Read Hatam ROMA 3 Bible Online

ROMA 3 - Hatam bible

ROMA 3

¹Gi nok ne nintun mben Yahudi himti dima bindei tungwatu nya itug ndei mun di kei mindei i? Midut sunat dima bindei dino yoni itug ndei mun di mimpu yok e?

²I! Mun dima yok mpu mben Yahudi nindig bibor! Nimbie him ne Allah ba ningon com yok tut Nonti Nihyet di yai biyok tu.

³Mbro nok gino mben Yahudi bihi ingon gom bi lo, gini ndo bipia Allah ningon gom tut tungwatu nya bi e?

⁴ E bi! Mbro nok gino tungwatu yahagom ibicum kikep lo, ma jiyok ngon kep bipia Allah Nihyet tibim tut mun di nijit-jau hak. Lewo Allah Nihyet pai, “Ahyet ndo bindo brei bak tungwatu yahagom bipia angon sren-srau yo. Gino aya ei nikei noho bei ne abindei cut yo di ipai kep Nani yo.”

⁵Noro gino ide niyai mun tunggweisi bindei ba, Allah niyai munti di sren-srau nya jo nibreisi lene ipai mindei i? Notou nyeni ibuhup yo dima ighyet i? Allah yai mun tunggwei tirigi kes hukum ei nyeni dip e? (Dibuhup tereu nok tungwatu dihyeisi dini igyai kepti.)

⁶E bi! Gino Allah ningon sren-srau bi ningat ne bit bon Noni kes hukum ei tungwatu dihyeisi dini dip kan bi.

⁷Noro gino ditde niyai mun tunggweisi dima bindei Allah niyai mun sren-srausi kum ei Nide Nikei-kau-keisi leu api tungwatu nya ibinggei sut Noni ne nggon rino Noni pai kep yok bipia ibon sisar i?

⁸Nok rino ma ipai hak “Jikwei ba, ibon sisar bibindei mun di kei pek kep.” Nok e? Tungwatu nya ibou poi ipai kep da bipia ditri tut nihyet dima! Noro yo dima mitug ndei hukum leu Allah drek dip.

⁹Gi nok lene nye di mben Yahudi igyaijoti kei dor njiriek ngkiai nya igyaijoti e? E bi! Dipai brei bije tu bipia sisar om kep mben Yahudi kin ngkiai nya yahagom ingonti noyam.

¹⁰ Bit leu nok gi ipas ei Allah Nihyetti, “No di ningon sren ei Allah niyai him no rinaha bi sren ba,

¹¹hi di ningon dorti tut mun di srenti bikuk no bak Allah cem no rinaha bi sren.

¹²Tungwatu nya yahagom ikiek yoho ter leu Allah ba, yahagom israwir tu. No di yai mun di igbit no rinaha bisrig ikieti bi sren. Hi bi sren!

¹³ Ikibou bei mbrai noyam kin jui dip di mpiei bibindei nimai. Iris igkeisi noyam kin irai di silipti yuhui ngkek ba, ighyet di bindei nimai tibim leu yuhui him noyam kin wou piet naham tungwatu nyati ba,

¹⁴ irom ighyet kui tungwatu nya lene iba ighyet biyai yok ba,

¹⁵ ibisau ndam gi ihwen bit tungwatu nya bigyai nimai biyok ba,

¹⁶ibindei ba, tungwatu nya iba nitok biyam lene ingon buhun bibor binggi imbutti nya,

¹⁷igyai tu leu puig di bie ndam tungwatu nya ingon kwes kin yamti ba,

¹⁸ iba ingwes mien bikuk yonti nyahan ei Allah Noho bei bi sren.”

¹⁹Nyeni ikan tut bipia Puig Yahudi nicukti titut yam tak kep yo di icoi bit Nihyet dima ninyeng di tak kep yokti leu binhyepo bit bon hi pai mun bisu tindei kan bi ba, ndo brei bipia Allah gwam nok nikei di mbus tungwatu dihyeisi hagom ingonti.

²⁰ Lewo bit bon tungwa hi yai ningon kwes kin Allahti drek dip nibon munti di bit leu nok Puig Yahudi nicuk noti kan bi. Noro nicukti dima ndo brei bak tungwatu nya bipia yahagom ibon sisar.

²¹Noro tini bu ne Allah ndo puig di bie tut tungwatu nya ndam ingon di kwes kin Noni brei binye tu lo, puig dima kriau Puig Yahudi ningginausi nya. Srat nya di Musa kin nabi nya ipas kep mbot kep tut munhyet dima.

²² Allah bindei tungwatu nya ingon kwes kin Noni drek dip ide niba ningon com Yesus Kristusti. Allah yai nok gima mem yo di ingon jo kep Kristus yahagom lewo mben Yahudi kin ngkiai nya ter leu yam bi.

²³Tungwatu nya yahagom ibon sisar tu ba, yahagom ingat rin ei minu ting leu Allah di joi sut gima teu yok leu sisar biyai niyaijo nijep biyok.

²⁴Noro Allah ba ningon di singat tut tungwatu nya mikuisi biyai ingon di kwes kin Noni hanyen tug hon Kristus Yesus di kwek yok leu sisar.

²⁵Allah sindui sut Kristus Yesus ei leu api Yesus mai nok nimbiam bibindei ba, tungwatu igyai gi kos ser ide sisar drek dip ide niba ningon com Noniti. Allah yai nok gima leu binhyepo ndo ningon di sren-srau brei binye. Gi nipou kwei bipek ammani kep ne Allah om ningon tut tungwatu nya ide sisar bikes hukum ei yok dip bi.

²⁶Noro tini bu ne Noni yai nibou tut ide sisar leu binhyepo ndo bindo tut ningon sren-srausi. Tug hon nisinati dima ne Allah ndo brei bipia ningon sren-srau bibindei ba, bikwop no di ba ningon com Yesus ningon kwes kin Allah hanyen.

²⁷Gima rino bit bon nyeni ingon jei sut mun nyeng hi kan bi. Nggon rino bit bon ingon jei sut mun nyeng hi kan bi i? Lewo igyai ingon di kwes kin Allah drek dip gi ibit leu nok Puig Yahudi nicuk nyeti e? E bi! Noro ingon kwes kin Allah drek dip ide ningon jo kep Kristusti.

²⁸Gima rino nirop ninda ndigsi pai bipia tungwatu nya igyai ingon kwes kin Allahti drek dip ide niba ningon com Yesus Kristusti lene drek dip gi ibit leu nok Puig Yahudi nicuk yokti nya bi.

²⁹He ma Allah ne Allah mem mben Yahudi yongkom he rin e? Noni ne Allah mem ngkiai nya cem rin bi e? I, Noni ne Allah mem ngkiai nya cem.

³⁰ Lewo Allah ne Allah gom ngat. Noni bon nituti mem mben Yahudi igyai ingon kwes kin Noni hanyen drek dip ide niba ningon com Noti. Ba, Noni bon nituti mem ngkiai nya cem ingon kwes kin Noni hanyen drek dip ide niba ningon com Noti.

³¹Gini ndo bipia ide niba ningon com Kristusti com Puig Yahudi nicukti nya bihigom e? Nok bi! Noro iba ide niba ningon com Kristusti bahati tut nicukti dima.