Read Hatam ROMA 13 Bible Online

ROMA 13 - Hatam bible

ROMA 13

¹Suar bikwop tungwagom-gom bit nibou pemerinta nya ighyet. Allah Nongkom bindei ba, nibou nya ibindei mbut ide ninyeng tak kepti. Allah ta yok bit leu ningon kanti.

²No di srep tut nibou nya ighyet srep tut mun di Allah nyohou dimig tug hon nikos tutti. No di srep tut nibou nya ighyet mitug ndei hukum.

³Lewo yo di igyai kep mun di igbit nya ittin tut nibou nya bi noro yo di igyai kep mun di sibut nya ittin tut yok. Gino jiyok jingon mem ningon kwes kin nibou nya lene ma jiyai kep mun kei bibor apino noni minggei sut je.

⁴Lewo nibou dima ne Allah de awak di yai midyai di bindei mun di kei bibor pek kep mem je ri. Gino jibon mun di kinei lene ma jidigit tut noni lewo noni yai nisindemti mikuisi bi noro mem gima kes hukum ei tungwatu nya dip. Noni ne awak mem Allah rin ba, Allah kes hukum ei yo di isibut nya dip tug hon noni.

⁵Gima rino ma jibit nibou nya ighyet leu binhyepo jingwes ngun leu hukum he bi noro leu binhyepo jibit jingon mien nipingok jeti.

⁶ Gima cem ma jigo belasten bak nibou nya lewo yoni ne Allah de awak di igyai kep ide midyai nya ri.

⁷Gima rino ma jirop ningwam di jibon biyok. Gino idahat je tut belasten ninyeng hi gom hi gom ne ma jigo belasten biyok. Ma joom jenti mem yo di inyeng jei nya bijikon inyenga.

⁸Ma jibon ningwam biyam au. Noro tut ningwam ‘ningon ngakei yamti’ ne ma jibon biyam. Lewo bikwop no di ningon ngakei hi ter ne gima noyam kin nibit leu nok Puig Yahudi niggai serti ri.

⁹ Puig Yahudi niggai serti pai binye bipia ma jicut tut yam au jihwen mun au jinggimang ndiyok au jingon pri kep mun di jo bak hiter au bitut niggai serti nindigsi nya. Noro nirop ninda ndigsi ndo tut niggai serti gom ngat he “Ma jingon ngakei hiter noyam kin gi jingon ngakei jenti.”

¹⁰No di ningon ngakei hi ter mimbuk tut no dima hanyen bi sren. Gima rino ningon ngakei tungwatu nyati noyam kin nibit Puig Yahudi niggai serti.

¹¹Bitut gi pima hagom ne jikan tut bipia tto bou dem mem jida jiyaia. Leu gino ibinai sut njap di sindi ingon jo kep Yesus ei nimbie him kin njap dino Allah miteu nye leu dihyeisi dini ne Allah De njap dideu su.

¹²Jei bi ne mmun pren leu nye rin ba, son dideu njap tekti tu. Ma ikes hon ba, igyai kep mun di kinei di ntun nidinditi him bu au. Noro ma ikrau kep minggwen di ikrau ei nipigati.

¹³Ma ibindei mbut niyai munti di singat kei nya tereu nok yo di imbut mem nipigati. Ma ibihim cem idut pes di pu nye cem icut tut yam cem ikrar kep yam cem ibui yam cem ingon kinei sut yam cem bu au.

¹⁴Noro ma ikrau kep Tuhan Yesus Kristus de minggwen nya lene ma jikes hon ba, jiba joho rok jingut kanti nya di ntun sisar him ba, jisindui sut jingut kanti nya bindei cut je bu au.