Read Hatam KOLOSE 2 Bible Online

KOLOSE 2 - Hatam bible

KOLOSE 2

¹Dijoi sut gino jingon dorti tut notou dita dibou ei Allah de midyaiti mem jeni kin mben Laodikia kin tungwatu di ingat dingat bou igyai him bigyo.

²Diyai kep midyai dima leu binhyepo dibiwin kep ingonti bidibindei ba, yahagom ingondut yam ba, inok gom cem. Tug hon nisinati dima ne yahagom ingon bit Allah nimimun bingon dorti tut lene ingon ngkiem tut. Nimimun dima ne Kristus Nonti ri.

³Kristus Nongkom hit Allah ningon kiti kin nikan-kan nyenti di tereu nok mas nibousi di jo nding leu tungwatu nya igyai him hagom ei nibreisi.

⁴Gima rino disok kep je ser nhyema jicut bit yo di iba ighyet di mmau biris bije au.

⁵Mbro nok gino dingat rin ei minu ting leu je lo, dinnei ningat rin ei jikieti. Dikan tut bipia jinok gom ba, jiba ningon di nddong bicom Kristus lene gini biyai dingon llei bibor.

⁶Jiya um Yesus Kristus bijita Noni nok Tuhan ei jingonti tu. Gima rino ma jiyai munti nya ntun jide ninok gom kin Noniti him.

⁷Ma jicom jigau kikau ug ei Noniti. Ma jingot jide niyaijo tereu nok jingot ig ei Kristus di nok nikiou di nddong keiti. Ma jikum ei jide niba ningon com Kristusti bit leu nok jide nibou ngginau je tut tu. Ma jinggok biken tirigi jipai sigyo.

⁸Ma jingon sok kep jenti ser nhyema hi ba ningon di kiti di ntun tungwatu dihyeisi dini him di bon ninyeng bi buubon je au. Ningon kiti dima ntun Kristus him bi noro ntun tungwatu dihyeisi dini ingon kanti him kin ninnei di inyeng tak kep mpia-bbed him kin dihyeisi dini him.

⁹Lewo mun di bitut Allah hagom ningat rin ei Kristusti mem nijam di Noni ningat rin nok tungwatu ei dihyeisi dini.

¹⁰Allah yai niyaijo nijep titut bije tug hon gi jinok gom kin Kristus. Noni ninyeng jei bibor ba, ninyeng tak kep ninnei di isindem bibor nya kin ninnei di inyeng tak kep hagom.

¹¹Jicoi bit midut sunat di nijit tug hon gi jinok gom kin Kristus lene sunat dima noyam kin midut sunat di tungwatu dihyeisi ibon bi. Sunat di ntun Kristus him bindei kwek je leu sisar de nisindemti di pijuk jingonti.

¹² Lewo mpe di itur je ei minyeti lene jibicom yam bit Kristus tereu nok nitig je ei jui nsi bit Kristusti leu api jiba nitur je dima biyai nikiju hanyen leu nimai eisi bit Kristus lewo jiba jingon com Allah di ba Nide nisindemti biwin Kristus hanyen leu nimai eisi.

¹³ Nipou ne mun di bitut jinnei mai ei sisarti. Jicoi bit midut sunat di ntun Puig Yahudi niggai serti him bi. Noro tini bu ne Allah win je bijiyai niyaijo nijep bit Kristus. Allah kos ser ide sisar hagom tu ba,

¹⁴ ciu ser buk di nyeni itak kep ser Nide mitiei ngwam di ba nidimig sutti di buhun tak nye. Allah pek buk di itak kep ser dima kin biei salibti binggek tut nidimig sutti di pai kep nye.

¹⁵Kristus ba Nide biei salip bibindei ba, ninnei nya di inyeng tak kep mpia-bbed him kin dihyeisi dini isindem bu bi.[2] Noni bimangkrei yok bindo yok brei ba, ittei yam kui-juk nyen nok nimpung di isima drek dip Kristus nibindei cut yokti.

¹⁶ Gima rino ma jisindui sut tungwatu nya ba, iba ighyet biyai je drek dip njita di jiyem kin ndia ngei di jidut kin njap nindig nya kin pesta di jibon kep bed jep nya kin Njap Nigwam Kep Ninghuisi au.

¹⁷Mun dima yok hagom tereu nok mun di mipek kep ei nidipti bu ningwes di ingat ei kisinati he. Noro Kristus ne ningat-ngat ri!

¹⁸Ma jisindui sut yo di ikon ighyet tut inyeng di jei drek dip gi ipai bipia iba ibou coi ba, ikuk yok bak malaikati nya noro ibitot hagau he. Yo dima ikan-kan nyenti di ntun dihyeisi dini him bindei ba, ingon jei sut yonti cem ingon ndig sut ningat-hi-ngat di mindur nya di ingat bou igyai him cem ba,

¹⁹ ikrau kep Kristus di nok nibou mem ningut bu bi. Kristus nibie tut ningutti bindei ba, ningut titut cim tindei yam tug hon ninggiluk kin nituti nya ba, Noni nyohou hagom leu binhyepo ningut yai nisindemti bit leu Allah ningon kanti.

²⁰Tirigi jimai bit Kristus lene Noni kwek je leu ninnei nya di inyeng tak kep mpia-bbed him kin dihyeisi dini. Nggon rino nogindini jiyai bram tungwatu di intun dihyeisi dini him nya igyai kepti nya di om kep je i? Nggon rino jikuk je bak ide nidimig sutti nya di cuon ser je bipia,

²¹“Harin dima jiprios mun dini a. Harin dima jiyem mun dima a. Harin dima jingget mun dini a.”

²²Ide nidimig sutti dima yok hagom ket ei mun di tungwatu nya ibimangkrei he. Nidimig sutti dima yok ntun tungwatu dihyeisi dini ikan-kan nyenti kin ide ningginausi him he yo.

²³Ningat ne nidimig sutti dima bitut nikwap tungwatu nyati tut gima ikuk yok bak malaikati nya kin niba nibou coi mem yam lo, ibitot hagau he kin ide nihwen bit ingutti hagom ntun ningon kiti him bou tungwatu nya igyai him. Noro mun dima yok hagom bon ninyeng ba, bit bon om kep tungwatu nya ingut kanti nya kan bi.[3]