Read Hatam YOSUA 15 Bible Online

YOSUA 15 - Hatam bible

YOSUA 15

¹Lene keret Yehuda ninsi de nya gom-gom itug ndei dihyei hanjop nsi di bon minu niya kwas yamti simin mben Edom ide minu niya kwas yamti kikau ug bipek hon iggum ndigsi Zin nite bei mpia nibiho.

²Keret Yehuda ide minu niya kwas yamti nite bei mpia nibiho bikrop nyahan kwei leu Igpong Nsim nibiho,

³kikau ug ei nite bei mpia nicutti bikrop nyahan nite bei mpia nibiho sir Nitinggoisi Akrabim kikau bipek kin Zin. Lene bikrop nyahan hanyen bu bimbut Kades-Barnea nibiho binjiriek Hezron bikui kwei ei Adar. Leu api krop nyahan ndam Karka,

⁴bijo leu sirima kikau kwei ei Azmon. Leu api mbut sir minyei pmot di jo minu niya kwas yamti mem minu Mesir. Leu api mbut kikau bibon nohon keti ei Muk Hacan nipimat. Minu niya kwas yamti di mbut ei hanjop nsi dima nibiho bikkin keret Yehuda ide dihyei hanjop nsi kin Israel ide minu titut yam nohon keti cem.

⁵Lene Igpong Nsim ei minu niya kwas yamti nite bei mpia nipriti kikau ug bipek kin Minyei Yordan ninggup nite bei mpia nijjai. Minu niya kwas yamti nohon keti nite bei mpia nijjai jo leu Minyei Yordan ninggup,

⁶ug ei nite bei mpia nicutti kikau bipek kin Bet-Hogla leu api sir mboi di birok kik Mbang Briep Yordan nijjai. Minu niya kwas yamti bei nijjai dima kui leu sirima kikau ba, nite bei mpia nijjai ug bipek kin Tig Bohan. Tig dima ne tig nibiyok ngon kep Bohan di Ruben nipmot gom ri.

⁷Minu niya kwas yamti dima mbut kikau bipek kin Mbang Briep Nuum Ningon Buhun kikau bipek kin Debir leu api kriek bu bei nijjai ndam Gilgal di birok kik Nitinggoisi Adumim ei briep bou him dima nibiho lene jo leu sirima ug bipek kin minyei yaisi ei En-Semes kikau bipek kin En-Rogel.

⁸Lene minu niya kwas yamti dima mbut kak Mbang Briep Hinom ba, sir mbigdip gom nibiho di birok kik mben Yebus ide minu ndig di Yerusalem. Lene jo leu sirima ndam mbigdip dima ninggram him ei Mbang Briep Hinom nite bei mpia nicutti hammi Mbang Briep Refaim nohon keti bei mpia nijjai.

⁹Lene mbut kikau bipek kin minyei yaisi ei Me-Neftoah bimbut kikau bipek kin minu ndig nya di dideu Nungug Efron lene kriek ei sirima ndam Baala (Baala ne Kiryat-Yearim ninyeng hi ri).

¹⁰Lene minu niya kwas yamti dima bikrop ttai Baala nite bei mpia nicutti kikau bipek kin nungug him minu Edom lene mbut kikau ba, sir Nungug Yearim bei nijjai (Nungug Yearim ne Nungug Kesalon ninyeng hi ri). Lene mbut kikau bipek kin minu ndig Bet-Semes kikau binjiriek minu ndig Timna.

¹¹Lene jo leu Timna kikau ug bipek kin nungug tou gom ei minu ndig Ekron nijjai bikriek ndam minu ndig Sikron ba, mbut njiriek Nungug Baala kikau ug bipek kin minu ndig Yabneel leu api mbut kikau bibon nohon keti ei Muk Hacan nipimat di nok minu niya kwas yamti,

¹²mem keret Yehuda ide dihyei hanjop nsi nite bei mpia nicutti. Keret Yehuda ninsi de gom-gom ibong ei ide hanjop nsi di bon minu niya kwas yamti dima yok hagom.

¹³ Lene Yosua kwas keret Yehuda ide dihyei hanjop nsi nite ndia hi tut Kaleb di Yefune nipmot di nimbier kim keret Yehuda dem igbit TUHAN nicuk Yosuati. Kaleb tug ndei minu ndig Hebron ba, minu ndig dima ne Arba di Enak nicig de ri.

¹⁴Yo di intun Enak him ne Sesai kin Ahiman kin Talmai ide bat nya. Kaleb jji yo dima yahagom leu Hebron.

¹⁵Lene noni jo leu sirima ba, ug bindei timek timiei minu ndig Debir cem. (Nipou yo lene ijem minu ndig dini ninyeng Kiryat-Sefer.)

¹⁶Mpe dima lene Kaleb pai “Midindo dipmisop Akhsa bak tungwa tou rino bindei timek Kiryat-Sefer leu api yai biyati lene no dima mibuwak noni nok nitnem.”

¹⁷Lene Kaleb nikinjoi Kenas nipmot di Otniel bindei timek minu ndig dima leu api yai biyati lene Kaleb kuk nipmisop Akhsa bak nok nitnem.

¹⁸Tirigi njap niwak yamti dima dem tu lene Otniel bidip huk Akhsa leu binhyepo hara nicig tut dihyei hanjop nsi ndia hi. Leu api Akhsa ug ngat nicig bikinyon leu nide keledai dip lo, nicig hig ser noni “Akwei ngat da tut mindei i?”

