Read Hatam KISAH 3 Bible Online

KISAH 3 - Hatam bible

KISAH 3

¹Mpe di gom ne Petrus kin Yohanes yuug ei Tuhan De Ig mem mpia caisi bit leu nok jam dino tungwatu idem yam ei mem ingat nadi.

²Ba, pinjoi ndig gom di nimig lit habiei leu nisrekti kikau kwei bipek njap dima kep cem no rima. Nisut bat nya yuusap noni kwei bikwop njap-njap bikes noni nyahan bibong ser dimbou hui di ijem Dimbou Hui Di Kei Bibor leu binhyepo noni tindei tungwatu di icoi ug ei Tuhan De Ig bahara yok tut mun di ibingondut noni.

³Tirigi noni ngat Petrus kin Yohanes icoi ug ei Tuhan De Ig leu api tindei indati tut mun di ibingondut noni.

⁴Gima rino itou kep noni nggilun leu api Petrus pai bak “Atou kep nye hak!”

⁵Lene noni tou kep yok ba, ningon ya mem mun di ibingondut noni.

⁶Noro Petrus pai binoni “Dipwoi mitiei hi kwei bi lo, dikwas leu mun di jo bida hi tut nani yo. Ma akiju ba, ambut hak tug hon Yesus Kristus leu minu ndig Nazaret De nisindemti hak ug.”

⁷Lene Petrus krau ninda com bibrim kui apino nimig ngon kin nimig gom yai nisindemti kros ba, noni kiju.

⁸Lene noni pri biya kui leu api sindi tit nimig bimbut nyen leu api coi ug ei Tuhan De Ig bit Petrus nya bitit nimig lene pri-pri nyen kui binggei sut Allah cem.

⁹Tungwatu yahagom ingat gi noni tit nimig bimbut binggei sut Allah.

¹⁰Lene ibingat bipia noni ne no di nuhui mbum di bong ser Tuhan De Ig sur Dimbou Hui Di Kei Bibor ri. Yahagom inggap leu tut mindur di pek kep mem noni.

¹¹No dima jop bram Petrus kin Yohanes ninyen. Tirigi yuug krau Salomo De Bisai lene tungwatu ningot ndig yahagom inggap leu tut bibrim imig bingwig ttai yok.

¹²Tirigi Petrus ngat yo dima lene noni hig ser yok “Disut bat mben Israel jen, nggon rino jinggap leu tut mun dini i? Nggon rino jibimian huk nye i? Jikan bipia no dini mbut nyen tug hon nyende nisindemti kin nyeni ningon kwes-kwausi e?

¹³ Abraham kin Ishak kin Yakub kin nyeni ide pung di intun him nya ide Allah bindei ba, Nide Awak Yesus yai ninyeng jei bibor. Jeni jiba kilak Noni bak nibou nya di inyeng tak kep nye ba, mbro nok gino Pilatus pi bikes Yesus hanyen lo, jikou sut Noni ei Pilatus noho bei.

¹⁴ Yesus ningon kwes-kwau ba, ningon sren-srau cem lo, apo jikou sut Noni leu api jahara Pilatus leu binhyepo noni kes nihwen mun cig leu ig bui nsi bije.

¹⁵Jibindei ba, No di nok nibousi mem niyaijo nijep dima yai nimai. Noro Allah kon Noni hanyen leu nimai eisi. Ningat nikiju hanyenti bou nyeni niyai him tu.

¹⁶Disut bat jen, jingat mun di pek kep mem no di nimig lit dini bou jiyai him. Noni yai nisindemti bikei hanyen tirigi ba ningon com Yesus kin Nide nisindemti. Noni kei hanyen ei jahagom joho bei lewo ba ningon com Yesus.

¹⁷He disut bat jen, dikan tut bipia mun di jeni kin jide nibou nya jibindei ba, cut igkep Yesus dima ne jiba jingon tindur bindei yo.

¹⁸Allah mbot kep nihyet tug hon nabi nya yahagom yuhui him mimbrek ngan tu bipai ‘Nibou Ndig di teu tungwatu biyai niyaijo nijep biyok di dipreu ei mem yok miyai ninghuisi wei.’ Nok rino Allah bindei ba, mun dini yok hagom cut igkep Yesus tu.

¹⁹Gima rino disut bat jen, ma jittin ser jide sisar bijikwei hanyen ndam Allah leu binhyepo Noni ciu ser jide sisar.

²⁰Tuhan mikwei dideu je leu api biwin kep jinnei hanyen. Noni mipinak Yesus di Noni dimig ei nok jide Nibou Ndig di teu tungwatu biyai niyaijo nijep bak tungwatu nya hanyen kwei ndam je.

²¹Suar Yesus gwam nyahan ei gwamti bibou jam dem mem gima Allah pai tes mun di hagom nijep-jau bu ug e. Gima hagom bit leu nok nihyet di Noni tri tut tug hon Nide nabi di ingon kwes-kwau nya mimbrek ngan tu.

²² Musa pai ‘Tuhan di nok jide Allah midimig nabi gom leu jide adig-ajoi nya ikieti bipinak Noni ndam je bit leu nok Noni pinak da dini. Suar jingon bit mun di tibim ei nabi dima nuhui him a.

²³ Bikwop tungwa tou rino bit nabi dima nihyet bi lene no dima nggre kin Allah de limwa nya bu bi noro mitug ndei nimai.’

²⁴Nabi nya di itri tut mun di tibim ei Allah nuhui him bitut Nabi Samuel kin nabi nindigsi nya di igya abia kep noni cem yahagom itri tut mun di pek kep mem nijam dini.

²⁵ Disut bat jen, jipek hanjop kin jide pung di jintun him nya tut mun di Allah preu ei mem yok tug hon nabi nya. Lewo Allah pai bak Abraham ‘Midinjei mun di kei bak tungwatu dihyeisi dini yahagom tug hon yo di intun nani him.’ Nipreu eisi dima mem jeni cem.

²⁶Gima rino Allah dimig Nide Awak bipinak Noni ndam je nipou bibie leu binhyepo Noni yai gi kei bije tug hon gi Noni bindei ba, jittin ser jiyai munti di sibut nya.”