Read Hatam KORINTUS GI NIGOM 4 Bible Online

KORINTUS GI NIGOM 4 - Hatam bible

KORINTUS GI NIGOM 4

¹Ma jiba jingon bisrip huk tut nye bipia ninok awak mem Kristus. Allah ba ningon com nye tut Nide ningon kanti di tungwatu dihyeisi dini ikan tut bi.

²Mun di bon ninyeng mem no di awak rino ma ningon gom tut niceu a.

³Gino jimbus dingonti tug hon nisinati di ntun dihyeisi dini him ne gima bon ninyeng mem da bi. Ningat ne dimbus danti dingonti cem bi.

⁴Dingon mien huk niti tut mun nyeng gom bi. Mbro nok gima lo, mun di ndo bipia dingon ngun ningat rin bi. No di mimbus dingonti rino Tuhan Nongkom di kos tut bipia diyai mun tunggwei sut e he, diyai mun tunggwei sut bi e?

⁵Gima rino ma jikos tut tungwatu nya ide niyai mun tunggwei si haninyai au. Lewo tto bou dem bigyo. Ma jibet jingon ei mem Tuhan nikwei hanyenti. Noni mimbot kep tut mimun di jo ei nidinditi bipiga digai ingon kanti di jo nding ei ingon bei hagom yo. Mpe dima lene Allah mikos tut mun di kei bak bikwop tungwagom-gom di dem mem gima.

⁶Disut bat jen, diba srat bokti di dipas ei su nya hagom bisrou Apolos nyeni ba, bon ninyeng mem je. Diba nye cin dini bindo bindo bije leu binhyepo jiyok ngon kep nipingok tungwatu nyati di pai binye “Ma jikrau kep nidimig sutti nya.” Tug hon nisinati dima bit bon jimig mbus yam bijingon jei sut hi lene jingwes pri gau hi kan bi.

⁷Tou ribindei ba, jinyeng jei dor njiriek leu nindigsi nya i? Mun di jima nya hagom kwei leu Allah! Leu gima ne nggon rino jingon jei sut jenti tereu nok gino jimati nya hagom kwei leu Allah bi i?

⁸Jo nibreisi bipia jisuar mun nyeng hi bu bi! Jimbun mun nyeng hagom tu! Jinok nibou ndig nya tu! Noro bitut nyeni bi. I, dingon llei sut gi jinok nibou ndig nya leu binhyepo nipriet kin jide ninyeng tak kepti.

⁹Noro dikan bipia Allah kuk nye di niya kui Kristus biniya abia kep nide limwa nya yahagom tereu nok yo di isima nya di itug ndei nimai brei bou malaikati kin tungwatu yahagom igyai him.

¹⁰Nyeni ningon mbum ei tungwatu nya igyai him drek dip Kristus lo, jingon ki ei tungwatu nya igyai him tug hon jide ninok gom kin Kristusti! Niwei bibor noro jisindem bibor! Tungwatu nya ingwes pri gau nye noro inggei-nggwang tut je!

¹¹Nipou kwei bipek ammani kep ne nyeni ninggum cem ninggobiau cem nijuk sinsun di rik-ta cem tungwatu nya ibui nye cem nibong-bong nyen bidem minu he cem,

¹² nicom nahanggwap mem nibahati tut nyenti cem. Gino tungwatu nya ikucang nye lene ningat nadi tindei yok ba, gino ihwen bit nye lene noom ningonti,

¹³gino ikkin kep nyeni ninghapti lene niba ningon di nggriu birop hanyen biyok. Ibibon nye noyam kin mumpiang dihyeisi dini. Nyeni ne nggruau ei tungwatu nya igyai him nipou kwei bipek ammani kep.

¹⁴Dipas kep srat bokti dini bak jeni leu binhyepo dibinim kep je bi noro dibipingok jingonti tereu nok jinok dimunggwom bat di dingon ngakei yok nya.

¹⁵Mbro nok gino yo di inyohou jide niyaijo nok gom kin Kristusti imangti ibou sribu simnai lo, jicig gom ngat he. Dangkom dinok jicig tug hon Nihyet Di Kei di ditri tut bije ba, dinyohou jide niyaijo ei Kristusti.

¹⁶ Gima rino dibidip huk je leu binhyepo jibit leu bindo di dindo bije.

¹⁷Gima rino dicuk Timotius hwou ndam je. Noni ne dipmot ndia rin ba, ba ningon di gom bibit Kristus. Ma jiba jingon com noni. Lewo noni mibindei ba, jiyok ngon kep nisinati di ntun niyaijo nok gom kin Kristus him. Dibit nisinati dima ba, dingginau mbusyamei nya hagom tut bidem minu.

¹⁸Ibou poi di isrig jikieti ingon jei sut yonti lewo ikan bipia midihwou ngat je bi.

¹⁹Noro gino Tuhan joi sut ne midihwou ngat je leu binhyepo diyok diyai kep yo di ingon jei nya. Mpe dima lene dipigot bram igyai munti nya ba, dintu kep mun di tibim leu yuhui him he bi.

²⁰Leu gino Allah ninyeng tak kep tungwagom niyaijoti ne gima jo nibreisi tug hon nide ningon nddongti lene tug hon nipaisi he bi.

²¹Gima rino ma jikos tut dem igbit leu gi hi di jingon llei sut. Diba dihyet singga bihwou ngginau jeni e, he diba dingon di nggriu kin dingon ngakei jeti bihwou ngginau jeni e?