Read Hatam KISAH 8 Bible Online

KISAH 8 - Hatam bible

KISAH 8

¹Ba, Saulus cem ningon kei sut Stefanus nimaisi. Ei njap gom ndia lene tungwatu nya sindi ihwen bit yo di inggre kin mbusyamei ei minu ndig Yerusalem nindig bibor. Gima rino yo di ingon jo kep nya inang bintek gimahap bidem hanjop Yudea kin Samaria noro yo di igya kui Yesus igwam nyahan bintek gimahap bi.

²Lene yo di ikuk yok bak Allah ibou poi itig Stefanus ningut lo, ingon ngguk bibor bipim kui jei sut.

³ Noro Saulus hwen kikep yo di inggre kin mbusyamei binggek yok. Noni ug cut igkep yok ei ide ig bei sindam leu api kat pinai nya kin sop nya binggam yok ei ig bui nsi.

⁴Yo di ingon jo kep nya di intek gimahap pima itri tut Nihyet Di Kei bidem minu dima kou hagom.

⁵Filipus ug ei minu ndig gom ei Samaria leu api tri tut Nibou Ndig di teu tungwatu biyai niyaijo nijep biyok di Allah preu ei mem yok.

⁶Tungwatu ningot ndig ingig itingou mem Filipus nihyet bingat mindur di noni bibon bou igyai him apino imang bibor igyok ngon kep nihyet di tibim ei nuhui him.

⁷Lewo ninnei rom nya di igya ei tungwatu ningot ndig ingonti iba ighyet biyahara leu api yehei leu yo dima ingonti. Yo di inggicai nya kin yo di imig lit nya imang bibor ikei hanyen.

⁸Gima rino mben Samaria nya ingon llei bibor.

⁹Ei minu ndig dima cem Simon di ninda dut no rima. Timiei Samaria nya inggap leu tut noni tut mun di noni ba ninda dut biko ninno tu dima. Lene Simon ba ningon di jei sut nonti bitri tut bipia noni mipbor ngat.

¹⁰Gima rino timiei nya leu yo di yuhui mbum bipek kin timiei di inyeng jei ei minu ndig dima yahagom igyok ngon kep Simon nihyet bisimbot kep biyam bipai “No dini ne ‘Nisindemti Nindig Bibor’ di kwei leu Allah ri.”

¹¹Mun di noni ba ninda dut biko ninno tu dima bindei ba, tungwatu inggap leu tut noni nindig bibor bigyok ngon kep nihyet.

¹²Noro Filipus tri tut Nihyet Di Kei tut Allah Ninyeng Tak Kepti kin Yesus Kristus di Nibou Ndig di teu tungwatu biyai niyaijo nijep biyok. Lene pinai nya kin sop nya ingon jo kep Filipus nihyet leu api itur yok ei minyeiti.

¹³Simon cem ningon jo kep Nihyet Di Kei. Tirigi itur noni ei minyeiti leu lene noni bit-bit nyen Filipus binggap leu tut mindur kin bindo di noni bibon nya.

¹⁴Yo di igya kui Yesus di ingat rin ei minu ndig Yerusalem imiap mben Samaria inghapti tut gi ingon jo kep Allah nihyet tu. Gima rino ipinak Petrus kin Yohanes ug ei minu ndig dima.

¹⁵Tirigi ikwei krau minu Samaria lene ingat nadi mem yo di sindi ingon jo kep nya leu binhyepo Allah Ninnei srek kwei ei ingonti,

¹⁶lewo Noni srek kwei ei ingonti bisindem tut yok bigyo. Sindi itur yok ei minyeiti tug hon Yesus ninyeng he yo.

¹⁷Gima rino Petrus kin Yohanes ikes inda ei timiei minu ndig Samaria dip bibindei ba, Allah Ninnei srek kwei ei ingonti.

¹⁸Simon ngat lo, yo di igya kui Yesus ikes inda ei yo dima dip bibindei ba, Allah Ninnei srek kwei ei ingonti. Lene noni yai mitiei bak Petrus kin Yohanes,

¹⁹lene pai biyok “Jikwas nisindemti dini ndrim hi tut dani cem leu binhyepo dikes dinda ei tungwatu dip leu api Allah Ninnei srek kwei ei ingonti.”

²⁰Noro Petrus buhup “Ma ade mitiei pror tut na ei nikineisi hak ug! Akan bipia aba mitiei bipek nisindemti di Allah yai bina e?

