Read Hatam GALATIA 5 Bible Online

GALATIA 5 - Hatam bible

GALATIA 5

¹Nyeni igyati kwes lewo Kristus kwek nye tu. Gima rino ma jikrau kep jide niyati kwes dima. Ma jibiam bon di bindei bijinok awak hanyen bu au.

²Da di Paulus disok kep je bipia ma jiyok ngon kep. Gino jisindui sut tungwatu nya ibasunat je ne gima tereu nok Kristus nikwek je leu awakti bon ninyeng mem je bi.

³Disok kep no di sindui sut hi basunat noni mbigom bu bipia suar noni bit leu Puig Yahudi niggai serti hagom drek dip!

⁴Gino jita jibou ei gima jiyai ningon di kwes kin Allah tug hon Puig Yahudi niggai serti ne jibisriot jenti leu Kristus bijimbres jenti leu Allah nisingat tut jeti.

⁵Noro tut nye dini ne niyok ningon mem nyende ningon kwes kin Allahti di niyai tug hon nisindemti leu Allah Ninnei kin niba ningon com Kristusti cem.

⁶Leu gino inok gom kin Kristus Yesus lene midut sunat di igyai e, he igyai bi e, lene gima bon ninyeng bi. Ide niba ningon com Kristusti he rino bon ninyeng ba, ibindei mbut gima tug hon ide ningon ngakei yamti.

⁷Nipou ne jimbut sindem bibor! Tou rikipon jeti mem jikes hon bijibit Nihyet Di Kei di nijit bu bi i?

⁸Jo nibreisi bipia no di kipon jeti ne Allah rin bi lewo Noni hig je bijinok gom kin Noni!

⁹ Tungwatu nya isimbot dat “Roti ninjep di bigbibor di bindei tepun roti nindak titut yam dwoi bibor.”

¹⁰Mbro nok gima lo, diba dingon com bipia jikrau tunggwei ningon kanti di nijit-jau bi lewo yahagom inok gom kin Kristus. Ba, dikan mungkun tut bipia no di kipon jeti mitug ndei hukum leu Allah.

¹¹He disut bat jen e, tut dani lene nggon rino tungwatu nya ihwen bit da bijo kikau gino ditri tut bipia midut sunat bon ninyeng i? Ningat ne gino ditri tut nihyet dima lene Nihyet Di Kei tut Kristus nimai ei biei salibti di ditri tut minok munhyet mem tungwatu nya bi.

¹²Gi kei rino yo di ikipon jeti di nok gima ikum eisi bimbres yonti leu jikieti bihigom!

¹³Noro disut bat jen, Allah hig je leu binhyepo jiyati kwes. Noro harin dima jiba niyati kwes dima bibon nituti mem jibit jingut kanti di kinei nya. Noro ma jingon ngakei yam bijinok awak mem yam cem.

¹⁴ Gini ne nirop ninda ndigsi tut ri. Puig Yahudi niggai serti titut yam coi ei nicukti gom ngat di pai binye “Ma jingon ngakei hiter bit leu nok jingon ngakei jenti.”

¹⁵Noro disok kep je bipia gino jaham yam noyam kin mindhe di niten-pos nya yaham yam ne mbigom jibindei yam ba, jitimek bijingwig ri.

¹⁶Dingon kanti rinok gini. Ma jisindui sut ba, Allah Ninnei bie tut je lene ma jiyai munti nya bit leu jingut kanti di ntun dihyeisi dini him au.

¹⁷ Lewo ningut kanti di ntun dihyeisi dini him tte tut ningon kanti di ntun Allah Ninnei him. Ningon kanti di ntun Allah Ninnei him tte tut ningut kanti di ntun dihyeisi dini him ba, hacem tte tut yam. Gino jibit Allah Ninnei nibie tut jeti lene bit bon jiyai munti nya bit leu jingut kanti di ntun dihyeisi dini him kan bi.

¹⁸Gino jibit Allah Ninnei nibie tut jeti lene Puig Yahudi niggai serti ninyeng tak kep je bu bi.

¹⁹Lewo tungwatu nya ingut kanti di ntun dihyeisi dini him jo nibreisi tug hon igyai munti di kinei nya nok icut tut yam cem ikrar kep yam cem,

²⁰ikuk yok bak kwar nya cem nung kui yok cem iba nitok biyam apino ibui yam cem iba ingon kan yam cem igga yam cem inggei sut yonti cem itti kin nimpung di isrep tut yam cem,

²¹ingon kinei sut yam drek dip mun di imbun nya cem pes pu yok cem ibon pesta tut ide kwar di ikuk yok bak nya cem hagom. Disok kep je hanyen bu noyam kin gi disok kep je nipou su bipia tungwa tou rino bon mun di kinei dini yok micoi bit Allah Ninyeng Tak Kepti bi sren.

²²Noro tungwatu nya di ibit leu Allah Ninnei nibie tut yokti lene ingat ningat di kei di ntun yoni him tug hon gi yoni ingon ngakei yam cem ingon llei bibor cem ingon jo nyahan cem ingon nddong cem ingon nggriu sut yam cem ingon singat tut yam cem ingon gom cem,

²³iba ibou coi mem yam cem yoom kep ingut kanti nya cem hagom. Nicukti hi cuon ser niyai munti dini bi sren.

²⁴Yo di ijem iceu bit Kristus Yesus igyai nimai bak ingut kanti kin ide ningon pri kepti di ntun dihyeisi dini him nya hagom.

²⁵Allah Ninnei yai niyaijo nijep binye. Gima rino suar isindui sut Noni ba, ibit nibie tut nyeti.

²⁶Noro ma ingon jei cem ingwes pri gau yam cem iboudut ser yam cem bu au.