Read Hatam ROMA 5 Bible Online

ROMA 5 - Hatam bible

ROMA 5

¹Nogindini nyeni ingon kwes kin Allah hanyen tug hon ide niba ningon com Noti. Gima bindei ba, igyai ingon di jo nyahan ei Allah Noho bei tug hon ide Tuhan Yesus Kristus.

²Yesus bindei Allah nisingat tut nyeti dima pek kep mem nye tug hon ide niba ningon com Noti. Nogindini igyaijo tug hon Allah nisingat tut nyeti. Gima rino ingon llei bibor[2] lewo iba ingon com bipia ipriet kin Allah nikei-kau-keisi ei nidipti bu!

³Lene gima he bi. Ingon llei bibor[3] drek dip mun di bindei nyeni inghuisi wei lewo ikan tut bipia ninghuisi wei di cut igkep nye dima bindei ba, iba ibou coi mem mun nyeng hagom.

⁴Ide niba nibou coi mem mun nyeng hagomti biyai ingon nddong drek dip mun di bingon nye bibindei ba, igyok ingon mem ba,

⁵ide niyok ningon mem dima biyai ingon pus tut mun nyeng hi bi lewo Allah pwoi Nide ningon ngakei nyeti ei ingonti tug hon Nide Ninnei di yai binye tu.

⁶Mbro nok gino ingat rin ei minu ting leu Allah bisindem bi cem lo, Kristus mai mem nyeni dem igbit tto bou di Allah preu ei su.

⁷Nggruk bibor mem tungwagom kes niyaisi ei bimai luei no di ningon sren. Mpaba tungwagom mikes niyaisi ei bimai luei no di ningon singat kei.

⁸Noro Allah ndo ningon ngakei nyeti brei binye tirigi Kristus kes niyaisi ei bimai luei nye di tungwatu di ibon kep sisar!

⁹Nogindini igyai ingon kwes kin Allah tug hon Kristus nimaisi. Gima rino jo nibreisi bipia Noni miteu nye leu hukum di Allah mikes ei tungwatu nya dip.

¹⁰Gino ei nijam di iba nitok bak Allah lo, Noni bakei nyeti tug hon Nipmot nimaisi lene jo nibreisi bipia nogindini tirigi Allah jem nisut bit nye dini ne Noni teu nye leu sisar biyai niyaijo nijep binye lewo Kristus niyaijo hanyen tu!

¹¹Lene gima he bi lewo ingon llei sut Allah nisingat tut nyeti di tug hon ide Tuhan Yesus Kristus lewo Noni bindei ba, Allah jem nisut bit nye.

¹² Sisar coi kwei ei dihyeisi dini tug hon tungwagom ba, nide sisar buwak nimaisi kwei. Leu api nimaisi kieng kep tungwatu yahagom lewo yahagom ibon sisar tu.

¹³Nipou tirigi Allah yai Puig Yahudi niggai serti bak Musa bigyo ne tungwatu nya ibon kep sisar. Noro Allah kwop kep ide sisar dima bi lewo Noni yai Puig Yahudi niggai serti biyok bigyo.

¹⁴Mbro nok gima lo, ei nijam di Adam ningat rin kikau ug bipek nijam di Musa ningat rin ne nimai tak kep tungwatu yahagom. Mbro nok gino ibon sisar tug hon nisinati di noyam kin Adam de nipigau hanjopti bi lo, nimaisi tak kep tungwatu yahagom. Adam ndo bindo tut No di mikwei ei nidipti bu.

¹⁵Noro yahacem ter leu yam. Lewo Allah nisingat tut nyeti bon ninyeng nindig bibor gino ibinai sut Adam nipigau hanjopti. Ningat ne imang bibor itug ndei nimai drek dip tungwagom nipigau hanjopti. Noro Allah nisingat tut nyeti di nindig bibor di teu imang bibor leu sisar mikuisi bon ninyeng nindig bibor bidor njiriek tug hon tungwagom di Yesus Kristus nisingat tut nyeti.

¹⁶Ba, Allah nisingat tut nyeti kin Adam nipigau hanjopti ter leu yam. Tungwagom nipigau hanjopti nimbie him bindei ba, Allah pai kep tungwatu nya pia “Ingon mui.” Noro niabiati sisar mang bibor srou kikep tungwatu nya lene Allah nisingat tut nyeti ttau kwei sut nisimbot datti “Ingon ngun!”

¹⁷Ningat ne tungwagom nipigau hanjopti bindei ba, nimai tak kep tungwatu yahagom tug hon tungwagom dia. Noro Yesus Kristus Nongkom niyai munti bindei ba, mun di bon ninyeng nindig bibor dor njiriek bu pek kep mem nye. Bikwop tungwa tou rino kau dimbou leu Allah nisingat tut noti biyai ningon kwes kin Allah hanyen ne mimbri mikui niyaijoti tug hon Kristus.

¹⁸Gima rino nipigau hanjopti gom ngat pima bindei ba, tungwatu nya yahagom itug ndei hukum noro No di bit leu Allah ningon kanti pima kwek yahagom leu ide nitunggweisi nya biyai niyaijo nijep biyok.

¹⁹Tungwatu nya imang bibor iba yo kep ingon di rom tug hon tungwagom di bit Allah nihyet bi. Nok gima cem tungwatu nya imang bibor migyai ingon di kwes kin Allah hanyen tug hon Tungwagom nibit Allah nihyetti.

²⁰Allah Nonti yai Puig Yahudi niggai serti bak mben Yahudi. Mbro nok gino tungwatu nya ibingon mem gima ibit Puig Yahudi niggai serti lo, ikum ei nipigau Puig Yahudi niggai serti ba, ibon sisar ei Allah niyai him. Mbro nok gino ikum ei ide nibon sisarti nindig bibor lo, Allah kum ei nisingat tut yokti nindig bibor bu.

²¹Gi nok lene suar nyeni yahagom itug ndei nimai lewo ibon sisar tu. Noro Allah singat tut nye bitin puig di bie ug ei ingon kwes kin Noni hanyenti. Gino ingon kwes kin Noni hanyen tu ne Noni miyai niyaijo nijep di jo kikau binye tug hon ide Tuhan Yesus Kristus.