Read Hatam KORINTUS GI NICAN 7 Bible Online

KORINTUS GI NICAN 7 - Hatam bible

KORINTUS GI NICAN 7

¹Disut bat di dingon kieti jen e, Allah preu ei mem nye tut mun dini yok hagom tu. Gima rino ma imbres nyenti leu map di kui ingut kin ingonti hagom ba, ibiyai ingon di kwes-kwau. Ma ide nittin tut Allahti bindei ba, iba ingon di gom bidimig nyenti bigyaijo ei mem Noni.

²Ma jicigit nye ei jingonti. Lewo niyai mun tunggwei tungwa hi ba, nibiyai tungwa hi ningon ngkwei leu nide ningon jo kepti bi sren. Nibrim mun nyeng hi mem nyenti leu tungwa hi cem bi sren.

³Diba dipaisi dini bipai kep je bi. Lewo bit leu nok gi dipai bije nipou su bipia ningon ngakei je nindig bibor. Mbro nok gino igyaisi jo e, he imai leu su e lo, nyeni kin jeni ijem isut bit yam.

⁴Diba dingon com je nindig bibor bidingon llei sut je! Mbro nok gino mun di buhun bibor cut igkep da lo, jibiwin kep dingonti. Gima rino dingon llei bibor!

⁵ Tirigi nuug krau Makedonia pima ne bit bon nibong kep ninghuisi kan bi. Mun di buhun ngwig kep nye. Nimpung yo di hiter iliriem nye ba, nikrau ningon tut je.

⁶Noro dipai sigyo lewo Allah biwin kep yo di ingon cut nya ingonti. Noni ba Titus nikweisi bibiwin kep nyeni ningonti hanyen.

⁷Allah biwin kep ningonti tug hon Titus nikweisi he bi noro tug hon mun di noni pui sut je dino jibiwin kep noni cem ningonti. Noni pui kep binye bipia jiyok jingon mem nituti tirigi jingat dingat bou jiyai him hanyen kin jingon di ngguk tut mun di jiyai tunggwei sut da pima kin gi jitin ei mem gima jimbrap gau da. Gini hagom biyai dingon llei bibor dor njiriek bu.

⁸Mbro nok gino srat di dipas bak je biyai jingon buhun lo, dinso danti tut bi. Gino dingat lo, srat dima biyai jingon di buhun mem nijam poi ne dingon wer nso danti tut.

⁹Noro tini bu ne dingon llei-llau sut gino srat dima biyai jingon buhun bi. Noro dingon llei-llau sut gino jingon di buhun dima bindei ba, jittin ser jide sisar bijikiek ndam Allah. Lene ningon buhunti dima bit leu Allah ningon kanti mem je. Gima rino niba srat dima bibui je kinei bi.

¹⁰Lewo ningon buhunti di bit leu Allah ningon kanti bie tut nye ug ei ningon nggekti ba, ningon nggekti buwak nye ug ei nittin ser sisarti kin niyai niyaijo nijepti di kwei leu Allah ba, tungwatu nya inso tut gima bi. Noro ningon buhunti di ntun tungwatu dihyeisi dini ingon kanti him bie ndam nimai.

¹¹Ma jibisrip tut ningat di kei di ntun jide ningon buhunti him bit leu Allah ningon kanti mem je i! Ningon buhunti bindei bijita jibou eisi ba, jibindo bipia jingon mui bi! Jingon sibui sut mun di cut igkep je bijikrau jingon tut mun di mibitimon je ei nidipti bu cem. Ba, mun dima bindei ba, jicem kep puig ser dihwousi bijibisau sut gi jimbrap gau da lene jikes hukum ei no di yai mun tunggwei dip cem! Ei nimbie him kikau kwei bipek ammani kep jindo brei bipia munhyet pima tug hon je bi.

¹²Mbro nok gino dipas kep srat bije tu lo, dipas drek dip no di yai mun tunggwei kin gi hi di noni yai mun tunggwei sut dima bi. Noro diba srat dima bipai sut bijo nibreisi mem je bipia Allah kan tut jide ningon ngakei nye biborti.

¹³Mun dini yok biwin kep nyeni ningonti. Lene gima he bi. Titus ningon llei biborti biyai ningon di nggan bibor bak nyeni lewo jibiyai noni cem ningon nggan bibor.

¹⁴Ditri tut ditde ningon llei bibor tut jeti bak noni nipou su. Lene dipai sigyo lewo jibindei bidingon pus tut je bi. Mun di nitri tut bije hagom nijit-jau ri. Nok gima cem ditde ningon llei bibor tut jeti di ditri tut bak Titus dima ne nijit rin bingat ningat tu.

¹⁵Titus ningon ngakei je dor njiriek bu lewo yok ngon kep bipia tirigi jiya um noni ne jitin ei mem jibit nicuk jeti nya. Lene jiba jibou coi mem noni bijibou cut binoni cem.

¹⁶Dingon llei bibor lewo ningat ne diba dingon com je tut mun nyeng hagom bibor.