Read Hatam KORINTUS GI NICAN 6 Bible Online

KORINTUS GI NICAN 6 - Hatam bible

KORINTUS GI NICAN 6

¹Niyai midyai bit Allah. Gima rino nitigtai je leu binhyema jibimangkrei Allah nisingat tut jeti au.

² Bit leu nok ipas ei Allah nihyetti Allah pai, “Tirigi tto bou dem mem dingondut je ne dimiap jihyet. Tirigi njap niteu je leu sisar biyai niyaijo nijep bijeti dem ne dimpu je.” Jimiap e, nogindini bon nituti di kei mem Allah ngondut je. Njap di ammani ne njap di kei mem Allah teu je leu sisar biyai niyaijo nijep bije ri!

³Nikou sut gima tungwatu nya iba ighyet biyai nyende midyai nya. Tut gima rino nisok kep nyenti ser nhyema nibon mun di bindei dino tungwatu nya iba ighyet biyai nye bi.

⁴Noro nindo bindo bipia ninok Allah de awak nya tug hon niyai munti nya hagom. Lewo mun nyeng hagom di buhun cut igkep nye tu noro ningon nddong kikau.

⁵ Tungwatu nya imbas nye bicom nye ei ig bui nsi. Ighyet ngwig kep nye bihwen nye cem. Nirom nye kep midyai ba, mpe hi nibong mai kan bi ba, mpe hi ninggum hwen nye cem hagom mbirimang tu.

⁶Nindo nyenti nok Allah de awak di kei nya tug hon ningon gom kin ningon ki kin ningon di jo nyahan kin nisingat tut tungwatu nyati hagom ba, tug hon nisindemti leu Allah Ninnei kin niba ningon di gom bingon ngakei tungwatu nya.

⁷Niba nihyet di nijit-jau di nitri tut kin nisindemti di kwei leu Allah kin bindo bipia nyeni ne Allah de awak nya ri. Nikrau kep Allah ningon kanti tereu nok nikrau kep simeda. Nibihwen siceu nya ba, nibimbrap gau nyenti.

⁸Bihi ikon ninyeng lo, bihi ighyet wer mpiahi tut nye. Bihi inggei sut nye lo, bihi ighyet tigut nye. Mbro nok gino nitri tut nihyet di nijit lo, ipai kep nye bipia nyeni ne niris kep mun cig ri.

⁹Mbro nok gino tungwatu nya iba ingha bak nyeni lo, yahagom ikan tut nye tu. Nahanok ma niyai nimai bikwop mmun-njap noro ningat ne niyaijo yo. Mbro nok gino tungwatu nya ihwen bit nye lo, niyai nimai bigyo.

¹⁰Mbro nok gino mun-mun hi bindei ba, ningon buhun lo, ningon llei sutti ntun nye him kikau. Nuhui mbum tut mun di mipror yon noro nibindei ba, yo di hiter inyeng tut mun di jo gingga. Mbro nok gino tungwatu nya ikan bipia nimbun mun nyeng hi bi lo, ningat ne nimbun mun nyeng hagom.

¹¹Disut bat di dingon kieti ei minu ndig Korintus jen e, niba ningon di kwes bipai mun dini yok hagom bije ba, mun di jo ei ningon bei jo nibreisi mem je tu.

¹²Ningkek ndok je bi noro jingkek ndok nye.

¹³Ma jisindui sut ba, nogindini midimbrap bit je tereu nok di mbrap bit dimunggwom bat nya. Ma jindo jingon bei brei binye!

¹⁴Ma jinok gom kin yo di ingon jo kep bi nya bijiyai midyai bit yok au. Lewo gima dem tut bi. Bit bon mun di kei kin mun di kinei bicom yam nok gom kan bi. Bit bon nipigati bicom yam bit nidinditi kan bi.

¹⁵Bit bon Kristus kin Bilis ice tut yam kan bi. Bit bon yo di ingon jo kep nya kin yo di ingon jo kep bi nya ingon noyam kan bi.

¹⁶ Bit bon Tuhan De Ig kin ig kwar nya yahacem ibinut yam nok gom kan bi. Nyeni ne Allah Di Niyaijo De Ig ri. Allah Nonti pai, “Dingat rin kin Ditde limwa nya bidibong bit yok. Dibibon Danti bidinok ide Allah lene yoni ibibon yonti ba, inok Ditde limwa nya.

¹⁷ Gima rino ma jikes yo di ingon jo kep bi nya bijimbres jenti leu yok. Ma jipriet kin mun di bindei di map kui jeti au. Leu api diya um je.

¹⁸ Dibibon Danti bidinok Jicigya lene jibibon jenti bijinok dipmot bat kin dipmisop bat nya. Gini ne Allah di Sindem Bibor nipreu kep nyeti ri.”