Read Hatam KISAH 5 Bible Online

KISAH 5 - Hatam bible

KISAH 5

¹Noro mpe dima lene no di ninyeng Ananias no rinaha. Noni kin nitnem Safira itri ide dihyei hanjop nsi gom bibipek mitiei.

²Ba, Ananias ningon tak kep mitiei ndrim hi mem nonti bipwoi niken kwei biyai bak yo di igya kui Yesus. Ananias nitnem ce tut niyai munti dima.

³Gima rino Petrus hig pus noni “Ananias e, nggon rino asindui sut Bilis di pingok angonti dino aris bak Allah Ninnei tirigi angon tak kep mitiei di aba dihyei bipek dima ndrim hi mem nanti i?

⁴Nipou tirigi atri hanjop nsi dima bigyo ne niceu rinani. Niabiati atri hanjop nsi dima ba, abipek mitiei cem niceu rinani. Nggon rino akos tut angon kanti di kinei nok gima ei angonti i? Lewo aris bak tungwatu nya bi noro abris bak Allah!”

⁵Hammi tirigi Ananias miap Petrus nipaisi nok rino noni tti ug ei dihyeisi bimai hak ug. Lene yo di imiap ninghapti tut gima idigit tut nindig bibor.

⁶Leu api pinjoi pilei nya ibou poi icoi kwei ba, ikon Ananias ningut binggai ei sreti leu api yehei sut bitig.

⁷Ariman nok jam ningai bu lene nitnem cem kwei lo, kan tut mun di sindi cut igkep nijjep bigyo.

⁸Petrus hig pus noni cem “Ma apai igbit bida tut mitiei di ajjep jeni jiba dihyei hanjop nsi dima bipek i. Nimangti hagom rini e?” Ananias nitnem ce bipai “I, nimangti hagom ri.”

⁹Lene Petrus hig pus noni “Nggon rino ajjep jeni jikos tut gi jiris bak Tuhan Ninnei i? Atou kep! Pinjoi pilei nya di itig ajjep ningut nogindi pa ittau hanyen ei dimbou heisi tu. Yoni mikon nani cem angut leu ig bei dini ug ri.”

¹⁰Nok rino Ananias nitnem cem nimai tti ug ei dihyeisi hak ei Petrus nimig him leu api pinjoi pilei nya icoi kwei bingat lo, noni cem mai su. Lene ikon ningut ug ei nisai ba, itig simiak nijjep nijui.

¹¹Apino yo di inggre kin mbusyamei yahagom kin tungwatu nindigsi di imiap ninghapti tut cem inghuisi mpig sut.

¹²Ei nijam dima ne yo di igya kui Yesus ibon mindur kin bindo mang bibor ei tungwatu nya ikieti. Ba, yo di ingon jo kep nya ibicom yam nok gom ei Salomo De Bisai.

¹³Mbro nok gino timiei minu ndig Yerusalem nya ingon kwes kin yo di ingon jo kep nya lo, yo di ingon gom kin yok bi nya icoi bisrig ikieti kindi-kindok bi drek dip gi ingwes mien.

¹⁴Jei bi lene pinai nya kin sop nya imang bibor ingon jo kep Tuhan sindam apino ibikum ei yo di ingon jo kep nya imangti.

¹⁵Mindur nya di pek kep mem yok bindei ba, tungwatu nya ikon yo di inggwen bikes yok ei bilen dip kin kwoti cem sir simpak leu binhyepo gino Petrus kwei njiriek yok lene ningwes kigyei gau yok.

¹⁶Tungwatu ningot ndig di ibong bidem minu mien di gahai minu ndig Yerusalem cem yuusap ide bat di inggwen nya kin yo di ninnei rom ya ingonti kwei leu api yahagom ikei hanyen.

¹⁷Gima bindei ba, Imam Nibou Ndig kin nide limwa nya di itti kin nimpung Saduki nya ingon kinei sut yo di igya kui Yesus leu api ibrim ingkek mem itte tut yok.

¹⁸Ikat yo di igya kui Yesus binggam yok ei ig bui nsi.

¹⁹Noro Allah de malaikati gom kau dimbou ig bui leu yok mem mmun bibuwak yok leu ig bui lene pai biyok,

²⁰“Ma juug coi ei Tuhan De Ig hanyen bijitri tut puig di bie ndam niyaijo nijep bak tungwatu nya di ingat rin ei mpia dima.”

²¹Gima rino yo di igya kui Yesus ibit nihyet ba, yuug coi ei Tuhan De Ig hanyen mem gwam ntuisi leu api ikinyon ei ningginau tungwatuti. Mpe dima lene Imam Nibou Ndig kin nide limwa nya induk Nikei Puig Yahudi Nya kin nibou kintrorti nya yahagom kwei ei gom. Leu api isok ighyet ug ei ig bui nsi leu binhyepo yo di igya ser nya ibuwak yo di igya kui Yesus kwei.

²²Yo dima icoi ug ei ig bui nsi bingat lo, yo di igya kui Yesus ipror leu sirima tu. Gima rino ingkwei hanyen ndam Nikei Puig Yahudi nya bipai biyok,

²³“Tirigi nuug krau ig bui nsi lene ningat lo, dimbou hagom nggam bingkiem ba, yo di igya ser nya cem yahagom igya ngkiem ser lo, tirigi nikau dimbou leu yo di isima nya lene ningat lo, yo di igya kui Yesus ipror leu su.”

