.”

²³Njapti kui bu lene Nibou Ndig Agripa kin Bernike ikwei bon midut inyeng di jei di bindei ba, tungwatu nya yahagom ikuk yok bak. Icoi ug ei ig bei di isimbot kep biyam eisi bit nibou tentara nya kin andigpoi minu ndig Kaisaria di inyeng jei nya yahagom. Leu api Festus cuk kompi pima bibuwak Paulus kwei.

²⁴Lene Festus pai biyok “Na di Nibou Ndig Agripa kin je di nindigsi di jidem yam ei su e, mben Yahudi di timiei minu ndig Kaisaria kin Yerusalem nya cem yahagom yahara no diniti bikwop ei ditingou nsi. Mben Yahudi yahagom iba ighyet di ngwig kep yam bibidip huk da tut gima disindui sut ba, niyaijo bu bi.

²⁵Noro mun di mbuk di bindei ba, noni yai nimai drek dip jo nibreisi mem da bi. Noro noni hara Kaisar Roma nonti mbus ningonti. Gima rino dikos tut dingon kanti binoni bipia midipinak noni ug ei Kaisar noho bei.

²⁶Noro dikan tut mun di mungkun dima dipas kep tut noni ei sratti bak Kaisar bi. Gima rino dibuwak noni kwei ei je di andigpoi jahagom joho bei lo, ei na di Nibou Ndig Agripa Di Anyeng Jei aho bei bibie ug e! Dingon kanti ne tirigi jipigot bram munhyet dini lene dipas kep tut jikos tutti ei srat dimati bak Kaisar.

²⁷Lewo bit leu dingon kanti ne gino dipinak no di sima ug ei Kaisar noho bei lo, dipas kep tut mun di tungwatu injei kep noni tut ei sratti bi lene gima igbit bi.”