Read Hatam EFESUS 3 Bible Online

EFESUS 3 - Hatam bible

EFESUS 3

¹Tut gima rino da di Paulus disima ei ig bui nsi drek dip gi dinok awak mem Kristus Yesus kin gi diyai midyai ei je di ngkiai nya jikieti.

²Ningat ne jimiap tut bipia Allah di singat tut da ta da leu binhyepo diyai kep midyai dini ei jikieti.

³Allah mbot kep tut nimimun di Noni kos tut ei nipou su leu api tri tut hanyen bida. (Dirop ninda ndigsi bije tu.

⁴ Gino jikwop kep srat dini nitriti igbit lene mijikan tut notou dingon dorti tut Allah nimimun di Noni kos tut ei nipou su di Yesus bindei ba, pek kep mem tungwatu nya.)

⁵Nipou ne hi mbot kep tut nimimun dima bak tungwatu nya bi. Noro tini bu ne Allah Ninnei mbot kep tut nimimun dima bak yo di igya kui Yesus kin Nide nabi nya.

⁶Nimimun dima mbot kep tut gini. Tug hon Nihyet Di Kei lene ngkiai nya iba yo kep Allah de mun di kei nya di Noni tin ei nipou su mem mben Yahudi he yo pima. Ngkiai nya inggre kin ningut gom ngat bit mben Yahudi bipriet kin mun di Allah preu ei mem nye tug hon Kristus Yesus.

⁷Allah singat tut da ba, ubon da nok awak leu binhyepo ditri tut Nihyet Di Kei. Noni singat tut da tug hon Nide nisindemti di sindem tut da.

⁸Allah de limwa nindigsi nya yahagom inyeng jei dor njiriek da lewo dibon dinyeng bi. Mbro nok gima lo, Allah ba ningon com da tut midyai di bon ninyeng. Midyai dima ne midyai nitri tut Nihyet Di Kei tut mun di bitut Kristus di bon nibok di bit bon ug hon nohonti kan bi bak ngkiai nya.

⁹Ditde midyai nya hi bu rinok gini. Dibindei ba, tungwatu nya ingon dorti tut notou nimimun di Allah tin ei nipou su mipek kep mem nye. Allah di pai tes mun nyeng hagom ku nimimun dima nyahan habiei ei nimbie him kikau kwei bipek ammani kep,

¹⁰leu binhyepo tini bu lene mbusyamei nya ibindei ba, mun nyeng hagom di ikrau kep nisindemti ei mpia-bbed him nya ikan tut bipia Allah ningon kiti bon ninyeng mang bibor.

¹¹Allah niyai munti dini bit leu ningon kanti habiei ei nimbie him. Ningon kanti di ug hon nohonti bi pek kep mem tungwatu nya tug hon ide Tuhan Yesus Kristus.

¹²Nogindini iba ingon di nddong bibrim ingkek kep Allah ug ei Nonti Noho bei drek dip gi inok gom kin Kristus lene iba ingon com Noni.

¹³Gima rino mbro nok gino diyai dinghuisi wei drek dip je lo, ditigtai je leu binhyepo jingon nghen leu au. Lewo ningat di ntun ditde ninghuisi wei dini him bindei mbut mun di kei mem je.

¹⁴Gima rino diba dibiau bicom mpia ei Icig Allah Noho bei.

¹⁵Noni ba ningon mien paisi hi gom hi gom bahak ei bibikwop nimpung nya ei gwamti kin ei dihyeisi dini yahagom ingonti.

¹⁶Handei kon ba, Allah di nyeng tut nikei-kau-keisi sindem tut je tug hon Ninnei leu binhyepo jingon mien nddong kei.

¹⁷Handei kon ba, Kristus gwam nyahan ei jingonti tug hon jide niba ningon com Noniti. Ma jicom jigau ei ningon ngakei yamti ba, ningon di ngakei yam mpung ei jingonti,

¹⁸leu binhyepo jeni kin Allah de limwa nindigsi jahagom jinggok tut bijingon dorti tut Kristus ningon ngakei jeti ninyanti kin nijeisi kin nanaisi kin nijutti,

¹⁹di bit bon tungwatu nya ingon dor niti tut tug hon ide ningon kiti kan bi. Handei kon ba, jiya um Allah ningon ngakei jeti ei jingonti leu binhyepo ningon mien paisi mpung bipias hagau ei jingon mienti.

²⁰Allah sindem mem gima birop hanyen binye nindig bibor dor njiriek mun di nyeni yahara Noni tut kin ikan-kan nyenti cem tug hon Nide nisindemti di sindem tut ingonti.

²¹Handei kon ba, nye di inggre kin mbusyamei di inok gom kin Kristus Yesus inggei sut Allah bijo ninno bijo kikau lene ma tungwatu yahagom ikon Allah ninyeng buug hon nohonti bi! Igbit ri.