Read Hatam YOSUA 1 Bible Online

YOSUA 1 - Hatam bible

YOSUA 1

¹Niabiati TUHAN de awak di Musa mai leu su lene TUHAN pai bak Yosua di ya kui Musa di nicig ninyeng Nun,

²“Ditde awak di Musa mai su. Ma nani kin mben Israel jahagom jitin ei mem gima jisigon Minyei Yordan leu binhyepo jicoi ug ei minu di midiyai biyok.

³ Lewo diyai minu di mijiya bidem eisi dima nisurti-nipekti bak nani kin Ditde limwa nya yahagom bit leu nok gi dipreu ei mem Musa tu.

⁴Jide minu dima nohon keti ei iggum ndigsi bei mpia nibiho kikau ug bipek kin Nungug Libanon bei mpia nijjai kikau ug bipek kin minyei nindig Efrat bei mpia nipriti bitut mben Het ide minu hagom kikau ug bipek kin Muk Hacan bei mpia nikimbasti hagom.

⁵ Yosua e, bit bon ade siceu hi hwen na bibindei ba, acut bak yoni kikau ug bipek ade njap ningwig honti kan bi. Lewo midingat rin bit na bit leu nok gi po dingat rin bit Musa pima ba, midikes na bihigom ei bi sren.

⁶ Ma angon nddong ba, abrim angkek lewo attei nibou tut yo dini tirigi icoi bigyai minu di dipreu ei mem idigup bat-idigai bat nya bigyati.

⁷Ma angon nddong ba, abrim angkek cem lene ata abou ei nicukti po Ditde awak Musa yai bije pima titut yam. Ma jikrau tunggwei puig di dicuk je tut nya au. Gi nok lene jide niyai munti nya hagom mingat ningat di kei bibor.

⁸Ma akwop Ditde nicuk jeti nya ei ahui him brei ei mben Israel yoho bei tirigi idem yam ei ba, ikuk yok biDa. Ma angig ayai kep hagom bikwop mmun-njap. Lene ma ata abou eisi ba, abit hagom nok gi kei. Gino ayai nok gima lene ade midyai nya mingat ningat mang bibor.

⁹Ma ayok ngon kep Ditde nicuk nati pima leu binhyepo angon nddong ba, abrim angkek! Ma attin tut ba, angon pus tut au. Lewo Da di TUHAN dinok ade Allah ba, midingat rin bit na bidem ambutti nya hagom.”

¹⁰Lene Yosua cuk mben Israel ide nibou nya,

¹¹leu binhyepo imbut bidem ide prak meng yati dima bipai bak mben Israel yahagom “Ma jitin ei njita mem jiyem kep jinggum lewo njap ningai bu lene nyeni yahagom isigon Minyei Yordan ba, yuug dihip ei minu di TUHAN di nok ide Allah yai binye ug ri.”

¹² Lene Yosua pai bak keret Ruben kin Gad kin Manasye niken,

¹³“Ma jiyok ngon kep bipia Musa po TUHAN de awak pima pai bije bipia TUHAN di nok ide Allah mipek hanjop nsi ei Minyei Yordan nite bei mpia nipriti dini bak jeni leu binhyepo jidigek kep hagom binok jide bu.

¹⁴Disindui sut ba, jitnem bat-jimunggwom bat nya igwam ei minyei nite dini kwei kin jide mindhe-ndhe nya hagom. Noro suar pinai di ikrau minggwen ba, ikon pran kan nya yahagom isigon minyei bibie tut isut bat keret mben Israel nindigsi nya ba, impu yok,

¹⁵kikau bibou yahagom icoi ba, ikieng kep minu di TUHAN di nok jide Allah pek biyok ei Minyei Yordan nite dima ug nipou ug e. Tirigi keret mben Israel nindigsi nya ibong kei igwam kei ei hanjop nsi dima tu lene mibon nikwesti mem jingkwei hanyen ba, jiya bijikieng kep jide hanjop nsi ei Minyei Yordan nite dini kwei bei mpia nipriti bit leu nok Musa po TUHAN de awak pima preu ei mem je tu.”

¹⁶Lene ibuhup “Miniyai hagom bit leu nok acuk nyeti ba, minimbut ug ei tirigi tou apinak nye ug eisi ug ri.

¹⁷Minibit ahyet dem kep nok gi po nibit Musa nihyet pima. Handei kon ba, TUHAN di nok ide Allah miningat rin bit na bit leu nok ningat rin bit Musa nipou su!

¹⁸Minikes hukum nimai bikwop ei tungwa tou rino srep tut na ba, njiriek acuk noti nya hagom. Ma abindei ba, angon nddong ba, abrim angkek hak ug!”