Read Hatam KORINTUS GI NIGOM 5 Bible Online

KORINTUS GI NIGOM 5 - Hatam bible

KORINTUS GI NIGOM 5

¹ Jinghapti tibim kwei brei bida tut sisar nicut tut yamti di kinei bibor di srou je di mbusyamei nya. Ningat ne tungwagom cut tut nicig nitnem mien. Mei! Yo di ingon tindur nya ibon sisar di kinei bibor dima bi!

²Mbro nok gima lo, jingon jei. Noro ma jingon ngguk tut sisar dima bijiciu ser no dima ninyeng leu daptar yo di mbusyamei nya leu binhyepo srig jikieti bu bi.

³Ba, mbro nok gino dingat rin ei minu ting leu je lo, dinnei ningat rin bit je. Gima rino dipai tug hon Tuhan Yesus ninyeng tereu nok gi dingat rin bit je bipia suar jikes hukum ei no di bon sisar dima dip tug hon nisinati dini.

⁴Tirigi jinduk yam ei lene dani cem dingat rin bit je tug hon ide Tuhan Yesus nisindemti di srig jikieti ne suar,

⁵jikes no dima hanyen ei Bilis nindati leu binhyepo ningut sar. Tug hon nisinati dima ne ninnei ningwes ngun mem Tuhan De Njap nitausi.

⁶ Dem tut gima jingon jei sut jenti bi. Jikan tut nihyet nibiti ninda “Roti ninjep di bigbibor bindei ba, tepun hagom dwoi bibor binindig.”

⁷ Ma jikus roti ninjep timiei di ndo tut sisar leu jikieti leu binhyepo jinok tepun nijep di ninjep srigsi bi. Ba, dikan tut bipia jinok tepun di nijep. Tungwatu nya ibui Kristus noyam kin gi ibui domba kep Njap Ndig Paskah di bindei ba, ide Njap Ndig Paskah dem ei su.

⁸ Gima rino ma jikwei ba, iba roti di ninjep srigsi bi bibon pesta kep ide Njap Ndig Paskah. Lewo roti di ninjep srigsi bi tereu nok ingon di gom kin nipwoi Allah ningon. Ma iba roti timiei di ninjep srigsi bibon pesta kep ide Njap Ndig Paskah au. Lewo roti timiei di ninjep srigsi tereu nok sisar kin mun di mbuk nya.

⁹Apo disok kep jeni tug hon srat di dipas hwou mem jeni nipou su bipia ma jiba jingha bak yo di icut tut yam.

¹⁰Gi disok kep je dima ne bitut yo di ingon tindur nya di icut tut yam cem idrui bou ngwak cem inok ninggimang cig cem ikuk yok bak kwar cem bi. Disok kep jeni tut yo dima bi. Gino jibingon mem gima jimbres jenti leu yo dima lene gima tereu nok jikes dihyeisi dini ei bijinang leu.

¹¹Noro dingon kanti rinok gini. Ma jimbres jenti leu jisut no di kon ninyeng no di Kresten lo, cut tut sop cem drui bou ngwak cem kuk no bak kwar cem kkin kep hiter ninghapti cem dut kep mun di pu noni igkei cem ninggimang mun cig cem yahagom. Ma jigwam kui meja bijiyem njita bit noni au!

¹²Lewo midyai nimbus yo di ingon tindur nya ingonti dima srig ditde midyai nyati bi. Allah Nongkom mimbus yo dima ingonti. Noro suar jimbus yo di inggre kin jide mbusyamei ingonti.

¹³ Bit leu nok gi ipas ei Allah nihyetti “Ma jicom no di sibut leu jikieti hak ug.”