¹⁹Lene Akhsa buhup bak “Arig e, dahara nani tut minyei yaisi ningat poi lewo dihyei di arig kwas tut da pima jo ei mpia di ngak-caisi.” Lene Kaleb kwas minyei yaisi ningat can tut nipmisop dima ba, hi jo nai lene hi jo bijehei dideu Hebron.

²⁰Daptar minu ndig dini jug nya tibim tut minu ndig di keret Yehuda itug ndei bigyati.

²¹Minu ndig ei ting bibor nite bei mpia nibiho di keret Yehuda inyeng tak kepti dima jo ei minu niya kwas yamti dideu minu Edom. Minu ndig dima yok hagom sok yam nimangti nyatungwagom ba, muhwindatai bitut minu mien di jo ttai nya cem. Minu ndig dima yok rino Kabzeel kin Eder kin Yagur kin Kina kin Dimona kin Adada kin Kedes kin Hasor kin Yitnan kin Zif kin Telem kin Bealot kin Hazor-Hadata kin Keriot-Hezron (di ninyeng hi Hazor) kin Amam kin Sema kin Molada kin Hazar-Gada kin Hesmon kin Bet-Pelet kin Hazar-Sual kin Bersyeba kin Baala kin Iyim kin Ezem kin Eltolad kin Khesil kin Horma kin Ziklag kin Madmana kin Sansana kin Lebaot kin Silhim kin Ain kin Rimon hagom.

³³Minu ndig nya bitut minu mien nya di jo ttai nya hagom ei nungug kiou nya hagom imangti simnai brimigtai. Minu ndig dini yok inyeng rino Esytaol kin Zora kin Asna kin Zanoah kin En-Ganim kin Tapuah kin Enam kin Yarmut kin Adulam kin Sokho kin Azeka kin Saaraim kin Aditaim kin Gedera kin Gederotaim hagom.

³⁷Bitut minu ndig simnaimuhwidip brimigtehigom kin minu mien di jo ttai nya dini jug cem. Minu ndig dini yok inyeng rino Zenan kin Hadasa kin Migdal-Gad kin Dilean kin Mizpa kin Yokteel kin Lakhis kin Bozkat kin Eglon kin Khabon kin Lahmas kin Khitlis kin Gederot kin Bet-Dagon kin Naama kin Makeda hagom.

⁴²Bitut minu ndig muhwindatai hi kin bu kin minu mien nya di jo ttai nya cem. Minu ndig dini yok inyeng rino Libna kin Efer kin Asan kin Yiftah kin Asna kin Nezib kin Kehila kin Akhzib kin Maresa hagom.

⁴⁵Bitut Ekron kin minu ndig nya kin minu mien nya di jo ttai nya cem.

⁴⁶Bitut minu ndig nya kin minu mien nya hagom dideu Asdod. Minu ndig kin minu mien dini yok jo ei Ekron kin Muk Hacan ikieti.

⁴⁷Bitut minu ndig Asdod kin minu ndig di jo ttai nya kin minu ndig Gaza kin minu ndig nya ei bidem hanjop dima kikau bipek kin minyei mien di bikkin minu Mesir cem. Bitut minu ndig nya ei les him simiak Muk Hacan nintig dip cem.

⁴⁸Bitut minu ndig simnaibrimigom kin minu mien di jo ttai nya hagom ei nungug him. Ba, minu ndig dini yok rino Samir kin Yatir kin Sokho kin Dana kin Kiryat-Sana (di bon ninyeng hi Debir) kin Anab kin Estemoa kin Anim kin Gosyen kin Holon kin Gilo hagom.

⁵²Bitut minu ndig muhwindatai kin minu mien di jo ttai nya hi kin bu cem. Minu ndig dini yok rino Arab kin Duma kin Esan kin Yanum kin Bet-Tapuah kin Afeka kin Humta kin Kiryat-Arba (di bon ninyeng hi Hebron) kin Zior hagom.

⁵⁵Bitut minu ndig simnai kin minu mien di jo ttai nya hi kin bu cem. Minu ndig dini yok rino Maon kin Karmel kin Zif kin Yuta kin Yizreel kin Yokdeam kin Zanoah kin Kain kin Gibea kin Timna hagom.

⁵⁸Bitut minu ndig muhwindagom kin minu mien di jo ttai nya hi kin bu cem. Minu ndig dini yok rino Halhul kin Bet-Zur kin Geder kin Maarat kin Bet-Anot kin Eltekon hagom.

⁶⁰Bitut minu ndig cin kin minu mien di jo ttai nya hi kin bu cem. Minu ndig cin dima rino Kiryat-Baal (di bon ninyeng hi Kiryat-Yearim) kin Raba cem.

⁶¹Bitut minu ndig muhwindagom kin minu mien di jo ttai nya hagom ei iggum ndigsi. Minu ndig dini inyeng rino Bet-Arab kin Midin kin Sekhakha kin Nibsan kin minu ndig Nsim kin En-Gedi hagom.

⁶³ Bitut keret Yehuda ide minu ndig Yerusalem cem noro bit bon igijji mben Yebus di ibong ei sirima leu itimieisi dima kan bi. Ba, mben Yebus no ibong timiei ei sirima bit keret Yehuda kwei bipek ammani kep.