Read Hatam EFESUS 5 Bible Online

EFESUS 5 - Hatam bible

EFESUS 5

¹Jeni ne Allah nimunggwom bat di ningon him ngi-ngat nya ri. Gima rino ma jibrim jingkek ba, jiyai bram Allah niyai kepti.

² Ma jiyai jinnei di mpung tut ningon ngakei yamti noyam kin Kristus di ningon ngakei nyeni. Noni kes niyaisi ei biya luei nye tereu nok mun di ngge kei di ibui bibam ei nimbar hum dokti di bipwoi Allah ningon.

³Jeni ne Allah de limwa nya ri. Gima rino dem tut gima sisar nicut tut yamti kin nikrar kep yamti kin ningon pri kep mun di hiter mbun srig jikieti bi. Ma jibon nituti mem hiter ipai kep jinghapti tut mun dima yok au.

⁴Ma jikucang tungwatu nya ba, jipai nihyet krarti ba, jihyet tigut yam cem au. Noro ma jipai sigyo bak Allah.

⁵Ma jiyok ngon kep bipia nicut tut yam cig kin nikrar kep yam cig kin nidrui bou ngwam cig (di noyam kin sisar nikuk nye bak kwarti nya) micoi bit Allah kin Kristus Ninyeng Tak Kepti bi sren.

⁶Ma jitindei ser yo di iba ighyet mini biris je. Lewo tut gima rino Allah ningon misibui sut yo di ibit nihyet bi.

⁷Gima rino ma jimbres jenti leu yo dima.

⁸Nipou ne jingat rin ei nidinditi. Noro tini bu ne jinok Tuhan de limwa nya bijingat rin ei nipigati. Gima rino ma jiyai kepti nya noyam kin munggwom di intun nipigati him igyai kepti nya.

⁹Lewo niyai munti di kei bibor nya kin ningon kwesti kin ningon gomti hagom ntun nipigati him ei Allah niyai him.

¹⁰Ma jita jibou ei jiyai munti di bindei di Allah joi sut jeti nyati.

¹¹Ma jiyai bram tungwatu nya igyai kepti di bon ninyeng bi nya au. Lewo igyai kepti dima yok ntun ingon di dindi him. Noro ma jiba nipigati bipiga digai hagom. (

¹²Leu gino isimbot kep biyam tut mun di ibon ku di jo nding leu tungwatu nya igyai him dima bibon immaisi.)

¹³Tirigi nipigati piga digai mun nyeng hi lene tungwatu nya ingat mun dima brei bou igyai him.

¹⁴Lewo mun hagom di tungwatu nya ingat biput kei dima ne nipigati ngat ri.[5] Gima rino tungwatu nya itri tut a He na di abong mai e, ma ada ayai ba, akiju leu nimai eisi! Kristus ninjeng mipiga digai na ri!

¹⁵Gima rino ma jingon sok kep jenti tut jiyai kepti nya leu binhyepo jiyai bram yo di ingon tindur nya igyai kepti nya au. Noro ma jiyai bram yo di ingon ki nya igyai kepti nya.

¹⁶ Biken tirigi bon nituti mem je ne ma jiyai kep jiyai munti di kei bibor nya lewo nijam dini ne nijam di tungwatu nya isibut bibor ri.

¹⁷Gima rino ma jingkek ndok au. Noro ma jinggok tut Allah ningon kanti mem je.

¹⁸Ma jisindui sut ba anggur ningei pu je au. Lewo gima bindei ba, jiyaijoti kinei bibor. Noro ma jiyai jingon di mpung tut Allah Ninnei nisindemti.

¹⁹ Ma jiba srat mazmur kin doia nya bisimbot kep tut jihyet biyam. Ma jiba jingon di llei bibor bikon doia kin mazmur ba, jibinggei sut Tuhan.

²⁰Ma jiba ide Tuhan Yesus Kristus ninyeng bipai sigyo bak Icig Allah tut mun nyeng hagom di pek kep mem je bikwop mmun-njap.

²¹Ma jiba jibou coi mem yam bicim tindei gi jibikon Kristus ninyeng a.

²² Je di sop nya e, ma jiba jibou coi mem jijjep bat nya bit leu nok jiba jibou coi mem Tuhan.

²³Lewo no di pinai ninyeng tak kep nitnem bit leu nok Kristus di ninyeng tak kep mbusyamei. Mbusyamei ne Nonti ningut rin tug hon gi teu yok leu ide sisar.

²⁴Gima rino ma sop nya iba ibou coi mem ijjep bat nya bit leu nok mbusyamei ba nibou coi mem Kristus.

²⁵ Je di pinai nya e, ma jingon ngakei jitnem bat nya bit leu nok Kristus di ningon ngakei mbusyamei bikes niyaisi ei mem yok.

²⁶Noni kes niyaisi ei leu binhyepo ba Nihyet Di Kei kin ningginausi bibindei pwoi mbusyamei tug hon nitur yok ei minyeiti leu binhyepo bikes mbusyamei dima bak Allah,

²⁷leu binhyepo Noni bindei ba, mbusyamei ya ei Noho bei kin gi kei-kau-kei ba, kwes-kwau ba, mun nyeng hi rap mbusyamei nitta ba, nirom kuisi bi.

²⁸Handei kon ba, bikwop pinai ningon ngakei nitnem bit leu nok ningon ngakei nonti njem. No di ningon ngakei nitnem ningon ngakei nonti cem. (

²⁹Hi ningon mpo tut nonti ningut bi sren. Noro hek tut nonti ningut binyohou bit leu nok Kristus nyohou mbusyamei.

³⁰Ikan tut gini lewo nyeni inggre kin Kristus ningut.)

³¹ Bit leu nok gi ipas ei Allah nihyetti “Gima rino no di pinai mikes nicig nipmem nya ei ba, nitnem yoni mibong gom leu binhyepo yahacem inok gom.”

³²Nipas kepti dini mbot kep tut nimimun di jut bibor lo, dikan tut bipia bitut Kristus kin mbusyamei.

³³Noro nipas kepti dini bitut jeni cem. Ma bikwop pinai ningon ngakei nitnem bit leu nok ningon ngakei nonti njem. Lene ma bikwop sop kon nijjep ninyeng a.