Read Hatam YOSUA 16 Bible Online

YOSUA 16 - Hatam bible

YOSUA 16

¹Minu niya kwas yamti nite bei mpia nibiho mem hanjop nsi di Yusuf de di intun noni him di bram yam dima nohon keti ei Minyei Yordan nyai hammi Minyei Yerikho yaisi ei nite bei mpia nipriti bikriau minu ndig Yerikho nijjai kikau ug bikwam iggum ndigsi wer sileu nite bei mpia nijjai kin nicutti ikieti kikau bipek kin minu ndig Betel ei nungug him.

²Lene jo leu minu ndig Betel ndam Lus ba, njiriek mben Arki ide minu ndig Atarot.

³Lene minu niya kwas yamti dima jo leu sirima bei mpia nicutti ug bipek kin mben Yaflet ide hanjop kikau bipek kin hanjop Bet-Horon-Hilir kikau ug ei Gezer leu api ug jo hon Muk Hacan nintig dip.

⁴Keret Manasye kin Efraim di intun Yusuf him itug ndei dihyei hanjop nsi dini ba, inyeng tak kep.

⁵Dihyei hanjop nsi di Yosua kwas tut keret Efraim insi de gom-gom bon nibresti nok gini. Nite bei mpia nipriti lene dihyei hanjop nsi dima ei minu niya kwas yamti ei Atarot-Adar kikau bipek kin Bet-Horon-Hulu.

⁶Leu api ug jo hon Muk Hacan nintig dip. Minu ndig Mikhmetat jo nite bei mpia nijjai. Lene minu niya kwas yamti nite bei mpia nipriti krop nyahan bimbut ndam Taanat-Silo binjiriek minu ndig dima ei nite bei mpia priti ndam minu ndig Yanoah.

⁷Lene minu niya kwas yamti dima mbut leu sirima ba, juk bipek kin Atarot kin Naharat leu api mbut kikau simin minu ndig Yerikho lene ug jo hon Minyei Yordan nyai.

⁸Keret Efraim ide minu niya kwas yamti nite bei mpia nicutti jo leu Tapuah kikau bipek kin minyei mien Kana lene bon nohon keti ei Muk Hacan nintig dip. Keret Efraim insi de gom-gom itug ndei dihyei hanjop nsi dini ba, inyeng tak kep,

⁹bitut minu mien poi ei keret Manasye de dihyei hanjop nsi ri.

¹⁰ Noro keret Efraim igijji timiei minu Kanaan leu minu ndig Gezer bi. Gima rino timiei minu Kanaan nya ibong timiei ei Gezer bit keret Efraim kikau kwei bipek ammani kep lo, keret Efraim nya yuubon yok binok ide awak nya he.