Read Hatam KISAH 9 Bible Online

KISAH 9 - Hatam bible

KISAH 9

¹Mpe dima lene Saulus cuug yo di ibit Yesus nya kikep bimbuk tut yok lene pi bihwen yok. Noni ug ngat Imam Nibou Ndig,

²bahara noni tut srat nisindemti mem noni pwoi buug sut ei minu ndig Damsyik leu binhyepo nibou mbusyamei Yahudi nya ei minu ndig dima ice tut gi noni nggok ser yo di ingon jo kep Yesus bikat pinai nya kin sop nya cem bibuwak yok hanyen kwei ei minu ndig Yerusalem.

³Tirigi noni mbut dideu minu ndig Damsyik lene ninjeng gom com kros kwei leu mpia-bbed him ttai noni.

⁴Noni tti hak ug ei dihyeisi lene miap nihyet gom di hig ser noni “Saulus e, Saulus e, nggon rino ahwen bit Da i?”

⁵Saulus buhup “Andigpoi e, Na tou i?” Nihyet dima tibim hanyen kwei bipai “Dani ne Yesus di ahwen bit ri.

⁶Akiju ba, aya lene ma aug ei minu ndig dima leu api tungwagom mipingok na tut mun di ayai yo.”

⁷Yo di ibit Saulus inghuisi mpig sut nindig bibor. Yahap iji bimbrap kan bi lewo imiap nihyet noro ingat tungwatu hi bi.

⁸Lene Saulus kiju leu nitti eisi biya niyati lene da niyai noro ngat mpia bi lewo niyai tu. Gima rino nisut bat nya ikrau ninda bicen ug ei minu ndig Damsyik.

⁹Niyai tu kikau mem njap ningai ba, yem njita bidut ndia ngei cem bi.

¹⁰Mpe dima lene Ananias di bit Tuhan Yesus no rima ei minu ndig Damsyik. Noni ngat-hi-ngat bimiap Tuhan nihyet di tibim kwei bihig noni “Ananias e?” Ananias miap “Tuhan e, da rini.”

¹¹Tuhan pai binoni “Akiju ba, aug ei Simpak Sren leu api acem kep Yudas de ig bei ba, anggok ser tungwagom di ninyeng Saulus di nitimieisi leu minu ndig Tarsus. Noni ngat nadi ei sirima.

¹²Noni cem ngat-hi-ngat bingat na di Ananias tirigi acoi ndam noni ba, akes anda ei noni dip leu binhyepo niyai piga hanyen bu.”

¹³Ananias srep “Tuhan e, tungwatu imang bibor ipai sut no dima ninghapti bida bipia noni hwen bit Ade limwa nya ei minu ndig Yerusalem,

¹⁴bipwoi srat nisindem di imam nindig nya ipas binoni bikwei sut mem gima bikat yo di ikuk yok biNani.”

¹⁵Noro Tuhan buhup “Akiju ba, ambut hak ug lewo didimig noni nok Ditde awak leu binhyepo noni tri tut Dani bak ngkiai nya kin nibou ndig nya kin mben Israel yahagom.

¹⁶Ba, Danti midindo binoni tut ninghuisi wei di micut igkep noni drek dip Dani bak yo.”

¹⁷Gima rino Ananias kiju ba, ug ei ig bei dima leu api kes ninda ei Saulus dip bipai binoni “Dikindig na di Saulus e, Tuhan Yesus di ndo Nonti brei bina ei puig sinon pima cuk da kwei leu binhyepo ayai piga hanyen ba, ayai nisindemti leu Allah Ninnei.”

¹⁸Hammi tirigi Ananias nipai bakti dima rino mun di nok wau ninnan tek leu Saulus niyai njep leu api niyai piga hanyen. Noni kiju lene itur noni ei minyeiti.

¹⁹Lene noni yem njita di bindei ba, noni yai nisindemti hanyen bu. Saulus bong bit yo di ingon jo kep Yesus ei minu ndig Damsyik mem njap poi bu.

²⁰Lene noni bipbur buug ei mben Yahudi ide ig mbusyamei sindam ba, kinyon ei nitri nihyetti bipai biyok “Yesus ne Allah Nipmot ri.”

²¹Yo di imiap Saulus nihyet yahagom inggap leu tut ba, ihig yam “No dini bindei ba, yo di ikuk yok bak Yesus ei minu ndig Yerusalem igyai nimai bi e? Apo noni kwei ei sirini bipi bikat yo dima bibuwak yok hanyen ug ei imam nindig nya yoho bei bi e?”

²²Noro Saulus kum ei nimbrap nihyet sindemti bu ba, ndo bindo di sindem nya tut Yesus bipia Noni ne Nibou Ndig di teu tungwatu biyai niyaijo nijep biyok ri. Apino bit bon mben Yahudi ei minu ndig Damsyik itte tut nihyet dima kan bi.

²³ Njap poi ser leu lene mben Yahudi igyok ingon gom mem Saulus.

²⁴Noro hi mbot kep tut ingon kanti dima binoni. Yo dima ikos dik sir simpak nitausi nya bikwop mmun-njap bipi bihwen noni.

