Read Hatam TESALONIKA GI NIGOM 1 Bible Online

TESALONIKA GI NIGOM 1 - Hatam bible

TESALONIKA GI NIGOM 1

¹ Srat dini leu da di Paulus kin Silas kin Timotius. Dipinak srat dini bak je di mbusyamei di jinok Icig Allah kin Tuhan Yesus Kristus ide limwa nya ei minu ndig Tesalonika. Handei kon ba, Allah singat tut je biyai jingon jo nyahan.

²Nijem sigyo bak Allah tut jahagom ba, ningat nadi tindei je bikwop njap-njap.

³Mpe dino ningat nadi bak Icig Allah ne niyok ngon kep bipia jindo jide niba ningon com Yesus Kristusti tug hon jiyai munti nya kin jide ningon ngakei yamti di bindei dino jita jibou ei jide midyai nyati lene jiba jingon nddong biyok jingon mem ide Tuhan Yesus Kristus.

⁴Disut bat jen, nikan tut bipia Allah ningon ngakei je bidimig je nok Nide limwa nya.

⁵Lewo nihwou sut Nihyet Di Kei ei jikieti tug hon nihyet di tibim leu nuhui him he bi noro tug hon nisindemti kin mindur di Allah Ninnei bibon ei jikieti. Nindo tut niba ningon com Nihyet Di Keisi bije tu. Nyende niyai munti nya jo nibreisi mem je tirigi ningat rin ei jikieti ba, nibrim ningkek mem je.

⁶ Jiyai bram nyeni niyaisi kin Tuhan cem niyaisi. Mbro nok gino tungwatu nya ihwen bit je lo, jiba jingon di llei biya um Nihyet Di Kei di nitri tut bije. Ningon di llei dima nibousi rino Allah Ninnei di pingok ei jingonti.

⁷Tug hon nisinati dima lene jiyai munti dima rinok bindo bak yo di ingon jo kep nya ei hanjop Makedonia kin Akhaya.

⁸Lewo Nihyet Di Kei tut Tuhan bon nibousi ei jikieti leu api tibim kikau ug ei hanjop Makedonia kin Akhaya. Lene tut gima he bi lewo jinghapti tibim tut jide niba ningon com Yesus Kristusti bidem minu apino nisuar nitri tut gima bak tungwatu nya bi.

⁹Lewo yo dima itri tut binye bipia nipou jiya um nye tirigi nihwou ngat je ba, jikiek je leu kwar nya leu binhyepo jinok awak mem Allah di Nijit di nok nibousi mem niyaijo nijep ba,

¹⁰jimem kep ser Nipmot nikwei hanyenti leu gwamti. Lewo Allah win Nipmot Yesus hanyen leu nimai eisi tu ba, Noni miteu nye leu hukum di mikwei drek dip Allah nigga biborti.