Read Hatam KORINTUS GI NIGOM 1 Bible Online

KORINTUS GI NIGOM 1 - Hatam bible

KORINTUS GI NIGOM 1

¹Da di Paulus dipas srat dini hwou ndam je drek dip Allah di ta da nok no di ya kui Kristus Yesus bit leu ningon kanti. Sostenes di ingon him cem ningat rin bit da.

² Nipigo Allah de mbusyamei ei minu ndig Korintus. Allah hig jeni bijinok Nide limwa di ingon kwes-kwau nya tug hon jide ninok gom kin Kristus Yesusti. Ba, gima noyam kin yo di mbusyamei nya di ikuk yok bak Yesus Kristus bidem minu. Noni ne Tuhan mem yoni kin nyeni cem ri.

³Handei kon ba, Icig Allah kin Tuhan Yesus Kristus isingat tut jeni ba, ibiyai jingon jo nyahan.

⁴Dipai sigyo bak Allah bikwop njap ngwa hagom drek dip Allah di singat tut je tug hon Kristus Yesus.

⁵Lewo jimbun mun di kei nya hagom drek dip gi jinok gom kin Kristus. Jingon ki tut mun di bitut ninnei hagom lene jiba jiji ngkiem bingginau tungwatu nya.

⁶Nihyet tut Kristus com nigau ei jingonti bingkiem-kiau,

⁷leu api jiyok jingon mem ide Tuhan Yesus Kristus nittau hanyenti. Apino jitunggwei sut mun di kei nyeng gom di Noni njei bak jeni bi.

⁸Noni nyohou je biyai jingon nddong kikau bije bipek njap ningwig honti leu binhyepo jingon nddong mem ide Tuhan Yesus Kristus De Njap nitekti.

⁹Dem mem gima jiba jingon com Allah di ningon gom. Noni hig jeni bijinok gom kin Nipmot Yesus Kristus di nok ide Tuhan.

¹⁰Disut bat jen, dibidip huk je drek dip Tuhan Yesus Kristus ninyeng. Ma jice tut yam hyet leu binhyepo jiba nitok biyam au. Ma jingon kanti kin jibou ngwakti hagom nok gom.

¹¹Dibidip huk jeni nok lewo Kloe nide bat nya ibou poi ibakilak je bipai bida bipia jiliriem yam.

¹² Jisindui sut ba, dipai sut ibou poi di leu jikieti di ipai sut yonti “Nitti kin Paulus” lene ibou poi bu di ipai sut yonti “Nitti kin Apolos” lene ibou poi bu di ipai sut yonti “Nitti kin Petrus” lene ibou poi bu di ipai sut yonti “Nitti kin Kristus.”

¹³Mbenjen! Ma jikwas Kristus tut yam e! Apo Paulus mai luei je ei biei salibti e? Apo itur je ei minyeiti leu binhyepo jiya kui da di Paulus e? Ei bi!

¹⁴ Dipai sigyo bak Allah tut gino ditur Krispus kin Gaius ibou can ndima he lene ditur hiter bi.

¹⁵Bit bon hi pai kep da bipia ditur je leu binhyepo jiya kui da kan bi. (

¹⁶ Ningat ne ditur Stefanus kin nide bat nya cem. Noro bit bon dikan kep gino ditur hiter kan bi.)

¹⁷Kristus cuk da mem gima ditur tungwatu nya bi. Noro sok Allah De Nihyet Di Kei ei da dip bak tungwatu nya. Suar diba diji di nggan tut nihyet di mmau bitri tut nihyet dima au. Leu gi nok ne nihyet tut Kristus nimai ei biei salibti nok bu tan he.

¹⁸Mem yo di yuug dor nikineisi ne nihyet tut Kristus nimai ei biei salibti dem kep nok nihyet minyei he. Noro mem nye di igyai niteu leu sisarti kin niyaijo nijep ne nihyet dima dem kep nok Allah de nisinati mem gima ndo Nide nisindemti ri.

¹⁹ Lewo Allah nihyet tibim kwei bipai binye, “Dibindei cut ningon kiti di kwei leu yo di ipai sut yonti bipia ingon ki nya. Dibindei pror nihyet di mmau di kwei leu yo di iji nggan nya.”

²⁰ Notou mem yo di ingon ki nya i? Notou mem guru puig Yahudi nicukti nya i? Notou mem tungwatu dihyeisi dini di iba ighyet bidahat yam i? Allah ndo brei bipia ningon di ki di ntun dihyeisi dini him ne nihyet minyei ri.

²¹Lewo Allah di ningon ki bindei ba, bit bon tungwatu nya ingon jo kep Noni tug hon ide ningon kiti kan bi. Noro Noni kos tut bipia Noni miteu yo di ingon jo kep Noni leu sisar biyai niyaijo nijep biyok tug hon nihyet di nyeni nitri tut biyok lo, tungwatu nya ikan bipia nihyet dima ne nihyet minyei he ri.

²²Mben Yahudi ijoi sut ingat mindur lene mben Yunani yuhuk bram ningon kiti di ntun dihyeisi dini him.

²³Noro tut nyeni ne nitri tut Kristus nimai ei biei salibti. Mben Yahudi ingon mpo tut nihyet dima ba, ngkiai nya ikan bipia nihyet dima ne nihyet minyei he ri. Lene ngkiai nya ikan bipia nihyet dima ne nihyet pei mbum ri.

²⁴Noro nihyet tut Kristus ndo tut Allah de nisindemti kin ningon kiti ba, nihyet dima mem mben Yahudi kin ngkiai nya di Noni dimig yok binok Nide limwa nya.

²⁵Mbro nok gino tungwatu nya ikan bipia Allah ba ningon di tindur biyai niyai munti gom-gom lo, ningon ki nindig bibor dor njiriek ningon kiti di ntun tungwatu dihyeisi dini him. Mbro nok gino ikan bipia Allah sindem bi lo, Noni sindem bibor dor njiriek nisindemti di ntun tungwatu dihyeisi dini him.

²⁶He disut bat jen, ma jibisrip tut jenti nipou tirigi Allah sindi hig jeni bijinok Nide limwa nya. Mpe dima ne jigom-gom he jingon ki lene jigom-gom he jisindem lene jigom-gom he jinyeng jei bou tungwatu nya igyai him.

²⁷Noro Allah bisinggre bidimig mun di tungwatu nya ikan bipia bon ninyeng bi nya leu binhyepo binim kep yo di ingon ki nya. Ba, Noni bisinggre bidimig mun di tungwatu nya ikan bipia sindem bi nya leu binhyepo binim kep yo di mimbri kui ingkek nya.

²⁸Allah dimig mun di tungwatu dihyeisi dini ico kep cem ingwes pri gau cem ikan bipia bon ninyeng bi cem leu binhyepo Noni binggek tut mun di tungwatu dihyeisi dini ikan bipia bon ninyeng a.

²⁹Tug hon nisinati dima ne bit bon hi ningon jei sut nonti ei Allah niyai him kan bi.

³⁰Allah Nonti bindei ba, jinok gom kin Kristus Yesus. Igyai ningon kiti tug hon Kristus cem tu. Allah bindei ba, igyai ingon di kwes kin Noni tug hon Kristus ba, inok Nide limwa di ingon kwes-kwau nya ba, Noni kwek nye leu ide sisar cem tu.

³¹ Gima rino bit leu nok gi ipas ei Allah nihyetti “Tungwa tou rino nggeinggwang lene ma nggeinggwang tut Tuhan de midyai nya.”