²⁵Noro yo di ibit Saulus ibuwak noni mem mmun mau biyuug ei ngug tig mihyeti gom lene iba ba bikim bansi bitu ba tut noni ug ei dihyeisi mu ba, ningwes ngun.

²⁶Saulus ngkwei hanyen ug ei minu ndig Yerusalem bipi bicoi ug ei yo di ibit Yesus ikieti. Noro ittin tut noni. Mbro nok gino Saulus tri tut bipia noni cem bit Yesus lo, ingon jo kep nipaisi dima bi.

²⁷Noro Barnabas ngondut Saulus bibuwak noni kwei ei yo di igya kui Yesus ikieti biya hacan mem noni. Barnabas pui sut Saulus nuum Tuhan ei puig sinon dideu minu ndig Damsyik bipui sut Tuhan nimbrap bit noniti kin niba niji ngkiem bibrim ningkek mem Yesus ei minu ndig Damsyik cem hagom biyok.

²⁸Gima rino Saulus bong bit yok. Lene ba niji ngkiem bitri tut nihyet tug hon Tuhan ninyeng bidem minu ndig Yerusalem nisurti-nipekti.

²⁹Noni mbrap bit mben Yahudi di imbrap nihyet Yunani lene iba ighyet dahat yam noro yoni igyok ingon gom mem noni.

³⁰Tirigi yo di ingon jo kep nindigsi nya ikan tut nuhum yam nsi mem Saulusti dima lene ibuwak noni kwei ei minu ndig Kaisaria leu api ikes yam ba, Saulus ngkwei hanyen ug ei nitimieisi minu ndig Tarsus.

³¹Hon kep njap dima kui lene yo di inggre kin mbusyamei ei hanjop Yudea kin Galilea kin minu Samaria nya yahagom ibong kei igwam kei. Yoni igyai nisindemti hi kin bu ba, imangti ningot ndig bikum yok bu tug hon nisindemti leu Allah Ninnei. Ba, gima hagom tug hon ide niba ningon gom bikuk yok bak Tuhanti.

³²Mpe dima lene Petrus mbut bidem minu dima hagom bicem kep yo di inggre kin mbusyamei. Njap gom lene noni kwei cem kep TUHAN de limwa nya ei minu ndig Lida.

³³Noni um andigpoi Eneas ei minu ndig dima. No dini nggicai. Bit bon noni kiju leu nibongti kan bi kikau ei ari bingwam muhwindaningai su.

³⁴Petrus pai binoni “Eneas e, Yesus Kristus bindei ba, akei hanyen. Akiju leu api akrop ade kwo ngig hak ug.” Pai nok rino Eneas kiju hak biya.

³⁵Timiei minu ndig Lida kin Saron yahagom ingat Eneas di mbut-mbut nyen bou igyai him leu api ingon jo kep Tuhan.

³⁶Sindig Tabita no rima ei minu ndig Yope ba, noni cem ningon jo kep Tuhan. (Iba nihyet Yunani bijem ninyeng hi Dorkas ba, ninyeng ndo tut rusa.) Dorkas de midyai nya hagom kei bibor ba, noni ngondut yo di yuhui mbum nya cem bidem njap ngwa hagom.

³⁷Mpe dima lene noni nggwen bimai. Nisut bat nya ipiap ningut leu lene ikon nimai ei nghim nsi di jo ei ninsi di jo anai.

³⁸Minu ndig Lida kin Yope ne minu di jo dideu yam ri. Gima rino tirigi timiei minu ndig Yope di ingon jo kep nya imiap Petrus ninghapti bipia ningat rin ei minu ndig Lida lene isok ighyet ei ibou can dip bak noni bipai binoni “Ma abrim amig kwei!”

³⁹Petrus kiju bibit yok hak. Tirigi noni kwei krau minu ndig Yope lene yo dima ibuwak noni ug ei nghim nsi di jo anai ei ig di jo-jo yam dip dima. Lene sop kibom nya di ingat rin ei mpia dima inggreu kep noni bipim kep nimai cem ba, indo sinsun ninda kin sinsun dut di jei di Dorkas nap di bitri tungwatu nya tirigi niyaisi jo yo bak Petrus.

⁴⁰Petrus cuk yahagom biyehei leu nghim nsi dima leu api ba nibiau bicom mpia bingat nadi. Noni kes nadi leu lene kiek no ndam nimai bipai “Tabita e, akiju.” Leu api Dorkas da niyai bingat Petrus lene kiju bigwam pijum.

⁴¹Lene Petrus mpu noni bibrim ninda bikiju biya. Leu api noni hig yo di ingon jo kep nya bitut kibom pima yok cem yahagom kwei lene kes Dorkas di niyaijo hanyen biyok.

⁴²Ninghapti tibim tut mindur dima kikau bikieng kep minu ndig Yope nisurti-nipekti leu api tungwatu imang bibor ingon jo kep bipia Yesus ne Nibou Ndig di teu yok leu sisar biyai niyaijo nijep biyok ri.

⁴³Petrus bong ei minu ndig dima njap poi bu bit tukan di ninyeng Simon di tukan nikak mindhe-ndhe ngkek cig.