Read Hatam ROMA 15 Bible Online

ROMA 15 - Hatam bible

ROMA 15

¹Gino iba ingon com Tuhan bibor ne ma yoom ingon tut yo di ingon jo kep Yesus bibor bi nya bimpu yok tut mun di buhun tak yok. Ma ita ibou ei mun di bindei ba, nyenti ingon kei bibor he au.

²Noro ma bikwop tungwagom-gom bindei nisut no di ningon jo kep dima ningon llei bibor bimpu noni cem. Tug hon niyai munti dima ne nyeni mibiwin kep ningonti leu binhyepo ba ningon com Tuhan bibor.

³ Lewo Kristus ta nibou ei mun di bindei ba, Nonti ningon kei bibor bi. Noro Allah Nihyet pai “Tungwatu nya ighyet tigut Na noro ningat ne ighyet tigut Dani bu.”

⁴Srat bokti ei Allah Nihyetti hagom ngginau nye. Lewo Allah Nihyet ningginau nyeti bindei ba, yoom ingon ba, biwin ingon cem. Apino igyok ingon mem Allah.

⁵Handei kon ma Allah di bindei ba, joom jingon bibiwin jingon sindem tut je leu binhyepo jahagom jinok gom bijingon kwes kin yam bit leu nok bindo di Kristus Yesus ndo binye.

⁶Tug hon nisinati dima lene jahagom mijicom jihyet nok gom ba, jibinggei sut Allah lewo Noni ne ide Tuhan Yesus Kristus Nicig ri.

⁷Gima rino suar jiba jingon gom biya um yam bit leu nok gi Kristus ya um je. Tug hon nisinati dima ne tungwatu inggei sut Allah.

⁸Ma jiyok ngon kep bipia Kristus kwei nok awak mem mben Yahudi leu binhyepo bindo biyok bipia Allah ningon gom bibindei nipreu eisi nya pek kep mem idigup bat-idigai bat nya.

⁹ Yesus bindei ngkiai nya inggei sut Allah drek dip ningon di nggriu sut yokti cem. Allah Nihyet pai, “Gima rino midipai sigyo biNa ei ngkiai nya ikieti bidiba doia bikon anyenga.”

¹⁰ Allah Nihyet pai bu, “Je di ngkiai nya e, ma jingon llei bibor bit Allah de limwa nya di Noni dimig ei su!”

¹¹ Allah Nihyet pai bu, “Je di ngkiai nya e, ma jinggei sut Allah. Je di tungwatu dihyeisi dini hagom e, ma jinggei sut Noni!”

¹² Nabi Yesaya pai, “Tungwagom di ntun Isai him mittau kwei ba, ninyeng tak kep ngkiai nya bibindei ba, inok Nide limwa nya leu api igyok ingon mem Noni.”

¹³Allah bindei ba, igyok ingon mem Noni. Handei kon ba, Noni yai jingon llei bibor kin jingon jo nyahan cem tug hon jide niba ningon com Noti leu binhyepo jiyok jingon mem Noni bibor bikum eisi bu tug hon nisindemti di kwei leu Allah Ninnei.

¹⁴Disut bat jen, dikan tut mungkun bipia mun di kei nyeng mang bibor ntun jeni him ba, jingon ki lene ma jingginau yam igkei cem.

¹⁵Noro diba srat dini bibrim dingkek kep je tut ningginau jeti nya di dibiwin kep jingonti tut tu lewo Allah di singat tut da ba ningon com da tut midyai dima.

¹⁶Noni dimig da bidinok awak mem Kristus Yesus bipinak da leu binhyepo dimpu ngkiai nya. Ditri tut Nihyet Di Kei di kwei leu Allah lene diyai dibou tut yok nok imam leu binhyepo Allah Ninnei dimig yok ei noyam kin mindhe di imam nya ikes ei nimbar hum dokti di bindei ba, Allah joi sut yok. Handei kon ba, Allah Ninnei bindei ba, inok mindhe pima di Noni dimig pijum ei mem Allah.

