Read Hatam KORINTUS GI NICAN 13 Bible Online

KORINTUS GI NICAN 13 - Hatam bible

KORINTUS GI NICAN 13

¹ Nogindini ditin ei mem dihwou ngat je mbiningai su. Bit leu nok ipas ei Allah nihyetti “Suar ibou can ibou ningai di ingat munhyet bou igyai him ipai jit nipou ug e leu api nikei kos tut hukum drek dip.”

²Tirigi po dihwou ngat je nimbican ne disok kep yo di icut ei sisarti nipou su nya kin nindigsi nya cem yahagom. Tini bu ne tirigi dingat rin ei minu ting leu je dini lene disok kep yok mbigom kin bu. Mpe dino dihwou ngat je ne bit bon hi ningwes ngun leu hukum kan bi.

³Mijiyai bindo di jisuar nya hagom di bindo tut bipia Kristus tri tut ningon kanti tug hon da. Gino Kristus yai nibou tut je ne Noni ba nibou coi mem je bi noro ndo Nide nisindemti brei ei jikieti.

⁴Mbro nok gino tungwatu nya ipek Kristus kin biei salib mpe dino ninghuisi wei lo, niyaijo hanyen bu tug hon Allah de nisindemti. Nyeni ninok gom kin Kristus cem ninghuisi wei cem. Noro tirigi nihwou ngat je lene niyai nisindemti drek dip nyende ninok gom kin Kristusti tug hon Allah de nisindemti.

⁵Ma jibinai yam ngonti leu binhyepo jinggok tut gino jiyai munti nya ntun jide niba ningon com Kristusti him! Jikan tut mungkun bipia Kristus Yesus ningat rin ei jingonti e? Gi bi ne jingon jo kep Noni mungkun bi.

⁶Diyok dingon mem gima jikan tut bipia Kristus gwam nai nye lo, nicut bi.

⁷Mbro nok gino jikan bigya dibindei timek dinyeng no di ya kui Kristus lo, dikrau dingon tut bi ba, nna ug! Noro handei kon ba, Noni mpu je leu binhyema jibon mun tunggwei sut Noni au. Nipai nok leu binhyepo nindo bindo bipia nuug krau nipekti tu ne bi noro leu binhyepo jiyai igbit Allah ningon kanti mem je.

⁸Lewo bit bon nyende niyai munti ninyeng gom bindei timek nihyet di nijit-jau kan bi. Suar nibit nihyet di nijit-jau.

⁹Mbro nok gino ningon wei lo, ningon llei lewo jiyai nisindem. Ningat nadi tindei ningon di kwes-kwau mem je.

¹⁰Tut gima rino dipas kep srat dini bije nipou tirigi dihwou ei jikieti bigyo leu binhyepo mpe di dihwou ngat je lene diba nisindemti di Tuhan yai bida bibui je bi. Lewo Tuhan yai nisindemti dima bida mem gima dibiwin kep jingonti noro mem gima dibinjei je ningwig bi.

¹¹He disut bat jen, gini ne srat ningwigsi ri. Ma jingon llei bibor bijita jibou ei ningon kwes-kwauti. Ma jibit ditde nipingok jeti nya cem jingon kwes kin yam cem jingon jo nyahan mem yam cem. Allah di nok nibousi mem ningon ngakei yamti kin ningon jo nyahanti ningat rin bit je.

¹²Ma jipigo yam noyam kin yo di Kresten di ingon ce yam bi nya. Allah de limwa nya yahagom ipigo je.

¹³Handei kon ba, Tuhan Yesus Kristus singat tut je lene Allah ningon ngakei je ba, Ninnei bindei ba, jahagom jinok gom. Nipigo leu dani, Paulus