Read Hatam KORINTUS GI NIGOM 9 Bible Online

KORINTUS GI NIGOM 9 - Hatam bible

KORINTUS GI NIGOM 9

¹Diyati kwas bidiya kui Tuhan Yesus ba, dingat Noni bou diyai him tu. Jeni ne ningat di kei di ntun da him tug hon midyai di diyai mem Tuhan ri.

²Mbro nok gino hiter ipai sut da bipia diya kui Yesus bi lo, jijem dinyeng no di ya kui Yesus. Lewo jide niyaijo nok gom kin Kristusti rinok mun di bindo tut gi diya kui Yesus.

³Gino tungwatu nya iba ighyet biyai da lene dibuhup nok gini.

⁴Apo dem tut gima ditug ndei njita di diyem kin ndia ngei di didut tug hon ditde midyai nya bi e?

⁵Apo dem tut gima dibuwak sop Kresten nok ditnem kak dimbutti noyam kin yo di igya kui Yesus nindigsi nya bitut Tuhan Yesus nikinjoi bat nya kin Petrus bi e?

⁶He ma Barnabas nyengkom he rino nicom nahanggwap binibitug ndei mun di bahati tut nyenti e?

⁷No di tentara ba mun di mbun nya bahati tut nonti bi! No di yai miai ba anggur puk ba anggur ningat ndrim hi mem nonti biyem kep ninggum! No di hyen kep domba nya dut kep leu domba dima nido ngei!

⁸Dipai nok gima drek dip tungwatu nya igyai kepti bikwop njap-njap bi. Lewo Allah nihyet cem tot kep nipingok nyeti dima.

⁹ Srat di Musa pas pai “Ma jingot kep ser sapi di co kep gandum ba, cig nisina bai leu ningan dima nuhui au.” Nipaisi dini ndo bipia Allah nyohou sapi nya e?

¹⁰E bi! Noni nyohou nyeni cem. Ningat ne nipaisi dima tut nyeni ri. Lewo no di yai miai kin no di ket gandum ningat kwei ei gudanti ne dem mem gima ikwas njita ndrim hi tut yahacem drek dip midyai di igyai nya.

¹¹ Nahap mun di bitut ninnei tereu nok ningan ei jingonti tu. Gino nitindei kep jindati tut mun di pror yon ne buhun mem jeni e?

¹²Gino dem mem yo di hiter itindei kep jindati tut mun di pror yon lene dem mem nyeni cem miniyai nok gima lo, dor njiriek bu e? Mbro nok gino dem mem ditindei kep jindati lo, doom dingon tut hak ug. Lewo diba dibou coi mem mun di cut igkep da hagom leu binhyepo dibindei ba, mun nyeng hi bigen ser Nihyet Di Kei tut Kristus bi.

¹³ Jikan tut bipia timiei Tuhan De Ig itug ndei njita leu midut di ibon ei Ig dima bi e? Yo di ibui mikwau bibam ei nimbar hum dokti nya cem itug ndei ndrim hi leu mikwau di ibui bibam bi e?

¹⁴ Nok gima cem Tuhan kos tut bipia yo di itri kep Nihyet Di Kei mitug ndei imuhup leu Nihyet Di Kei di itri kep.

¹⁵Mbro nok gino dem mem ditindei kep jindati tut mun di Tuhan kos tut binye lo, diyai bi sren. Diba srat dini bitindei kep jindati tut mun di Tuhan kos tut mem nye dima bi. Nnaba dimai hak nipou ug e leu ma mun di disimbot dat dima pror leu da.

¹⁶Tut gi ditri tut Nihyet Di Kei lene gi mbun dingon jei sut bi lewo Tuhan sok nihyet ei da dip mem gima ditri tut bak tungwatu nya. Aye! Notou mem da gino dikes hon biditri tut Nihyet Di Kei bi i?

¹⁷Leu gino dibindei mbut midyai dima tug hon dijoi sutti ne dem mem gima ditug ndei dimuhuba. Noro Allah nicuk dati bindei ba, ditri kep Nihyet Di kei lewo Noni ba ningon com da tut.

¹⁸Lene ditug ndei dimuhup nok mindei i? Dimuhup rino ditri tut Nihyet Di Kei ba, dikak tut tungwatu nya tut dimuhup bi. Dibrim dingkek kep yok tut mun di dem mem gima ditug ndei tug hon Nihyet Di Kei cem bi.

¹⁹Diyati kwes bidinok awak bi lo, dibon danti bidinok awak mem tungwatu yahagom leu binhyepo dibindei ba, yo di ningot ndig ikuk yok bak Kristus.

²⁰Tut mben Yahudi ne diyaijo tereu nok mben Yahudi leu binhyepo dibindei ba, ikuk yok bak Kristus. Allah niggai serti di tug hon Musa ninyeng tak kep da bu bi lo, diyaijo tereu nok no di hati tut niggai serti dima bit yok leu binhyepo dibindei ba, ikuk yok bak Kristus.

²¹Nok gima cem tut ngkiai nya. Diyaijo nok ngkiai nya ba, doom danti leu Musa niggai serti nya leu binhyepo dibindei ba, ikuk yok bak Kristus. Dipigau Allah De niggai serti nya bi lewo Kristus De niggai serti ninyeng tak kep da tu.

²²Tut yo di ingon nddong bi nya ne diyaijo tereu nok no di ningon nddong bi leu binhyepo dibindei ba, ikuk yok bak Kristus. Dindo diyaijoti bak tungwatu nya bit leu nok igyai munti nya leu binhyepo diba nisinati hi gom hi gom bindei ba, igyai niteu leu sisarti kin niyaijo nijep.

²³Diyai gini hagom mem Nihyet Di Kei leu Allah leu binhyepo dipriet kin mun di kei di ntun Nihyet Di Kei him.

²⁴Jikan tut bipia yo di yahagom idor bibeheu yam noro no di dor bipek nipekti bibie nongkom tug ndei mun di kei. Gima rino ma jidor sindem tereu nok yo dima leu binhyepo jipriet kin mun di kei.

²⁵Bikwop no di coi bit nibeheu yamti om ningon leu mun nyeng hagom leu binhyepo tug ndei topi mitou di mipror yon hanyen. Noro nyeni yoom ingon leu binhyepo itug ndei topi mitou di mipror yon hanyen kan bi.

²⁶Gima rino didor hallu kak puig hammi ndam nipekti. Dibingon nok nitug yam cig lo, ditug-tug wai bi.

²⁷Dibiyai hamem dinghuisi ba, doom kep dingut kanti nya. Gi bi ne mbro nok gino dibidip huk yo di hiter mem icoi bit nibeheu yamti lo, dem mem dicoi bit yok bi.