²⁴Tirigi yo di igya ser Tuhan De Ig ide nibou nya kin Nikei Puig Yahudi Nya imiap ipaisi dima lene ingon kiowi tut mun di pek kep mem yo di igya kui Yesus ba, idigit tut.

²⁵Jei bi lene tungwagom coi kwei bipai biyok “Jimiap e, yo di jibindei sima yok ei ig bui nsi yo rima ei Tuhan De Ig bingginau tungwatu ningot ndig.”

²⁶Gima rino nibou dima ya tut nide limwa nya biyuug buwak yo di igya kui Yesus hanyen kwei lo, imbuk tut yok bi. Lewo idigit tut bipia leu ma tungwatu ningot ndig dima yok iba tig bihwen yok.

²⁷Ibuwak yo di igya kui Yesus ug ei ig bei bikes yok nyahan ei Nikei Puig Yahudi Nya yoho bei. Lene Imam Nibou Ndig hig pus yok,

²⁸ “Nipou ne nisok kep je ngkiem ser bipia ma jitri tut Yesus ningginau jeti bak tungwatu nya au. Ma jiba jingon srip bram mun di jiyai dima yok i! Jide ningginausi digek kep minu ndig Yerusalem ba, jimbres kep nye tut Yesus nimaisi cem!”

²⁹Petrus kin yo di igya kui Yesus nindigsi nya ibuhup “Suar nibit Allah nihyet leu gima nibit tungwatu ighyet.

³⁰Lewo ide pung di intun him nya ide Allah win Yesus di jiba paku bipek kin biei salib hanyen leu nimai eisi tu.

³¹Lene Allah kon Noni bigwam kui ninda com biyai nisindemti biNoni cem. Allah ndo Noni nok Nibou Ndig kin No di teu tungwatu leu sisar biyai niyaijo nijep biyok cem. Tug hon nisinati dima lene Allah bon nituti kin nikwesti mem mben Israel ittin ser ide sisar bikiek ndam Allah leu api Noni mikos ser ide sisar.

³²Nyeni ningat mun dini yok hagom bou niyai him tu. Allah Ninnei di Allah yai bak yo di ibit nihyet cem ngat mun dini yok hagom bou niyai him tu.”

³³Tirigi Nikei Puig Yahudi Nya imiap ibuhupti dima rino ingon sibui sut yok nindig bibor bipi bihwen yok hak ug.

³⁴Noro andigpoi Gamaliel di Farisi gom ningat rin ei Nikei Puig Yahudi Nya ikieti. Noni ne guru puig timiei rin ba, mben Israel yahagom ijoi sut noni cem. Noni kiju bicuk yo di igya ser nya leu binhyepo ibuwak yo di igya kui Yesus ug ei nisai mbigom ug e.

³⁵Leu api noni pai bak Nikei Puig Yahudi Nya “Disut bat mben Israel jen, ma jiba jingon di sok kep jenti binyohou birop bak yo dini.

³⁶Lewo Teudas ttau hak bikon nonti ninyeng jei bibor ei nijam gi pini jug leu api pinjoi ndig nya ibou sratus bitai injei siceu bit noni. Noro noni tug ndei nimai bimai nimbiam leu lene nide limwa nya intek gimahap ba, nide ninjei bit yamti dima pren hanyen.

³⁷Niabiati bu tirigi nibou ndig kwop limwa nya imangti lene Yudas leu hanjop Galilea cem ttau hak buhum tungwatu imang bibor insi ba, injei siceu bit noni. Noro noni cem tug ndei nimai bimai nimbiam leu api nide limwa nya intek gimahap.

³⁸Gima rino dipingok jingonti tut munhyet dini. Ma jiba jimbuk biyai jibou tut yo dini bijingget yok au. Leu gino ide ningginausi kin ide ninjei bit yamti dima ntun tungwatu nya him ne hagom mipror yon hak ug.

³⁹Noro gino ntun Allah him ne bit bon jinggek tut kan bi. Lewo jibingat bipia jitte tut Allah!” Nikei Puig Yahudi Nya ice tut Gamaliel nipingok yokti.

⁴⁰Leu api ihig yo di igya kui Yesus hanyen kwei leu api yo di igya ser nya imbas yok leu api isok kep yok bingkiem ser bipia ma ingginau tungwatu nya tut Yesus hanyen bu au. Gima ngwig lene ikes yok bimbut.

⁴¹Petrus kin Yohanes iba ingon di llei bibor behei leu Nikei Puig Yahudi ikieti lewo ingat bipia Allah ba ningon com yok tut gima igyai ninghuisi wei drek dip Yesus tu.

⁴²Ba, itri tut Nihyet Di Kei ba, ingginau tungwatu nya tut Yesus kikau ei Tuhan De Ig kin tungwatu ide ig bei nya cem bikwop njap ngwa hagom. Yoni itri tut bipia Yesus ne Nibou Ndig di teu tungwatu biyai niyaijo nijep biyok di Allah preu ei mem yok ri.