Read Hatam KORINTUS GI NICAN 9 Bible Online

KORINTUS GI NICAN 9 - Hatam bible

KORINTUS GI NICAN 9

¹Ningat ne suar dibinut ei srat di dipas kep bije tut munkwas di mbusyamei nya ikwas tut Allah de limwa nya ei hanjop Yudea bi.

²Dikan tut bipia jingon llei sut gi jimpu yok. Gima rino dinggei sut bidikon jinyeng ei mbusyamei nya ei hanjop Makedonia yoho bei tu. Dipai biyok “Jisut bat yo di ingon jo kep nya ei hanjop Akhaya itin ei munkwas habiei ei ari bingwam gi pini jug su.” Jide ningon bisau sutti ppu hum kin imang ide ningon bisau sutti.

³Nogindini dicuk Titus kin ibou can pima bihwou ngat je leu binhyepo ditde ninggei sut jeti dima tereu nok nihyet minyei he bi. Noro ningat ne jitin ei munkwas bit leu nok gi dindat kep tut bak yo di ingon jo kep nya ei hanjop Makedonia tu.

⁴Dikrau dingon tut gima timiei hanjop Makedonia ibit da hwou bihwou ngat je bingat bou igyai him lo, jitin ei munkwas bigyo a. Gi nok lene minimmai sut nyenti drek dip nyende niba ningon com jeti pima! Jeni cem mijimmai sut jenti.

⁵Gima rino dikan bipia gi kei mem dicuk ibou ningai pima hwou bihwou ngat je bibie leu binhyepo inyohou dimig munkwas di jikos tut ei su nya. Leu binhyepo tirigi dihwou ngat je lene jitin ei jide munkwas hagom bidem ei su. Gima ndo bipia jimbus munkwas ei bit leu jingon kanti lene hi bidip huk je tut bi.

⁶Ma jiyok ngon kep bipia no di ndim njita ngan gom-gom he mittei ningat gom-gom he kwei leu beisi. Noro no di ndim njita ngan mang bibor mittei ningat mang bibor kwei leu beisi.

⁷Suar tungwagom-gom kwas munkwas bit leu nijoi sutti. Ma noni ba nikou biyai bikan bipia hi wit huk noni tut au. Lewo Allah joi sut no di ba ningon di llei bikwas munkwas.

⁸Allah sindem mem gima yai mun di jisuar nya dor tunggwei bije leu binhyepo jima bibikwop mun di jisuar nya. Lene jikwas nikenti di dor tunggwei leu leu binhyepo jibingondut yam kikau nok.

⁹ Bit leu nok ipas ei Allah nihyetti, “Allah njei munkwas bak nuhui mbum nya ba, nisingat tut tungwatu nyati jo ninno bijo kikau.”

¹⁰ Allah tin ei njita ngan mem no di yai miai kin njita di igyem cem. Noni mitin ei njita ngan di jisuar mem jide miai ngoisi hagom cem leu api mibindei ba, ningat mang bibor ntun him. Tug hon nisinati dima ne Noni bindei ba, ningat mang bibor ntun jide ningondut yamti him.

¹¹Allah mibindei ba, jinyeng tut mun di jisuar nya leu binhyepo jiba jide ningondut yamti bikwas munkwas tut tungwatu nya bikwop njap ngwa hagom. Lene tungwatu nya imang bibor mipai sigyo bak Allah drek dip mun di jikwas tut yok tug hon nyeni.

¹²Lewo jiyai munti di kei bibor dini bimpu Allah de limwa di yuhui mbum nya he bi noro bindei ba, tungwatu nya imang bibor ipai sigyo bak Allah cem.

¹³Ba, yo di ingon jo kep nya imang bibor ei hanjop Yudea minggei sut Allah drek dip jide nisingat tut tungwatu nyati di ndo bindo di kei bibor biyok. Lewo ingat bipia jingon gom tut Nihyet Di Kei tut Kristus bijibit nihyet cem. Gi jikwas mun di jimati dor njiriek tut yoni kin jisut yo di ingon jo kep nya cem bindei ba, inggei sut Allah drek dip je.

¹⁴Iba ide ningon ngakei jeti bingat nadi tindei je drek dip Allah nisingat tut jeti di dor njiriek.

¹⁵Jikwei ba, yahagom ipai sigyo bak Allah tut munkwas di mindur bibor di Noni yai binye tu!