¹⁷Gima rino bon dingon jei sut midyai di diyai mem Allah lewo dinok gom kin Kristus Yesus.

¹⁸Dikon dihyet tut midyai di Kristus yai tug hon dani he. Lewo nihyet di ditri tut kin midyai di diyai nya bindei ngkiai nya ibit Allah nihyet,

¹⁹drek dip bindo kin mindur di sindem bibor nya kin nisindemti di kwei leu Ninnei cem dibiyai midyai. Ditri tut Nihyet Di Kei tut Kristus bidem minu tirigi dijo leu minu ndig Yerusalem bidimbut kikau ug ei hanjop Ilirikum.

²⁰Dingon bisau sut gima ditri tut Nihyet Di Kei bidem minu di tungwatu nya ikan tut Kristus bigyo. Tug hon nisinati dima ne dikon ig ninggilai ei yo di hiter ide cou nipmemti bi.

²¹ Allah Nihyet pai, “Tungwatu nya di ingon tindur tut Noni mingat Noni. Yo di imiap nihyet bi sren nya ingon dor niti.”

²² Mun di pek kep mem da bigen ser da ninyen apino dibon nituti mem gima dihwou cem kep je bigyo.

²³Noro tini bu ne midyai di diyai bidem minu dini put tu. Dipi bidihwou ngat je ari bingwam mang gi pini jug su noro bi.

²⁴Diba dingon com bipia jei bi lene midihwou ngat je ei jide minu ndig hapuig tirigi dimbut ug ei minu Spanyol. Mpe dima midicem kep je leu binhyepo nyeni yahagom ingon nggei-hi-nggei bit yam. Dihwou ngat jeti dima mibon nituti mem gima jimpu da tut mun di disuar nya kak puig sinon ug ei minu Spanyol.

²⁵ Noro nogindini dingkwei hanyen ug ei minu ndig Yerusalem nipou ug e bidipwoi mun di bahati tut yo di mbusyamei ei sirima.

²⁶Lewo mbusyamei nya ei hanjop Makedonia kin Akhaya ice tut yam hyet tut mitiei di ikwas tut isut bat di Allah de limwa nya di yuhui mbum ei minu ndig Yerusalem.

²⁷ Ice tut yam hyet bit leu yonti ingon kanti. Noro ningat ne yoni ibon ningwam bak isut bat yo di ingon jo kep di yuhui mbum nya ei minu ndig Yerusalem drek dip Allah de mun di kei di bitut innei di mben Yahudi ikwas tut yok. Gima rino ma ngkiai nya iba ide mun di dihyeisi dini birop mben Yahudi ide ningwam hanyen biyok.

²⁸Mpe dino diyai gini biput bidikes mitiei nimangti dima hagom ei mben Yahudi indati leu su ne dingkwei ba, duug ndam minu Spanyol lo, midihwou cem je sindam.

²⁹Mpe di dihwou ttau kep je ne dikan tut bipia dikwei sut Kristus De munkwas di bitut jinnei nindig bibor bak jeni.

³⁰Disut bat jen, ditigtai je leu binhyepo juhuk nadi bak Allah kikau mem da drek dip ide niba ningon com ide Tuhan Yesus Kristusti kin ide ningon ngakei yamti di Allah Ninnei yai binye cem.

³¹Ma jingat nadi leu binhyepo Allah miteu da bidingwes ngun leu yo di ingon jo kep bi nya ei hanjop Yudea inda nsi. Ma jingat nadi mem Allah de limwa nya ei Yerusalem cem leu binhyepo ijoi sut munkwas di bahati tut yok di dipwoi ug mem yok.

³²Leu api gino Allah joi sut ne diba dingon di llei bibor bihwou ngat je leu binhyepo digwam kep dinghuisi bidiyai nillei cem bit je.

³³Handei kon ba, Allah di bindei ba, tungwatu nya ibong kei igwam kei ningat rin bit jahagom. Igbit ri.