²¹Adem mem ayai midyai dini bit nye bi lewo angon sren ei Allah niyai him bi.

²²Gima rino ma attin ser angon kanti di kinei dima leu ba, angat nadi bak Allah leu binhyepo Noni kos ser angon kanti di kinei dima hak ug!

²³Lewo dikan tut bipia angon kinei sut nye nindig bibor ba, mun di sibut srou na cem.”

²⁴Lene Simon hara Petrus kin Yohanes bipai “Ma jingat nadi bak Tuhan leu binhyepo mun di jipai kep dati dima hi cut igkep da bi.”

²⁵Niabiati Petrus kin Yohanes itri tut Yesus di ingat bou igyai him bitri tut Allah nihyet mbigom kin bu leu lene ingkwei hanyen ug ei minu ndig Yerusalem. Yoni imbut bitri tut Nihyet Di Kei kak puig sinon ug ei hanjop mang bibor sindam ei minu Samaria.

²⁶Lo bi lene Tuhan de malaikati gom pai bak Filipus “Akiju! Aug ei bei mpia nibiho[5] ba, akak puig di jo leu minu ndig Yerusalem bibie ug ei minu ndig Gaza ei iggum ndigsi.”[6]

²⁷Gima rino Filipus mbut hak ug. Nok rino noni um mben Etiopia gom di ninyeng jei di ngkwei hanyen ug ei nitimieisi. No dini ne no di nibou kintror di ninyeng jei di ninyeng tak kep mitiei hagom di jo bak nibou ndig sop Kandake ei minu Etiopia ri. Noni ug kuk no bak Allah ei minu ndig Yerusalem,

²⁸leu api bri nide kroba pran bingkwei hanyen ug ei nitimieisi lo, kwop Srat Nabi Yesaya kak puig sinon.

²⁹Allah Ninnei pai bak Filipus “Aug ya kui kroba pran dima ba, asir nitta.”

³⁰Noni ug ya kui kroba pran bimiap lo, andigpoi dima kwop Srat Nabi Yesaya. Gima rino Filipus hig ser noni “Andigpoi e, angon dorti tut srat bokti di akwop dima e?”

³¹No dima buhup “Gino tungwagom pingok da tut bi lene notou mem dingon dor niti i?” Lene noni cigit Filipus bikui ei krobati bit noni.

³² Srat bokti di noni kwop dima pai “Ibuwak Noni nok ijem domba mem ibui bidigo. Nok domba pmot di ikos ninta leu lo, hara bahap niji cem bi.

³³Tungwatu inim kep Noni lene iba ingon di sren bi bibon Noni. Bit bon hi pui sut yo di intun Noni him kan bi lewo niyaijo ei dihyeisi dini dem tu ba, hi di ntun Noni him cem bi.”

³⁴Andigpoi di ninyeng jei di kwei leu minu Etiopia dima hig ser Filipus “Apai mingat bida. Nabi dini pui sut tou i? Pui sut nonti e, he pui sut hiter?”

³⁵Gima rino Filipus ba srat bokti dima nok nitriti bibuhup no dima nihyet bitri tut Nihyet Di Kei tut Yesus binoni.

³⁶Yo cin dima imbut kak puig sinon biyuug krau minyei utti gom. Andigpoi pai “Angat i, minyei ut rimo! Mindei bu ribindei dino ma atur da ei minyei ut dimati bi i?” [

³⁷Lene Filipus buhup “Gino aba angon titut yam bingon jo kep Yesus lene dice tut ba, ayai nitur na ei minyeiti hak ug.” Andigpoi leu minu Etiopia dima pai “Dingon jo kep bipia Yesus Kristus ne Allah Nipmot ri.”]

³⁸Lene andigpoi cuk sigbir bikes kroba pran biya leu api Filipus kin noni ikinyon ba, ijuk ug ei minyeisi lene Filipus tur noni ei minyeiti.

³⁹Hammi tirigi ikiju kui leu minyei ugyousi rino Allah Ninnei teu Filipus leu mpia ttou nsi dima. Andigpoi dima ngat noni bu bi. Noro ba ningon di llei bibor bikak puig dima kikau.

⁴⁰Lene Filipus ngat lo, noni kwei krau minu ndig Asdod kros. Ba, noni tri tut Nihyet Di Kei bidem minu ndig nya hagom kak puig sinon kikau buug krau minu ndig Kaisaria kep.